Ka Laptop Thar

Kan unauah upa ber nimahila kei hi ka laktlakloh zek a! Upa ber e tilo hian naute kep ngai leh tuam hlawm ngai tak hian ka khawsa reng a. Hei tunah pawh Pathian khawngaihna kaltlangin ka naute’n ka zirna kawnga ka mamawh tak mai Laptop thar hlak min lei sak a, ka va lawm tehlul em!

College kan kal mekna ah hian Assignment ti turin Computer hman ngei ngei a ngai ve tawh si a. Chuvangin kan thiante chuan reilote ah Laptop an lei ta zung zung a, a thente chuan an neisa bawk a. Chuti ang chuan kan College-ah keimah chauh chuan Laptop neilo in rei tak ka awm a. Ka thiante Laptop hman reng chu thil theih a nilo a. Chuvangin kan College Library-a Computer chu ka hmang fo a.

A chang chuan mi dangin an lo hman ve loh theihloh avang te hian ka kal thlawn fo a. Tin, midang lo hmang ve duhin min lo nghah reng chang phei chuan – a bikin hnam dang zirlaite’n- ka assignment tizo lo in ka kian fo thin a. Tunah erawh chuan Pathian zarah keima Laptop ngeiin ka assignment te ka tive thei tawh dawn a, ka lawm takzet a ni!

Kan zirlaipui te, kan senior te leh kan hotute hian Laptop ka neilo tih hi an hre vek lem lo a. Chuvangin ‘Pendrive’ hawh min dil tawk te, film thar ka ka neih leh neihloh min zawt tawk te leh ‘Power Point’ hmanga ‘assignment’ pek ngai te hi ka hma chhawn fo a. Chungah chuan a chang chuan ka hrilhhaiin ka buai ru ve fu zel a. Mahse ka thiante hian engkimah min kep a, ka lawm thei hle.

Thuziah te hi ka peih ve zek a, chung ka thuziah thin tamber te chu ka phone atanga ka ziah hi a ni deuh ber a, a chang chuan kan Library a awl chuan ka hmang ve thin bawk a. Ka rilru a thu awm ka ziah nghal duh chang te, assignment ka tih nghal duh changte a Computer emaw Laptop emaw hman mai tur awmlo te hi ka buai ve thei hle a. Laptop emaw Computer nei velo ta nafam chuan ‘Pen drive’ ka neilo bawk a. Chuvangin kan College Library a ka assignment tih tamtak te ka ‘email’ ah ka in ‘sent’ a, ka phone atanga ‘download’ leh in ka thiante hnenah ka ‘print’ ve leh thin. Chuti ang chuan College-ah hian kum thum chu ka hmangzo ve ta reng mai.

Tunah chuan keima Laptop ngeiah thu te ka ziak ve thei tawh dawn a. Tin kan dam chuan ‘Thesis’ kan ziah tur te pawh keima Laptop ve ngeiah hian inthlahrung tawh miahlo in ka ziak ve thei tawh dawn a, ka room dawhkanah ngei ka inchhawp ve ta a, ka va lawm tak em! Tunah pawh hian hei keima Laptop ve liau liauin heng thu te hi ka ziak ve ta nia. Ka awihlo in mumang te pawh a ang lek lek zawk a, khumah ka mutpui lo chauh a ni ber e!

Keima mimal thil neih ve tawhah chuan thil man to ber a ni a. Heti anga tam sum sen ngai thil hi ka la nei ngai lo a. Heti zat sum senga min leisaktu ka chhungte,a bikin ka naute chungah hian ka lawm tak zet zet a, lawmthu sawi dan pawh ka thiam lo. Heng zawng zawng hi Pathian khawngaihna ka dawn a ni a, lawmthu hi ka sawi senglo tak meuh a ni.

Ka lawm e Lalpa, I malsawmna vangin…..