Pathian hmangaihna leh khawngaihna thuk zia Lal Isua kaltlanga kan chan leh kan dawn hi a hre chiang a piangin ropui an ti a. Chu khawngaihna mak mawi leh ropui tak mai chu thu leh hla in an puang chhuak a, an hrilin an sa thin a nih kha.
Chuti ang chuan Upa Sanglianthanga pawhin Pathian khawngaihna leh hmangaihna ropui zia leh Lal Isua neitu nun hlut zia chu a tak ngeia hmu chiang tu leh changtu a nih zia a inhre chiang a. Chuvangin 'Hnehna hla thar' tih hla ropui tak mai chu a lo phuah chhuak a.
Tichuan Upa Sanglianthanga hla phuah chu One in Christ te chuan kumin a an music video pahnihna ni tur in an sa a. Music video a fiah fel faiin mawi tak leh nung tak maiin he hla hi an sa a, You Tube lamah en theihin a awm.
He hla chang khatnaa kan hmuh ang hian Lal Isua chu amah leh amah a intihtlawmna leh kan tan A ropuina zawng zawng hnawla hmangaihna vanga kan tan a lo reitheihna chu keini tan hausakna leh nun kan lo neih theihna a lo ni a. Sum leh pai ngah ngawt chu hausakna dik leh tlo - chatuan daih a nih loh thu kan hmu a. Lal Isua neitu chu khawvela leh chatuan thlenga mi hausa diktak an nih zia kan hre nawn a ni.
Tirhkoh Paul-a'n Rom 8:35 a a sawi ang khan Lal Isua nen kan inhmangaihna leh kan inzawmna chu riltam, saruak leh harsatna chi hrang hrang te pawhin min then theih tawh dawnloh zia he hla thunawnah hian kan hmu a. Kan lawmna leh kan inghahna bul ber chu Pathianah a nih tawh avangin leh Lal Isua zara engkim hnehtu leh chatuan nunna neitu kan nih tlat tawh avangin lawm tak zaia hnehna hla thar sak chu kan tih tur a nih zia kan hmu a ni.
Khawvela finna leh thiamna te a lo sang zel a, tunah phei chuan kan hriat phak baka changkang khawvelah kan cheng mek a. Chung thil te chuan Kan thalrau lamah thlamuanna famkim tak tak erawh min pe thei lo a. Mahse Lal Isua lal bera neitu leh nun kaihruaitu a nei tlattu erawh chuan thlamuanna mak tak leh nun tam neiin in tumah tichhiat leh do zawh rual kan nih loh zia he hla chang hnihna ah hian kan hmu a ni.
He hla lo ngaithla tu zawng zawngte Pathianin malsawm che u rawh se.
Link- https://youtu.be/NLBy2_IYsKM
Link- https://youtu.be/NLBy2_IYsKM
Comments
Post a Comment