Lalpa, kraws-a i tuar natzia

Kristian Hla Bu number 208-na kan keu chuan kan tana Lal Isua Krista tuarna chungchang hla tha tak mai; Fanny Jane Crosby-i (1820-1915) phuah 'Lalpa, kraws-a i tuar natzia' (Nearer the Cross! My heart can say, I am coming nearer) tih kan hmu a. He hla hi Mizo zingah hrelo kan awm awmlo e.

He hla ropui tak mai phuahtu F.J. Crosby-i hi mitdel niin a chanchin ringawt pawh tamtak ziah tur a awm ang a, kan sawi vek seng lo ang. Thla ruk chauh a upa a nih laiin mitna neiin an doctor rawn chu a fuhloh avangin a dam chhungin a mit hi a del hlen a. Chuti chung chuan Pathian fakna hla tamtak a phuah a. Kristian Hla Bu kan hman mekah hian Crosby-i hla phuah ringawt pawh hi sawmthumpakhat zet a awm a. Tuna kan sawi mek hi Rev. Taisena (1891-1959) chuan Mizo tawngin mawi tak maiin min lehlinsak a. He hla hi Sap tawngah chuan chang thum niin a letlingtu hian chang tawp ber hi a phuah belh a nih a rinawm.

He hla chang khatna hian Lal Isua'n min chhandamna tura Kraws-a khenbeh a tawrh mek chu en turin a lo kal thu kan hmu a. Heti tak maia Lal Isua, keini mihringte tana inngaitlawm tak mai leh mahni nihna zawng zawng kalsana keini tana Kraws-a hmuhsit leh hreawm tinreng tuara a thi duh mai hi a mak em em a. He thihna hlu tak, kan thlarau chhandamna tura Lal Isua thihna hmun chu hrechianga ngaihlu em em tur kan ni. 

He hla chang hnihna hian Lal Isua thisen chhuak chu khawngaihna leh hmangaihna vang a nihzia kan hmu a; chu chu kan thlarau tana chatuan nunna kan neihna tur a ni. Chu min hmangaihna vanga Kraws-a thi Lal Isuaah chuan kan awm rengna tur leh kan bo tawhlona turin Lal Isuaah hian inkhengbet tlat turin min fuih a ni. 

Chuti taka thi khawp hiala min hmangaihtu Lal Isua chu tawngtaiin beiseina nen pan ila. Kan lungngaihna, kan hreawmna leh kan phurrit te pawh min chhawka min lakbo sak turin Ani chu a awm reng a. Chatuan nunna lallaukhum min pek tur chu kan khum ve ngei theihna turin chaklo tak chung pawha pan turin he hla chang thumna ah hian min sawm a ni. 

Pathian a nihna te, A ropuina leh a thiltihtheihna zawng zawngte bunruaka A hnampui Juda te'n anchhedawnga an ngaih Thing- Kraws lera khaikana tihhlum a nihna leh a tawrhna rapthlak tak hi keini min hmangaihna leh khawngaihna vang chauh a nih zia hi hrechiang nawn ila. Chuti taka hmangaihna vanga tuar, engkim châna mangang taka au lawm lawm Lal Isua tan hian engkim tawrh ve huamin kan hmangaih let ve dawn lawm ni?

Lalpa, kraws-a i tuar natzia

Phuahtu: F.J. Crosby

Lettu: Rev. Taisena

Lalpa, kraws-a i tuar natzia,

En turin ka lo kal;

I kraws tuarna lam chu panin,

Ni tin ka lo kal e.

'Khaw nge ka Lalpa thihna chu,

Thlarau nunna tuikhur hlu chu;

Ka Chhandamtu thihna hmun chu;

Tiin ka rawn pan e.

Chu chu khawngaihna hmun a ni,

A thisen avang khan;

Ka thlarau nunna chaw a ni,

I thisen hlu luang chu.

Rinna chauhvin ka hmu thei che,

Aw Isu, Nang min hmangaihtu,

Nangmahah ka inkhengbet ang,

Ka bo thin tawh loh nan.

Tawngtaia ka beiseinain,

Aw Lalpa, ka lo kal;

Khawngaihna thuk i nih avangin,

Lalpa, ka pan ngam che.

Thawkrimte i chawlhtir dawn a,

I lawmna chan fo beiseiin;

I lallukhum chu khum turin,

Ka lo kal hnai zel e.

Kalvari tlang saw thlir teh u,

Thing anchhedawnga saw;

Ka Lalpa chu an khai kang a,

Hrehawmin a khat vel.

"Ka Pa, ka Pa," tiin a au,

"Engah nge min kalsan?" a ti;

Kan tan sawiti kauvin a tuar,

A tan kan tuar ang em?