Engtin nge ni dawn?

Hmanni chu kan thiannu pakhat hian ka phone ah You Tube –a zai pakhat ‘Engtin nge ni dawn?’ tih Cassettes in an sak chu a chhuah a. A thluk leh a thu chuan ka vawikhat ngaihthlakna atang chuan min hnehin nalh ka ti nghal em em mai a. Ka phone-ah chuan Cassettes- ‘Engtin nge ni dawn?’ tih chu ka ‘download’ nghal a, hun awl ka neih chang chuan ka ngaithla nawn ta fo mai a; hei tunah pawh hian ka ngaithla mek a ni.

An hla thu a ‘simple’ in an music video fiah fai leh en nuam tak mai te, a satu aw nalh tak te chu ka rilruah a awm tlat avang chuan You Tube lamah chuan ka’n bel chiang chho a.  Music classic lam leh tunlai inchawhpawlh si a ni a. He hla 'Engtin nge ni dawn?'  pawh hi chuti ang lam thluk chu niin anmahni'n a thluk hi an siam a ni. He Official Music Video hi Zo Siam in an ‘upload’ a ni a. He thu ka ziah lai hian mi maktaduai khat aia tamin an en tawh a ni.

He hla mawi taka satu hi Hlimpuii a niin he music video ah hian Tarmit vuahin ‘model’ ah a tang nghal a. Tin, he video veka tarmit vuahlo zawk hi Hadashi a ni ve thung a, ani hi he hla a part mawi taka petu a nih thu an tarlang. You Tube ah hian Official Video nilo a an zaina te pawh hmuh tur a awm a, he hla mawi taka phuahtu hi Ramenga, Triau Trackx phuah a ni a, Zo Siam You Tube channel neitu hi a ni bawk.

Cassettes hi Lunglei lam an ni a; tun hma atanga lo inkawm ho tawh leh music te pawh lo 'play' ho thin an ni a. Tuna an Band Member te chu Hadasi Lalngaihzuali, HT Lalhlimpuii, Gabriel Lalhmangaihzuala, RK Lalrinnunga te niin an thiante dang an in puih tir ve thin bawk thu Instagram lamah min lo hrilh a, ka lawm hle. Pathian zara an dam chuan June thla velah hian Music Video pakhat siam an tum bawk a ni.  

He hla thu a kan hmuh ang hian tuemaw chuan tuemaw chu mipangngai mai leh mi satliah mai a nih zia chu hmuh hmaih hauhlo mahse ‘hmangaihna’ vang zawk chuan a tlin tawklohna leh fel tawklohna te chu hai derin; a rilru chu a luahin a vei reng mai a ni tih kan hre thei awm e. Mi fel tak leh zei tak a ni biklo cheu chungin hmangaihna leh duhna vang zawk chuan a veiin a ngai em em a; heti ringawt chuan ‘Engtin ni ang a?’ tiin a zawt lawm lawm mai a nih hi!

Ani pawh engmah a ni bikloh zia leh chhuan tur neilo, induhna tur nei bik miahlo nimahse a hmangaih leh a vei em em tan chuan engkim a lo huam lawkin hma a lo ngai em em mai a nih hi. A thinlungah chuan ro a rel tlat a; a tum loh lai pawhin a lo ngaihtuah leh veng veng zel a. Mahni chauha a awm fal hlek chuan a rilru ngaihtuahnaah chuan ‘tuemaw’ chu a ngaihtuah veng veng zel mai a nih hi!

Nilengin, zankhuain leh mumang lamah te pawh a vei ngut ngut mai si a….heti ringawt chu a ni theilo a nia…engtin nge ni dawn?...engtin nge ni dawn?....

Engtin nge ni dawn?

Satu: Cassettes
Phuahtu: Ramenga

I hmel a pangngai, i pian a mawi biklo

Mahse, ka tan i mawi ber

I fel fak bik lo, i zaidam biklo

Mahse, i zunin min phuar

Nilengin ka ngai che, zankhuain ka vei che

Ka ngai, ka vei reng che

Nangmah hi ka thupui ber leh ka vei ber i ni

Zantin nitinin, nang aia sang, duhthusam ka sam theilo

Engtin nge  ni dawn? Engtin nge ni dawn?

Chhuan tur ka neilo, engmah ka ni biklo

Mahse, i hma ka ngai

Nilengin ka ngai che, zankhuain ka vei che

Ka thinlung ro i rel

I zei fal biklo, i fing fal biklo

Mahse, i zunin min phuar