Seol Palai Au Aw

Kum 2005 vela hla lar tak thin ‘Seol Palai Au Aw’ tih TheRock Zorammawia phuah kha kan la hre furin a rinawm a. A hun laiin a larin mite thinlung hneh tak hla a ni a. Tun thlengin You Tube ah en theihin a awm a; mi tamtakin vawiin thleng pawhin an la en thin a. He hla mawi taka satu Madawnga hi Armed vengah a awm a, a hmeichhia zawk Champuii hi West Phailengah a awm mek bawk. He hla phuahtu TheRock Zorammawia hi tunah Chaltlangah khawsa mek in he hla  a phuah dan chanchin hi ka va zawt a, a ngaihnawmin a ropui hle.

Sikul 7 atanga hnawhchhuah, veng 17 atanga hnawhhuah leh Jail vawi 39 tang tawh a ni a. Police atangin damdawi ngawlvei a nih avangin an ban a. Damdawi hian a taksa nasa taka sawisain ke in a kal thei tawhlo a, mawngtawlha kal in Zodin bawr velah a khawsa thin a. A taksa chu nasa taka damdawiin a khawichhiat a vangin police te pawhin lock up a tang tur pawh an duh tawhlo khawpa taksa chhia, thi leh dam kara lengin kum 2004 ah khan a khawsa a.

Chutia mangang taka a vah vel lai chuan ‘Kirsta Pasaltha in awm em? Ni thum chhunga Isua ke bula min hruai thlen loh chuan ka thi dawn a ni’ tin a au a. Chutih lai mek chuan Vaivakawn KTP Evangelical Cell te chuan mi pakhat, misual turu tak mai an zawn thu leh amah chu an hriatloh avangin Thana lamah man a nih pawha hrilh vat turin an ti a. Chutih lai mek chuan he hla phuahtu hian damdawi a ngah avangin a thianpa Vaivakawna awm chuan an in riak thla tura sawmin Zodin atang chuan an chhuk a.

Tichuan a tuk lamah Vaivakawnah Living Hope Ministry te hnenah kalin a taksa nate enkawl turin a pan a. Chutih hun lai chuan a nun a tuihal em em tawh a. Chutah chuan muhilin a lo harh leh chuan puan te sinin khumah a lo mu reng tawh a. Vaivakawn KTP te pawh chu lo kalin an tawngtai chhana leh an mi zawn mek chu a ni tih an hria a. Chumi hnuah chuan Zuangtuia Damna In ah Vaivakawn KTP te chuan enkawl turin an phur phei a.

Heta a awm lai hian Pathian tihdamna – taksa leh thlarauah changin ‘Seol Palai Au Aw’ tih hla ropui tak mai hi a lo phuah chhuak ta a ni. Hetih hun lai hian misual lar ber, KS te leh damdawi ngawlvei te zawng zawngin hotu ena an en a ni a. Chung ho zawng zawng ai awh chuan Krista Pasalthate chu anmahni chhanchhuak tura min auin,  he hla hi a lo phuah chhuak ta a ni. Chuti anga hrasatna leh beidawnna thuk ber a awm lai leh chhanchhuah ngaia a awm lai chuan inthlahrung tak leh zak tak chungin Krista Pasaltha te min tanpui tura sawmin, amah anga misual te aiawha he hla hi phuah a nih thu min hrilh a ni.

Tun hnaiah hian thalai, tleirawlte zingah damdawi ngawlvei hi an tam em em mai hi a pawi hle a. Heti anga ruihhlo bawih a tang mek thalaite hi an lainatawm takzet a. Anmahni hi chhuah duhin hmalam pan duh mahse chakna leh theihna an neilo a. Chuvangin anmahni hian min auin min mamawh a; Lal Isua hnena hruaithleng tur hian keini bak hi auh tur an hre lo. Chuvangin keini Krista Pasalthate hian kan thalaipui, ruihhloin an taksa leh thlarau a tichhiat mek te hi chhanchhuak turin mawhphurhna lian tak kan nei a ni tih hi hre nawna kan vei thar a ngai hle.

A tak ngei a daitu leh he nun rama awm, chanchuahna tawkin he hla a phuah atang hian an dinhmun diktak leh chhanchhuah ngai an nih zia hi kan hmu chiang thei awm e.  Nun tuihal leh beidawng, kla ngahna hre tawh silo leh chhanchuah ngai an nih zia inhria in tumah dem leh sawisello in keini hi min auin min sawm lawm lawm a nih hi! Diriam leh hmusit mailo a Lal Isua ke bula hruai thleng tur hian keini hian tihtur kan nei a. Krista pasaltha ni tura tawngtaina nena penchhuak leh nasa zual turin kan insawm a ni.

Seol Palai Au Aw

Phuahtu: TheRock Zorammawia

Satu: Krista Chhanchhuahte

Nun tuihalin khawvelah hian

Hlimna zawngin ka lo vakvai

Mahse a tui ka in theilo

Thihna tur an chang zel si

Nunkhua a ngui a thim zo ta

Sual vanga hliam tuar kan ni si

Keini zawng hrem zia reng kan ni

Kan thiltih man chauh hmu kan ni si

Krista Pasaltha khawnge in awm?

Chhantlak kan la awm a sin

Krista hnenah min hruaithleng r’u

Thimin mi nan hma hian.

Ruihhlo ngai leh hur hmang kan ni

Uire nu iang tarchhuah kan ni

Min khawngaihtu kan va nai em

Lo hnai ta che Nazareth tlangval

Riangvai chanhai pachhia kan ni

Kan zin kawngah suamhmang tawkin

Min tanpui tu kan va ngai em

Samari mi tha lo hnai ta che

Nun beidawngin kan chau zo ta

Min tanpuitu kan va ngai em!