Kristian chhungkaw pawimawhna

Kolossa khua a mite hnena Tirhkoh Paula lehkhathawn bung 3:18-21 kan chhiar chuan Kristian chhungkaw inkaihruaina dan kan hmu a. Chhungkaw inkungkaihna tha nei tur chuan Pathiana innghah ngam pawimawh zia he lai Bible changah hian kan hmu a. Tin, Paula lehkhathawn Ephesi, Tita, I Timothea leh Petera Lekhathawn pakhatnaah te pawh chhungkaw inkaihhruaina thu hi kan hmu bawk.

Chhungkua hi tu din nge?

Chhungkua hi a tir atang renga Pathianin Adama leh Evi te hnen atanga a din a ni a. Lal Isua pawhin khawvel a lo kal chhung khan chhungkaw pawimawhna leh hlutna kha a zirtir uar hle bawk. Chhungkaw zahawm, tlo leh mi entawn tlak ni tur chuan kan chhunngkaw khawsak inrelbawlnaah Pathianin hmun pawimawh ber a chang tur a ni.

Bible in Chhungkaw pawimawhna min zirtir dan

Thuthlung Hlui leh Thuthlung Thar-ah hian Chhungkaw pawimawhna leh chuti ang inzirtina tam tak chu kan hmu a, thenkhat lo tarlang ila-

1.      Chhungkua leh Thusawm Pek: Pathianin Mosia hnenah Thusawm Pek a pekah khan nu leh pate leh naupangte chungchang kan hmu a. Naupang/Fate hnenah nu leh pate chawimawi tura thupek kan hmu a, dam reina in a tiam zui tih kan hmu (Exodus 20:12).  He thu hi vawiin thleng pawhin a la dikin a pawimawh tawlh tawlh emaw tih tur a ni a. Keini thalai leh naupangte hian kan nu leh pate hi kan zah em?

2.      Chhungkua leh Thufingte: Thufingte-ah hian chhungkaw chungchang inzirtirna tam tak kan hmu a. Fapa fingin a pa thu a zawm thin thu te, chuti anga nu leh pate thu zawm tlat mi chuan chhungkua a lo din leh zel turah pawh rochun tur thil hlu leh tha a hnuchhiah thin tih kan hmu a (Thufingte 13:1, 22). Chhungkaw ropui leh kan tu leh fate thleng pawha entawn tlak ni tur chuan tun kan vawiin hun pawimawh zia hi kan hre thiam nghal vek awm e.

3.      Tirhkoh Paula zirtir dan: Tirhkoh Paula pawh khan chhungkua a ngaipawimawh hle a. Ephesi 6:1-4 na thu phei hi chu mi zawng zawngin kan hriat hlawh khawpa lar a ni a. Naupangte’n nu leh pa thu awih hi kan tih tur a nih zia leh kan dam reina tura thu tiam nei hmasa ber a nih thu kan hmu a nih kha. Tin, nu leh pa te pawhin Pathian thu hmanga fate enkawl tur kan nih zia kan hmu bawk.

Nu leh Pate mawhphurhna

Kan sawi vek seng awmlo e – Chhungkaw pawimawh zia Bible-in min zirtir dan hi. Nu leh pate’n kan mawhphurhna tlem lo sawi lang leh ila-

1.       Kan fate tana tawngtai thlahtlamloh: Kan fate tana chawl lo a tawngtai sak hi kan mawhphurhna a ni a. Job-a tawngtaina ang khan nitinin kan fate tan Pathian hnenah kan tawngtaiin an sualna lakahte ngaihdam kan dil sak tur a ni (Job 1:51). Chhung inkhawm kan neih zia te hi chinthan tha leh chin zui zel tur a nih zia kan sawi uar tawk thei awmlo e.

2.      Pathian thua enkawl seilen: Thufingte 22: 6-ah chuan kan fate chu Pathian tih mi nitura kan duh chuan zirtir tur leh chu kan zirtirna chu an upat hnuah pawh an thlah tawh dawnloh thu kan hmu a.  Hei hi a dik zia hretu chu nu leh pate hi kan ni a, chhungkaw tamtak hi kan nu leh pate’n Pathian thu min hrilh atang te, Chhung Inkhawm kan neih thin atang te a vawiin hi lo thleng thei kan nih zia kan hre chiang awm e. Chuti ang ni zel tur chuan keini pawhin  kan chhungkuaah kan chhawm nun zel hi kan mawhphurhna a ni.

3.      Entawn tlaka nun: Kan fate hian kan hriatloh hlanin kan miza, kan awm dan leh kan rilru put hmang zawng zawng hi chiang takin an hria a, keini pawh naupang kan nih lain kan nu leh pa te chu kan ngaihsan ber leh kan entawn ber a ni tih kan hrait kha. Fate tan a zahtlak, entaen tlak leh hnungzui tlak ni turin inbuatsaih ila. Kristian chhungkua, Pathian hriat chhungkua kan nih theihna tur chuan nu leh pa te hian engkimah mawh kan phurin chute ang tur a nun chu a bat a kan bat a ni tih i hre nawn ang u. 

Thalaite mawhphurhna

Chungkaw chakna leh mawina thuruk pakhat chu a chhunga cheng thalaite hi kan ni tih kan inhriatnawn a tul hle. Tun lai khawvelah ngat phei chuan kan nu leh pate’n thil tam tak hriatloh leh ngaihtuah ve phakloh an nei tawh a. Chung zawng zawngah chuan keini thalai fing zawk, chak zawk leh rem hre zawkte hian mawhphurhna lian tak kan nei a. Kristian chhungkua kan nih zel theihna turin u leh pa zah, tanpui, ngaihsak, hmangaih leh duat te hi kan tih tur a ni.

Ngaihzawng kan neih chungchangah thleng pawh hian, Kristian chhungkua kan din pui theih tur ngaihzawng i nei ang u. Facebook, WhatsApp adt kaltlang a nupui zawng lo hian KTP/TKP/SAY/PYD adt kal tlangin nupui pasal i zawng ang u.  Chu chu kan chhungaw din tur leh kan thlah te thleng pawha Kristian chhungkua kan dinna tura bul tanna pawimawh hmasa ber a ni tih hre nawn ang u.

Kan khawtlang, kan ram leh Kohhrana Pathian ram a lo la ber theihna tur chuan kan chhungkua theuh kan pawimawh a. Kan chhungkuaah Pathianin rorelna a chan chuan heng sualan chi hreng hrangte hi um bo a khap beh ngailoin amahin a lo reh mai dawn a ni. Kristian chhungkua kan nih zel theihnan kan chhungkuain tan i la thar leh ang aw.