KEI KHER MAW LALPA?

Tunlai Mizoram khawvela Pathianin amah faka zaia rawngbawl tura hna pawimawih tak a pek mek One in Christ te Music Video Album pahnihna ‘Kei kher maw Lalpa?’ tih chu ni 31, August 2019 ah Rev. Dr. K. Lallawmzuala, CKTP Leader ni mekin Mission Veng Presbyterian Kohhran Hall-ah a tichhuak a. He album ah hian hla sawm awmin a video hi a fiah faiin en a nuam hle a; Studio A-16, Hebron Pictures, Hillmen Videography, Andrew Vanchhawng te leh Mizoram School of Photography te kut chhuak a ni a, cheng 200 man niin belhchian a dawl hle.

Kan sawi tak angin he album ah hian hla sawm a awm a. Sap hla lehlin pali leh Mizo irawm chhuak hla paruk a ni a. Heng an hla te hi a then chu Music Video-a an lo siam tawh te niin a tam zawk erawh hi chu hla thar hlak an ni a, chungte chu-

1. Kei kher maw Lalpa

Lettu- Alvin

2. Mamawh chhana

Phuahtu- Alvin

3. Phurrit a bo ta Kalvari-ah

Lettu- Rev. Lalrinmawia

4. I lam ka rawn hnaih

Phuahtu- Alvin

5. Sual Sal

Phuahtu- C.Lalkhawliana

6. Engkimah

Lettu- Alvin

7. Zing daifim

Phuahtu- V. Lalhnumawia (Lamawia)

8. Lalpa ka engkim

Phuahtu-Alvin

9. Lalpa ka chhuang che

Phuahtu- Lalliani

10. Ka lawm e Lalpa

Lettu-Alvin & Maria

Tun tumah chuan he album a hla hming putu ‘Kei kher maw Lalpa?’ tih Rev. Dr. C. Chawnghmingliana 'preview' na hian kan lo sawi hrih ang a; hun rem changah a hla dang te hi kan la sawi zui leh dawn nia.

He album hming putu ‘Kei kher maw Lalpa?’ tih hla hi Kris Kristofferson-a phuah ‘Why Me Lord?’ tih Alvin Lalruatfela lehlin a ni a. He hla phuahtu hi tanpuitu mamawh inti ngailo mihring a ni a. Mahse tumkhat chu tanpuitu ngai a intiin a nun a tui hal ta em em a; a thiante sawmin biak inah a inkhawm a. Chumi tuma thusawitu Pastor chuan tanpui ngai leh boral mai tur mihring, nun chau ngawih ngawih in awm em tiin inkhawm ho chu a zawt a. Chutah chuan Kristofferson-a chuan tanpui a ngaihtu a sawi chhuak a.

Pastor chuan Isua Krista pawm tura a inpeih leh peihloh te zawtin Kris-a chuan a inpeih thu a sawi a. Tichuan Pastor chuan a awm hmuna thingthi tura a hrilh hnuah Kris-a chu thingthiin, sual phurrit tak phur leh a sawi fiah zawh loh thil a tawn mek thu sawi chhuakin Pathian puihna a dil a. Pathian hnenah tanpui ngai a nih thu leh misual a nih thu chu sawi chhuakin Pathian hmangaihna chang tur hian ‘Keei kher maw Lalpa?’ tiin phulo inti takin he hla hi a lo phuah chhuak ta a ni.   

He hlaa kan hmuh ang hian – puih ngai leh nun beidawng ve ngai reng renglo nia inhria, mahni tawka ‘kei’ inti ve tak pawhin a nun tuihal zia a hre chhuak a. Pathian tanpuina leh hmangaihna chauh lo chuan a nun khawhar tuihal chu a tidam zo ta reng reng lo tih hrechhuakin Pathian tanpuina chu dilin a au ta lawm lawm mai a ni.

Chuti anga Pathian hmangaihna thuk lutuk, kan phu reng reng loh chuan he hla phuahtu hi ang hian min chhun keh hnuah chuan Pathian hmangaihna chhan let a, theihtawp chhuah mai loh chu tih theih kan neihloh zia leh keimahni ang mai nun beidawng ve mek te Lal Isua hnena hruai thlen chu kan tihtur a nih zia he hlaah hian a lang chiang hle a. Chuti ang a rawngbawlna pawimawh tak mai chu keini teh lul ti tur hian engtin nge Lalpa min thlan ve duh zawk le?

He hla leh Album lo ngaihthla tu zawng zawngte Pathianin malsawm che u rawh se.  

Kei kher maw Lalpa

Phuahtu: Kris Kristofferson

Lettu: Alvin

Satu: One in Christ

Kei kher maw?

Engthil nge ka tih a

I malsawmna zozai,

Chang ve thei tur hianin.

Min hrilh rawh,

Eng hi nge ka tih a

I hmangaihnate leh

Khawngiahna chang tur hian

Min pui rawh Lalpa

Ka lo chau zo ta

Min pui ang che

Misual ka ni e

Tunah hianin

Ka mamawh ber i ni

Min pui rawh

Ka nun ka hlan a che

Min hrilh rawh

Eng thil nge ka tih ang

Ka chunga I thatna

Ka rulh let ve theih nan

Tichuan Lalpa

I hnena kir tura

Kawng ka kawhhmuh ve theih nan