Kal paha in sawi kha eng thu nge?

Chanchin Tha Luka ziak bung 24:17 kan chhiar chuan Emmau khaw pana kal mek thiandun te hnenah Lal Isua’n kan thupui khi a zawt a ni tih kan hre theuh awm e. Hemi chungchang hi Chanchin Tha bu dang Marka ziak 16:12,13 ah pawh tawite in kan hmu bawk a nih kha.

Emmau pana kal pahnihte hian Isua an zui thin a, Israel hnam chhanchhuaktu ni turin Lal Isua hi an beisei a. Mahse an rinloh takin Lal Isua chu kenbeha awmin a thi ta mai si a, an beidawng em em a. Chutia an innghahna leh an beisei ber Lal Isua a thi ta mai chu mak ti tak leh beidawng taka an sawi dun mek lai chuan an hnenah Lal Isua chu a inlar a; ‘Kal paha in sawi kha eng thu nge?’ tiin a zawt a nih kha.  Mahse Lal Isua chu a inthup tlat a, an hriat theih loh nan a inthup a.

Luka ziaka kan hmuh angin Kleopa te thian dun hian zawhna zawttu chu Jerusalem-a awm ve ni a an rin avangin thil awmzia hre miahlo a zawhna a lo zawt chu mak an ti hle a. Amah Lal Isua chu a ni tih an hriat theih bawk siloh avangin Ama chanchin chu hrilhin thil awmzia an hriat thiamloh em avngin Lal Isua’n a zilhhau a. Krista chuan chung thil chu tuarin ropuinaah a luh tur thu Mosia lehkhbu atanga tannin a hrilh ve ta thung a ni.

Emmau an thlen dawn hnaihah Lal Isua chu hmun hla deuha kal tur angin a lang a. Khua a lo tlai lam tawh bawk nen an hnena zanriah te kil a riak ve turin Kleopa te thian dun hian Lal Isua chu sawmin Lal Isua chuan zanriah kil vein chhang chu mal a sawm a, a phel a, an hnenah a pek hnu chuan Lal Isua ngei chu a ni tih hemi te thian dun hian an lo hre ta a nih kha. Chumi zanah la la chuan Jerusalem-ah kal nghalin Lal Isua inlar thu chu zirtirte hnenah an sawi ta a ni.

Kleopa te chanchin hi kan hre tam lo a, Johana 19:25 ah ‘Klopa’ tih kan hmu a, mi tamtakin mi thuhmun a nih an ring. Tin, Kleopa lo zawk hi a nupui a nih mai theih thu an sawi bawk a. Marka 15:40-ah chuan mari chu ‘Jakoba leh Josea nu’ a nih thu kan hmu a. Isua an khenbeh lai khan Isua nu Mari te nen Kraws bulah an ding a, Johana chuan Mari chu ‘Klopa nupui’ a tita nih kha. Klopa leh Kleopa hi mi thuhmun an nih chuan Kleopa lo zawk hi a nupui Mari a nih ngei a rinawm tiin Pathian thuzir mite chuan an sawi.

Chanchin Tha Matthaia ziak 12:34 ah chuan ‘thinlunga  khat liam chu ka in a sawi thin’ tih kan hmu a. Kleopa te thiandun pawh hian Lal Isua chanchin lo chu sawi tur dang hre lo in an sawi dun bawrh bawrh mai tih kan hmu a. Chuti taka Lal Isua chu rilru leh thinlunga vei tu an nih avang chuan Lal Isua pawh hian a hmuh hmaihin a hai der theilo a. Thlan atanga a thawhleh hnuah pawh an hnenah a inlar in Pathian fapa, thihna hneha tho leh, chatuana chhandamn a hnathawktu a nih zia kha Emmau pana kal mek te hnenah hian a puangchhuak a nih kha.

Kan tun lai khawvel changkang tawh lutuk ah hian Lal Isua hian ‘eng thu nge kan sawi?’ tih hi min zawt ve ta se; Kleopa te ang hian Lal Isua chanchin kan sawi mek thu in kan chhang ve thei ang em? Lal Isua aia thildang kan buaipui nasat em avang leh thil dang hi kan sawi nasat em avang hian kan thinlungah hian Lal Isua hian hmun a chang thei ta lo em?

Chuti anga hmun a chan theiloh a; kan ngaihtuahna leh kan rilru hi Lal Isua chanchin in hmun a chan theihloh chuan Lal Isua hi kan hnenah hian a inpuang chhuak mawh hle dawn a ni tih kan hre theuh awm e. Lal Isua hnaih chak leh kan hnena zanrah kila malsawmna min vur theihna tur khawpa thinglung khat liam neih hi kan mawhphurhna a ni tih kan hriat nawn a va tul em!

Lal Isua chanchin leng velo rilru leh thinglung, tawngka chhuak leh titi vawrh kan nih chuan Lal Isua tan kan zinga chen hi a inthlahrunawmin kan hnenah zanriah lo kil ve tur pawh hian inthlahrung takin Lal Isua hi kan lo siam reng lo maw?Kan zingah inthlahrunglo leh ngampa taka Lal Isua hi a chen ve theihna turin leh kan nun min kaihhruai tlattu a nih theih nan nang leh kei hian Lal Isua chanchin hi sawi dun fo ila; chu kan thusawi chu a tak ngei nunpuitu ni turin theihtawp chhuah ila, Lal Isua hi kan hnena cheng reng turin kan sawm tlat dawn nia.