Birth Day Gift hlu ber

Ka pianchamphaah hian thilpek hlu tak tak ka dawng ve fo a; a thente chu ka phulo in man to tak tak leh anmahni pawha hlutna nei hi an ni hlawm fur. Chung ka phuloh thilpek ka dawn tawh zawng zawngte aia hlu ka a tih ber chu ka nau – ka chhang thumna – hmeichhe naupang rilru thianghlim takin mi pek hi a ni.

January ni 31 hi ka ‘Birth Day’ a ni a. Zing karah ka nau chuan phone ah mi n lo bia in present min pek duh thu min lo hrilh a. Chhun lamah hna ka thawh avangin zan lam ah chuan ka thiante leh ka chhungte’n lawmpuina chibai min buk rualin thilpek hlu tak tak min pe a. Chocolate te, thil fun lian tak tak te chu min pe in kan hawng a, hlim takin kan nui dar dar a. Ka nau thilpek chu hawn kan tum lai chuan ‘A u…kha kha chu nakinah I hawng daw nia’ a lo ti zauh a, kan hawng ta hrih lo a.

Kan thiante nen sitting room a kan thut laiin ka nau chu ka bulah lo kalin ka tana present min pek chu ka thiante awm loh hunah keimah chauha ka awm hun hawng turin nui sen sen in min lo hrilh a. Ka hnuk a ti ulh reuhin ka lainat ang reng hle a. Mi dang in thilpek hlu tak tak min pek te kha  a hmuh avangin mi awm lai chuan hawn a duhlo tih ka hre thiam mai.

Nitin sikul an kalna ah hian ka nu in pawisa – bus fare tur hi cheng sawm emaw hi a pe ziah a. Ka Birth Day present min pek a duh em avang chuan haw lamah ke a haw in cheng nga in ka ta tur liau liau present leina atan bus fare tur chu hmang phallo thil eng emaw a lo lei a. Chu a thil lei chu ka hawn chuan sweet – Kool – panga hi a lo awm reuh a. Amahin min hrilh dan chuan cheng 5 man tawp a lei chuan sweet pakhat chauh a ni dawn si a. Chuvangin sweet  panga kha min pek a duh avangin ‘Kool’ khi min lo lei sak a. ‘Happy Birth Day’ tih ziah sak min tum thu leh a ziah tak loh thu te chu min hrilh a.

Khawvelah hian sum hmangin thil ropui tak tak leh hlu tak tak hi a lei theih tih hi ka hria a. Mahse thinlung chhungril ber tanga ‘Hmangaihna’ erawh hi chu sum hian a leih theih ngailoh a, sum hmanga a hlutna hi teh theih a nih lohzia ka hriatchian phah hle.

Cheng nga man- Kool panga , Bus chuanglo a ke a haw phah hial khawpa min leisak duhtu thinlung atang chhuak hmangaihna hi engtikahmah ka rul zo lo ang. Hei tluka Birth Day Gift hlu hi ka dawng leh tawh ngai lo ang.

Heti taka min hmangaihtu min pek vang hian - ka lawm e Lalpa.

(Kan thiannu Ruati Birth Day pualin)