Hmangaihna Ropui

One In Christ te chuan kumin 2019 a a an music video hmasa ber ‘Hmangaihna Ropui’ tih chu March ni 6 zanah You Tube lama en theihin an tlang zarh a. He hla hi ‘Love come Down’ tih hla, Tood Fields, Ross King, Casey Darnell leh Heath Balltzglier te phuah a niin Alvin Lalruatfela lehlin bawk a ni leh a. Alvin-a hi hla lehlin a thiamin an group hian nalh tak takin an sa thei a, tuna mi pawh hi an sa nalhin a video pawh en a nuamin a fel fai khawp mai.

He hla hi ‘Praise & Worship’ a sak chi tak niin Pathian hmangaihna ropuizia puanchhuahna hla tha tak a ni. 

Mihringte chu suala tlu, Pathian nena inzawmna tluantling nei thei tawhlo kan ni a. Kan sualna chuan mitdel ang maiin thil tha leh kawng dik zawh thei tawhlo turin min phuar a. Mahse Pathian hmangaihna tawp chin neilo chuan Lal Isua Krista kal tlangin min chhandam thu he hla chang khatna ah hian kan hmu a ni.

Pathian khawngaihna hi a hlu em em a. Chu chu Tirhkhoh Paula te pawh khan an hmu chiangin khawngaihna vanga chhandam kan nih thu kha nasa takin an sawi tih kan hre awm e. Chu Pathian khawngaihna chu Kalvari tlanga Lal Isua thihnaah chuan tihfamkima awmin nang leh kei hi chhandam kan lo nih thu he hla chang hnihna ah hian kan hmu a ni. 

Lal Isua’n vanah kan tana hmun buatsaih turin a kal thu min hrilh a. Chu hmun min buatsaih chang ve tur chuan thihna hneha thlan a thawhsan khan chiang takin a tarlang a. Chu hmun min buatsaihah chuan min hmangaihtu Pathian chu bang lova fak mawlh mawlh tur kan nih zia he hla chang thumnaah hian kan hmu a ni.

Pathian min hmangaihna chu a thukin a zau em em a; chu min hmangaihna chu Lal Isuaah a tak ngeiin kan hmu a. Chu min khawngaihna leh hmangaihna chu a thukin a ropui em em a, bang lova ban phar a fak mawlh mawlh mai tur kan lo nih zia he hla hian a tarlang chiang hle a ni.

Hmangaihna Ropui (Love come down)

Lettu: Alvin Lalruatfela

Bang lovin ka fak ang I hmanagaihna hi

Chung lama ban pharin fak hla ka sa ang

Thima ka awm laia min chhandamtu chu

Bang lovin ka fak ang I hmangaihna hi

1.      Mit del iangin ka vairuai a

Sualna kawlte’n min phuar a

Mahse Lalpa chuan min hria a

Isua Isuan min chhandam

2.      Khawngaihna thuk ka tan ahlu

Chatuana ral tawhlo turin

Ka sual min tlak Kalvariah

Isuan Isuan min chhandam

3.      In nuam ropui ka tan a awm

Chatuan fak hla rem turin

Thlan chu a ruak ta ka zalen

Isuan Isuan min chhandam