Frank Ellsworth Graeff-a chu Pathianin kum naupangte a nih laiin thalaite hnenah leh naupnagte zinga rawngbawl turin a ko a. Tichuan Methodist Kohhranah awm in Pastor a ni a. Naupangte hnenah chuan thawntu tawite te hrilhin thu te a ziak thin a. Philadelphia leh Pennsylvania ah Kohhran a enkawl bawk a. Chuti ang chuan theihtawpa Pathian rawngbawlin hla hi zahnih aia tam a phuah bawk.
Chuti anga Pathian tana theihtawp chhuaha rawngbawl thin nimahse a nunah harsatna a tawng fo a. Kum 1880 ah a farnu upa zawk Ann-i'n a thisan atanga kum hnih hnu 1882 ah a farnu tlum zawk Sallie-i chuan a boral san ve leh a. Chumai chu niloin a nu Mathillda-i leh a pa Samuel Beard-a te chuan a kum zawnin - kum 1886 leh kum 1887 ah te an boral san a. A chhungkaw neih chhun a farnu la dam Armasa oliver-i pawh chuan kum 1901 ah a boral san ve leh a!
Chuti khawp chuan vanduaina zawnga hreawm ber thihna chuan a chungah thla zar mawlh mawlh mahse la Pastor Frank Ellsworth Graeff-a chu a beidawng ngailo a, Pathian a ringhlelin a dem ngai miahlo a. A chanchin sawitu te chuan'shunshine minister' ti hialin an la sawi cheu a ni.
Chuti taka vanduaina a tawk chung leh mi dangte pawhin harsatna an tawh chang a Pathianin a kalsan ta mai em ni tia rinhlelhna rilru leh vuina rilru an puta zawhna an zawh thin te chu Pastor Frank Ellsworth Graeff-a chuan khawvela Pathian hla ropui ber niphak khawpa ropui leh hlu 'Does Jesus Care?' (Lungngaih ni leh lawm lai niah hian, Lal Isua'n min ngaihsak ngai em?) tih hmangin Pathianin a kalsan lo a, a awmpui reng a, rinhlelh tur a awmloh zia chua lo puang chhuak ta a nih kha.
He hla hi Mizo tawngin Rev. P.D. Sena chuan min lehlin sakin Kristian Hla Bu No-154 ah a awm a nih kha. He hla hian mihring kan nih chhunga vanduaina rapthlak ber - thihna kan tawh lai meka kan rilru a zawhna lo awm leh rinhlelhna nasa tak lo awm thin chu chiang taka min paithlak sakin kan lungngaihna leh manganna tawhah hian Lal Isua'n min pahtsan loh zia a tar lang chiang hle a ni.
Pathian remruat leh thil rel dan chuan kan hriat ve vek phak rual a nilo a. Khawvela kan awm chhungin harsatna leh vanduaina - thihna ngei pawhin kan chungah ro a rel dawn a. Chung zawng zawng - lungngaihna leh vanduaina, manganna vawrtawp kan tawh mek lai chuan Lal Isua hian min kalsanin min theihnghilh ta mai em ni? Pathian hi a awm tak tak lo em ni?
Chung harsatna zawng zawng tawktu Pastor Frank Ellsworth Graeff-a chuan chung zawhna te chu engtin nge a chhan kha? He leia kan hmangaih ber leh kan inngahna ber te lakbo a an awm a; tawrh zawh rual loh khawpa thinglung na leh rum tlawk tlawk a kan awm lai chuan engtin nge Lal Isua chu awm?
"Aw min ngaihsak fo tih ka hria,
Ka lungngaihin a tina;
Ngui chang ni leh zankhua rei hlauhawm hnuaiah,
Min ngaihsak tih ka hria"
Comments
Post a Comment