I lam ka rawn hnaih

Pathian khawngaihna vanga zaia rawngbawlna neia Mizoram hmun hrang hranga fehchhuak thin One in Christ Music Video Album pahihna ‘Kei kher maw Lalpa?’ tih a an hla pali na ‘I lam ka rawn hnaih’ tih hla, One in Christ front man Alvin Lalruatfela phuah hi kan ngaihthlak chuan Pathian khawngaihna leh hmangaihna thukzia; Pathian tello a nung thei kan nihloh zia kan hre chiang hle awm e.

He hla hi Alvin Lalruatfela hian kum 2019 May thla tawp lama a phuah a ni a, a music video hi Hebron Pictures kut chhuak niin a fiah fai hle a, minute hnih leh second sawmnga pathuma a sei a ni.  A satute hian an sa thiamin an sa nung em em a; Pathian hnaih hlut zia puanchhuahna hla tha tak a ni. 

Pathian khawngaihna thuk zia hi a hre chiang a piangin thu leh hla in an puang chhuak nasa a. Tirhkoh Paula leh John Calvin-a te ‘theology’ ah pawh Pathian khawngaihna thuk zia chu kan hmu a nih kha. Mihring sual a tlu, tha lam aia sual lam awn leh chuti ang kawng zawh a nung ngar ngar thin mihring chu nimah ila Pathian khawngaihna chuan min zawng chhuak a. Lal Isua Krista chu Pathian khawngaihna vawrtawp  - mit a kan hmuh theih a ni tiin kan sawi thei awm e.

Chuti ang chuan Pathian khawngaihna changa lo dawng sawngtu chuan a hlut zia leh a thuk zia, a thlamuanthlak zia chu a hre chiang em em a. Pathian khawngaihna luangliam changtu chuan a khawngiahtu Pathian chu thu leh hla hmangin a puangchhuak mawlh mawlh mai a ni.

Keini pawhin Pathian khawngaihna - a thlawn liau liau a kan dawn hi a hlut zia chhut chiang ila, lawmthu sawia Pathian fak mawlh mawlh mai tur kan nih zia te; Pathian hlatsan zawnga nun pawi zia leh leh Pathian khawngaihna leh thla zar hnuaia nun hlut zia te hi ngaihtuah chiang ila; Pathian tana kan nun zawng zawng hi hlan let ve turin tan ila ang u.

I lam ka rawn hnaih

Phuahtu: Alvin

Satu: One in Christ

1.      Aw Lalpa I hmangaihna hi

Ka tan a hlu thil dang zawng aiin

Min chelh la ka thlah tawh lo’ng che

I kianga len ka nuam ngei e

Ka hringnun kawng chhuk chhovah hian

I tello chuan lungngaihna leh tahna mai a lo ni e

Aw Lalpa, I lam ka rawn hnaih e

I khawngaihna leh zahngaihna ka tan a hlu

I tello chuan ka hringnun hi a rum leh thin

Aw Lalpa, I lam rawn ka hnaih e

2.      Aw Lalpa kei misual ber hi

Min thlahthlam lo, min enkawl reng thin

Min kai la kei mi chaklo hi

I kiang a len ka nuam ngei e

3.      Aw Lalpa, ka fak fo vang che

Min chhandamtu, nunna min pe tu

Ka hmangaihna ka rawn hlan a che

I kiang a len ka nuam ngei e