Zalenna

Kum 2019 chhunga a vawi thumna atan Mizoram Synod Choir (2018-2020) chuan Official Music video ‘Zalenna’ tih hla, Grace Lalkhawngaihi’n Joseph M. Martin-a hla phuah ‘Train for Jubilee’ tih a lehlin chu ni 13 August 2019 khan an release a. Mizoram Synod Choir te hian an sa nalhin music video pawh a fiah fel faiin an sa nung hle.

He hla phuahtu Joseph M. Martin hi kum 1959 ah North Carolina ah a lo piang a. Hla phuah thiam tak niin tunah hian Austin, Texas ah a fate pahnih Jonathan leh Aubrey leh a nupui Sue-i te nen an cheng mek a ni.

He hla ‘Zalenna’ letlingtu Grace Lalkhawngaihi hi Aizawl Zarkawt nula niin Mizoram Synod Choir (2016-2018) member hlui a ni a. He hla hi kum 2018 a lehlin tawh a niin he hla a lehlin chungchang hi phone ah kan inzawt a; phur takin min lo hrilh a, a chungah ka lawm hle.

He hla hian Bible behchhan pathum a nei a; chungte chu- Deuteronomy 3:25, 11:31, Hebrai 13:11 leh Isaia 33:7 na te an ni a. Kan sawi tawh angin he hla hi Sap tawng chuan ‘Train for Jubilee’ tih a ni a. Bible kan en chuan ‘Jubilee chu Hebrai tawng a ni a; a awmzia chu ‘berampa ki tawtawrawt’ tihna a ni a. Leviticus bung 25 na kan chhiar chuan Pathianin Israel fate chu he Jubilee ah hian zalenna puang tur te, leiba te inngaidam tawn tur te in thu a pe tih kan hmu a. He hla phuahtu pawh hian chu rilru pu chuan he hla hi a phuah a; a letlingtu pawh hian ‘Zalenna’ ti a a letling hi a phuahtu rilru a phawk chhuak tha hle.

Pathianin Israel fate hnenah Abraham-a kaltlangin Kanan ram a pek thu kan hmu a. Chu Kanan ram luaha nei tur chuan Mosia hoin zinkawng thui tak an zawh a ni tih Bible ah kan hmu a. Harsatna leh manganna tam tak, thihna te pawh an tawk tih kan hmu a nih kha.

Chumi behchhan chuan he hla phuahtu hian keini Kristiante pawh kan zalenna tur lam pan chuan hma lam pana kal zel turin min fuih a. Kan chatuan hmun Vanram-Kanan chu kan thlen theihna turin hreawm leh hun harsaah pawh tlu mailo a kal zel turin min fuih a. Zan thim leh hreawm tam tak pawh lo thleng mahse hmalam pan tlat turin min fuih a ni.

Lal Isua kal tlangin keini sual bawi atang te chu Jubili dar, zalenna pek kan ni tawh a. Chuvangin lawm a zaiin Lal Isua fak ila; chu kan zalenna chu chang ngei tur leh nunna lallukhum chu khum ngei tura inbuatsaihin hmanmawh takin i kal ang u tiin he hla thunawnah hian kan hmu a ni.

Pathian min kohna aw chu ngaichang zel chungin kan tan kawng min buatsaih sak chu thlang zel ila. He khawvel changkang tawh tak, sualna chi hrang hrangte’n min tihbuaina khawvelah hian Kraws kawng lam chu zawh talh talh tur te, nun beidawng leh mangang te pawhin Lal Isua vanga kan zalenna – Jubili lawm tura Chanchin Tha hril turin he hla hian min fuih a ni.

He hla lo ngaithlatu zawng zawngte Pathianin malsawm rawh se.

Link: https://www.youtube.com/watch?v=35_v0e8-77I

Zalenna

Phuahtu: Joseph M. Martin

Lettu: Grace Lalkhawngaihi

Satu: Mizoram Synod Choir (2018-2020)

Lalpa buatsaih Kannan ram chu

Ringhlel lovin i pan ang u;

Zalenna dar an khawng ri e,

Hlimin i kal ang u.

Chatuan hmun i thlen theih nan chuan,

I kawngzawh lai kha fimkhur la;

Zan thim leh khawi hmun pawh nise;

Rinawmin kal zel la.

Lawmin zai r’u! Jubili!

Thangkhawk se! Jubili!

Tah leh lungngaih a awm tawh lo’ng,

Lallukhum kan chan hun chuan.

Fakin zai r’u! Jubili!

Kan tan kawng a hawng ta,

Hman hmawh la lokal thuai ang che,

Chu hmun nuam chang turin.

Lalpa aw ngaithla chung zelin,

Nunna kawng chu thlang zel ang che;

Kawng chhuk chho hreawm karah pawh,

Kraws kawng chu thlang zel la.

Chanchin Tha hril turin min ko,

Zalenna thu chu puang turin;

Tuihal riltam te lo kal r’u,

A hnen rawn pan thuai r’u.