Kohhran hmasa lam chanchin kan zir atang te, Kohhran Pa te ho chanchin kan zir tang te leh vawiin thleng hian Hmeichhia te hian Kohhran leh khawtlangah rawngbawlna chanvo pawimawh tak hi chelh mahila an lang sar em em ngailo a. Pathian thu leh kan Bible te pawh mipa thlirna (Patriarchal perspective) tanga zir a ni thin avang hian hmeichhia te hian chanvo tha leh hmun pawimawh hi an chang tawklo fo a. Hei a dik reng em?
Mipa thlirna leh rilru put hmang atang ringawt a Pathian thu (Theology) zirna chu khawvel lo kal zelah duhkhawplohna leh fmakim tawklo a hriatna a lo piang a. Kum 1960 chho atangin USA-ah chuan Hmeichhe thlirna tanga Pathian thu zirna (Feminist Theology) hi a lo piang chhuak tan a. Feminist Theology zirna kawnga sulsutu hmasa ber pawl chu Elizabeth Cady Stanton, USA a mi hi a ni kan ti thei awm e. Ani hian kum 1890 ah daih tawh khan ‘The Woman’s Bible’ tih lehkhabu a lo ziak tawh a; ‘Kohhran leh Bible hi hmeichhiate chawisana an awm theihna tur dal tu lian ber an ni’ a lo ti thlawt a nih kha!
A ni ve lah tak a- Bible leh Kohhran zirtirna ah hian hmeichhiate dah hnuai zawkna leh rahbehna ang lam hawi hi hmun tamtakah hmuh tur a awm a. Thuthlung Thar huna Kohhran ding tirah pawh hmeichhia te hian nasa takin tha an thawh a ni tih kan hre thei awm e. Chutih rual erawh chuan Kohhran hruaitu atan erawh chuan thlanchhuah anni lo a(Tirh. 1:12–14). Mizoramah te ngei pawh nemngheh rawngbawlna chu hmeichhaite kut ah hian kohhran in kan la dah thei meuhlo chu a ni a. Chuti anga hmeichhia leh mipa te intluk tlan theihlohna chuan Pathian thu zirnah ah pawh nghawng nei zelin tunah chuan ‘Feminist Theolgy’, hmeichhia te thilrna atanga Pathian thu zir te chu tun lai khawvela Pathian thu zirna huanga zir hlawh leh sawi hlawh pawl tak a lo ni ta a nih hi.
Hmeichhe Pathian thu thiam (Feminist Theologian) te’n an sawi dan chuan Pathianin mihring – mipa leh hmeichhia te hi A anpui a a siam ve ve kan ni a(Gen 1:27), chuvangin Bible pawhin a tir atang rengin mipa leh hmeichhia hi intluk tlang renga siam kan nih thu hi an sawi a. Pathianin Adam-a a siam hmasa a, chumi hnuah Eve-i chu Adam-a pui turin a siam a. Eve-i chu Adam-a nen in intluk tlang a siam, mahse tihtur leh mawhphurna erawh in anglo chauh a a siam a ni an ti.
Pathian pawhin Amah chu Israel fate tanpuitu (Deut. 33:7; Ps. 33:20) a nih thu a sawi fo ang khan Eve-i pawh hi Pathianin Adam-a tanpui niturin a siam a. Chuvangin Bible bu hmasa ber Genesis atang pawhin mipa leh hmeichhia te hi intluk leh mawhphurhna in anglo mai chauh kan ni a, dinhmun sang zawk leh hniam zawk kan awmlo – tiin Feminist Thelogian te chuan an sawi a ni.
Lal Isua hun lai kan en chuan Juda dan zirtirtu Rabbi te’n hmeichhiate zirtirna an pe ngailo nachungin Lal Isua erawh chuan hmeichhia leh mipa a thliar hrang lem lo niin a lang – A zirtirna ah khan. Mari chu Isua’n a zirtir a, hmechhia a nih avanga eirawng bawla buai Marthi’n Lal Isua hnena Mari a dem deuh pawh khan Isua chuan Mari chanvo kha chhuhsak tur a nih loh thu a sawi a nih kha(Lk 10:38). Tin, Juda te khan hmeichhia te hian an kut a an khawih zen zen ngailoh lain Lal Isua chuan ruamhuaiin a man hmeichhia pawh kha a kut a khawihin a tidam tih kan hria(Lk13:10ff.; Mk 5:25ff.).
Tin, Mari, Magdalini leh Heroda sum enkawltu nupui Joani te, Susani leh hmeichhe dang tam takin Lal Isua rawngbawlna kha an zui thin a, Lal Isua’n a hnar awm kan hre lem lo (Luke 8:1–3). Tin, Lal Isua thiha thawlheh hnua a inlar hmasakna ber pawh Mary Magdalene-i hnenah a ni tih kan hmu bawk a, tichuan zirtir te hnenah thihna hnenah tholeh a nih zia puangchhuak turin a tir a nih kha(Jn 20:1-18).
Heti ang thuchah pawimawh tak leh Kristian te thurin bulpui ber – Thihna hneha thawhlehna – thu keng tur hian Lal Isua hian hmeichhia a ring zo tlat hi a mak hle. A chhan chu hetih hun lai hian hmeichhia te chu Juda court- rorelnaah pawh thuhretu ah an hmang duh ngailo – hmeichhia chu dawt sawi tur a ngaih an nih tlat avangin! Lehkhathawn lam kan en pawhin Pathian hmaah chuan hmeichhia leh mipa te chu thuhmun kan nih thu leh chhandamna pawh thuhmun vek a nih thu kan hmu a nih kha(Gal 3:28).
Kan sawi vek seng awmlo e. Heti chuang hian Kohhran leh khawtlang hian hmeichhiate nena rawngbawlna intluktlang neih hi chu harsa kan la ti fan a. Kan sawi tak ang khan tun hma atang tawhin hmeichhiate chuan rawngbawlna chanvo pawimawh hi an chang ngai meuhlo a, an chan ve pawhin kan sawi uar ngai lem lo. Mizorama Chachin Tha lo thlen tirh a ‘Bible Women’ an tih thin te rawngbawlna chung chang te pawh kha thangthar te ah chuan hria kan awm tawh awm lo e. Anni ho hi kum 1913 ah din niin kum 1963 thlengin rawgbawlna kawngah an thawhhlawk em em a. Vawiin thleng a an rawngbawlna pawimawh tak kan la chhunzawm reng chu ‘Buhfai tham’ hi a ni a. Buhfai tham rawngbawlna pawimawhzia chu kan sawi seng awmlo e.
Hmeichhiate hi rawngbawlna kawngah hian chanvo pawimawh tak tak kan chelh thei a, Lal Isua pawhin min hnar loin A rawngbawl tur hian min iai lo tih hi hrechiang nawn ila. Tun aia nasa a tan la in, kan rawngbawlna te hian hma a sawn zel theihna tura tan lak hi kan tih makmawh a ni tih hre thar in Pathian tana thil ropui tak ti turin inbuatsaih sauh sauh turin kan infuih a ni.
Comments
Post a Comment