Mizo hla phuah thiamte zingah C. Lalkhawliana hi tunge a nih hrilh nawn kan ngai awmlo e. Amah hi July ni 27, kum 1937 ah Reiek-ah piangin tunah hian Aizawl Chanmari-ah a cheng mek a. Hla chi hrang hrang sawmli lai a phuah a, a 'poetry' phuah pakhat 'Taitesena' tih pawh kha BA Mizo Honours -ah kan zir thin a nih kha. Tin, Kristian Hla Bu-ah pawh hian Krismas hla a phuah pakhat 'Kum sul liam hnu kan nun ngaih lai tho leh thin' tih number 121-ah awmin sa thiamlo hi Zofate zingah kan awm awmlo e.
Chuti anga a hla phuah zingah chuan 'Sual Sal' tih kum 2002 a a phuah chu Mizo Gospel Band One in Christ chuan mawi takin an sa a. He hla 'Kei kher maw Lalpa?' tih Music Video Album - a hla pangana niin minute thum leh second sawmthum leh pahnih a sei a ni a. A music video a fiah fel faiin a hmuh nawm a, en a man hlain a satute pawh hian an sa nung hle.
He hla phuahtuin a phuah chhan a sawi dan chuan sual chuan nasa takin a sal betin a khawlohna te chu a phawrh chhuah sak a. Sual chuan mualpho taka siam a tum a; misual thiamloh chang mai tur a nih zia a hre chiang a. Tichuan hlau em em leh beidawng taka leh zak taka a awm lai leh rorelna ni a thiamloh chang tur a nih laiin Lal Isua zarah a sual te ngaihdam niin chu chhandamna avang chuan thiamchang a lo ni reng si a.
Chu a thiamchanna vang chuan sual leh thihna dan chuan a khawih buai thei tawhlo ang a, hlau leh zam tur a nih tawhloh zia a hre chiang a. Thiamloh chantirna tur dan reng a awm tawhloh zia a hre chiang a. Sual sual zia leh Lal Isua ngaihdaman ropui si chu he hla mawi tak hmang hian a lo puangchhuak ta a ni.
Eden huan atanga Setana thlemna sual avanga sual sal atang mihringte chu Pathian khawngaihna vangin Lal Isua Krista hmanga chhandamna pek kan ni a. Mihring leh Pathian inzawmna chhe vek tawh; sualin a bawhbeha a awp beh tlat tawh mihringte chu Lal Isua vangin sual sal atanga chhuah zalen kan lo ni ta a, Pathian nen kan lo inzawm leh thei ta a ni.
He hla lo ngaihthlatu zawng zawngte Pathianin malsawm rawh se.
Phuahtu: C. Lalkhawliana
Satu: One in Christ
Sual sal min bawihtu
Ka nun tibuai tu'n
Thiamloh chantir a tan mite hmaah min khing
Ka sual tam zozai a han phawrh chhuaka
Ka lei hringnun hi a zam leh thin..
Ka tlantu duh min hmangaihtu Lalpa'n
Amaha ka dinhmun min han hrilh chuan
Misual keimah ang thiamloh chantirna
Dan reng a awmlo
Haleluiah
Kei misual thiamchang
Lal Isua vang in
Pa Pathian nen inremin kan lo awm leh ta
Thlarau Thianghlim tihdamna hlu changin
Ka dawng thin felna leh khawgaihna
Min hmangaihna a va ropui em
Thiamchantirtu khawngaih thilthlawnpek hlu
Ka hlau lovang a, ka zam heklo vang
Ka tlantu Isua ka rin vang in
Thlarau damna kim ka lo chang ve ta
Sual leh thihna dan in min tibuai tawh lovang
Dan thar khawngaihna Isua Kristaah
Sual hneha ngamtu ka lo ni ta
Chhandamna tuikhur a tui lawm tak in
Ka chawi fo vang ka na ti reng damna
Ka rinna siamtu leh ti famkim tu
Lal Isua Krista ka lama tang.
Comments
Post a Comment