Social Media a lar tak hnuah hian mi nawlpui hian mi chanchin, kan chanchin tha lo leh mawi lo, ram leh hnam mualpho phah hial theihna leh tuemaw hming chhiat vek theihna khawp thil a lo thlen hian mit khap kar loah ram pumin kan hre nghal a. Chuti ang hunah chuan ‘mi nunah lo buai suh, ka nun a ni, adt’ tih tawngkam hi a larin chutianga ‘ka nun a ni a, ka duh duhin ka awm thei’ tih ang zawnga mahni inngaidama thiam loh inchantir duh miah lo hi kan awm ta fur a. Mi nunah hian buai tur kan ni nge ni lo?
Khawvel hmasawnna lo thang zelin a ken tel chu ‘mahni chauh inngaihsakna’ (individualism) hi a ni a. Chu chuan kan nun hona leh kan chen hona kawngah harsatna tamtak min siam a, khi chat leh inkar hi nasa takin min siam a. Chu chu keini Tribal, Mizo te zingah ngei pawh hian hmuh theihin a lang chhuak mek a, khap beh a dan beh ngawt theih erawh chu a ni lo.
Chutih rual erawh chuan Mizo kan nihna te, Tribal kan nihna te hi kan kalsan a; kan khawtlang nun dan, kan hnam zia leh kan nunphungte kalsan veka mahni chauha kan nung thei a nih ngawt loh chuan mi nunah hian kan buaiin kan la inzilhin awm dan mawi leh tha, ram leh hnamin a pawm theih loh leh a ngaihdam theih loh pawi kan khawih emaw, kan tih emaw kan chungah a lo thlen emaw chuan kan la inrawlh fo dawn tih hi kan hriat nawn a tul hle.
Pathian thu zirna huanga peng pakhat Tribal Theology-ah pawh hian chuti ang zawnga Pathian thu zir chu Tribal Theology nih phung pakhat a ni a. Bible zirtirna hi ngun taka kan en chuan mimal mai ni loin a huhoa dam khawchhuahna hi min thlenpui a tumin chutianga kan zaivai a dam khawchhuah chu Pathian ram (kingdom of God) sawi fiahna tha tak pawh a ni kan ti thei awm e.
Lal Isua zirtirna leh rawngbawlna kan en pawhin Pathian ram min thlenpui a tumin chu mi luah tura min buatsaih chu a lo kal chhan a nih tih chiang takin a sawi kha (Luka 4.1ff). Mi zawng zawngte zalen tak leh thlamuang taka kan awm theihna tur te, mahni hmasialna awm loa mi dang hmakhua va ngaihna te, intluktlang leh kan chanvo dik takte kan chante hi Pathian ramin a tum chu a ni a. Chu zirtirna chiah chu Kristian kan nih hma daih atanga tawha keini Mizote inzirtirna-thih leh ruam khatah, dam leh tlang khatah tih kha a ni.
Chuti ang chuan keini Tribal/Mizote hi huhoa nung tur leh mi dangte nena awm ho a, zai ho a, engkim rel ho thin tura Pathianin min duan leh kan nihna ni tura min siam a ni a. Mahnia tla hrang leh mahni chauh inngaihtuaha mi dangte chhiatna tur emaw, mi dang laka nung hrang daih tura duan leh siam emaw hi kan hnam leh kan khawsak phung ni turin Pathianin min ti lo tih hi huai takin kan sawi thei awm e. Chuvangin kan awm dan mawi lo, tha lo leh dim tawk lo te min siamthat an duh avanga zilhna leh fuihna kan lo tawk a nih pawhin lawm taka pawm a zawm mai hi kan tih tur a nih zia leh Pathian thu a nih zia hi kan hriat chian nawn a tul hle.
Khawii hmunah pawh Mizote hi awm mahila kan awmna hmun apiangah a theih chen chena intanpui thin, inngaihsak tawn thin, chhiat that kan tawh pawha intuam hlawm zel thin kan ni a. Mizoram pawn leh khawvel hmun danga kan awm pawhin chutiang chuan kan la inngaihsak tawn hram hram a, kan theih chen chenah a huhoa nun hi kan la tum fan thin a nih hi.
Chutianga hnam nunphung nghet tak nei, inzawm khawma nung ho dial dial thin, intanpui tawn leh a thlum a al eiza dial dial thin kan nihna hi khawvel lo changkang zel hian pawlh dal chin leh nek chep chin nei mahse theih tawp chhuaha chhawm nun zel hi kan tih tur zawk leh Pathian thu pawh a ni tih hi kan hriat nawn a ngai hle. Khawtlang, kohhran leh mimal te’n min zilhna leh min fuihna te hi haw tur leh hnawl tur kan ni lo tih hi keini thangthar leh zualte hian kan hriat chian nawn a tul takzet a ni.
Kan nihna –Mizo/Tribal te hi kan kalsan a mahni a kan nung thei te a nih ngawt loh chuan zilhna leh fuihna te hi lawm taka dawng sawng a mahni insiamthatna tur a hman tum hi kan bat a ni a. Tin, ram leh hnamin a pawm theih loh tur zawnga nun tum luih tlat te pawh hi sim a tha hle. Kan inzilhna te, mi nun/ka nun ka hnampui te an lo inrawlha min zilhhaute hi kan hman nunphung tha leh mawi tak, Pathian thu nen pawha inmil thlap a nih zia te hi zirchiang ila. He hnam hi chutianga inzilh a, infuih a, ram leh hnam a din chhuah theihna tura intanpui tawn dial dial tura Pathianin a din a ni tih hi i hre nawn ang u.
Comments
Post a Comment