Vanram Ropuiah

Mizoram Synod Choir (2018-2020) te'n an conductor ni mek T. Laldintluanga hla phuah an sak 'Vanram Ropuiah' tih hi tun laia Pathianin a hman leh khawhar in lamah pawh sak hlawh ber a ni mek tih kan hre ṭheuh awm e.

He hla ropui tak mai hi September 13, 2018 ah an release niin Synod Choir thar (2018-2020) te'n official a an hla tihchhuah hmasak ber a ni a. Kan sawi tak ang khan he hla hi Pathianin a hmang a, Mizoram pumah hriat a hlawhin Kohhran hrang hrang zaipawl in an sa tawhin khawhar in ah pawh sak hlawh ber pawl a ni.

He hla ropui tak phuahtu T. Laldintluanga hi he hla a phuah dan ka va zawt a, heti ang hian min lo hrilh in a chungah ka lawm hle.

"He hla hi Kum 2017 April thla a ka phuah a niiin he hla pian tan na hi Synod Choir hla zirna kalkawng a ni ve tlat a. Mimal a harsatna neuh neuh nei chungin nidang ang lo takin phur vak lo hian Kan veng Ramhlun North atangin kan hlazirna hmun panin ka scooty in ka tlan phei a. Kawng chanve vel ka tlan tawh maithei e. He hla thunawn tawp lam

'Hmangaih vanga ka Lal hmel hliam hnu kha, Lawmna mittui far chungin ka kuangkuah ang' tih lai hi ka rilru ah a rawn lut ta thut mai a. A thluk, tuna mi chiah hi ka rilru ah awm tel nghal in helai chauh hi ka rilru chuan ka sa phei ta a,Vanram ka ngai ta em em mai a.

"Tichuan kan hla zirna hmun ka thlen chuan a chang khatna leh thuawn a ka rilru a awm ho te chu ka theihnghilh hman hlauvin ka phone ah mi hriat hlau takin a rukin ka record ta a. Chumi kar tluan chuan ka rilru ah vanram ringawt mai chu rilru ah a awm tak avangin remchang hmasa bera hla a tana siam chhunzawm ka rilruk ta a. Ti hian kan chhunzawm leh ta a- 'Theihtawka rawngbawl a kawngdik zawh tum pawhin,

Sawichhiatna, mualphona a lo thlenga; Ka chhungril a rum thin,

I rawngbawl a har fo thin, Chawlhna nuam vanram khi ka ngai zual thin' tiin kan phuah

chhunzawm leh a.

'Ka hun tawn tawh te ka chhui let ta a. Theihtawp chhuah a rawng ka bawl ve lai te, ka chet fuh ve riau lai te, thleng sang ve viau emaw, che mawi tawk ve viau a ka inngaih lai a leh lam atanga sawichhiatna leh mualphona lo thleng thin te, rawngbawlna phat duh rum rum na khawpa mimal leh chhungkua a harsatna ka tawh te kha a va han na thin tak e aw. Mahse a lo va hlu si em. Thlen hmabak vanram ka thlir fo theih nana Pathian remruat a nih ka lo pawm thiam ve ta. 

"Synod choir ka tel tirh phat a in luah tur zawnga mangang taka chhungkua kan awm lai te, ka nu leh pa te hun inhnaih te te ah damlohna an han tawk ve a. Mahse heng harsatna zawng zawng te hi Pathian min ngaih zual tir tu, vanram thlen min ti nghakhlel tu tur hmanrua an lo ni reng si.

"Rawngbawlna kawngah pawh Lalpa chhiahhlawh, chet that chang nei, chet fuhloh chang pawh nei fo thei, mi fak leh fak loh a danglam mai mai tur ka lo nih loh zia te ka man thiam ve ta a, min ti lawm thar em em a ni. a chang tawp ber atan chuan-'Vanah khian ringtute kan parvul ve anga, min hruai dawn kawngkhar mawi khi kan pan ang,

Ka chan tur ka dawn thin, thlarauvin ka temlawk thin, rinna in chu hmun chu ka thlir fo thin' tiin kan phuah chhunzawm leh a.

"Ringtute hian vanah chauh nilo leiah pawh vanram kan lo tem lawk thei a. Malsawmna pawh engemaw chen chu Pathian zarah kan dawng ve thin. Mahsela kan parvul tak tak na hmun tur leh malsawmna leh thiltha zawng zawng, chawimawina lallukhum kan khum ve na hmun tur erawh vanram khi a ni tih te rilruah a lo lang a. Chu hmun nuam, kan parvul ve na hmun tur chu ka suangtuah a, thlarauvin a nawmna leh ropuina chu ka tem lawk hial thin. Khawvel hlimna aia ropui leh nuam zawk vanram ah khian a awm ngei a ni tih rinna he hla ka phuah atang hian ka nei thar nasa ve hel in ka inhria a, min ti lawm em em a ni.

"Chu hmun kan thlen hun chuan chhandamtu’n min lo hmuak ang a, lungngaih, natna, thihna vang ni tawh lovin lawma vang zawka mittui far chungin a mah ngei chu kan la hmachhawn ngei dawn a ni, tih ring chung leh beisei chungin he hla hi kan lo phuah chhuak ta a ni."

He hla phuahtuin a sawi ang hian Ringtute hian kan hun tawn ah harsatna  tamtak kan paltlang a ngai a. Thihna te, sawichhiatna leh lungngaihna te'n nasa takin min lo tibuai thin a. Mahse Vanram kan thlen hunah erawh chuan Lal Isua, min hmangaih vanga hliam leh thihna hial tawk kha lawm chunga mittui tla in kan la kuangkuah dawn a. Chu Vanram Ropui thleng tur chuan kan theih tawp chhuah in ke i pen zel ang u.

VANRAM ROPUIAH

Phuahtu: T. Laldintluanga

Satu: Mizoram Synod Choir

1.Zinkawng khawharah hian lungngaih leh natna te,

Manganna chungpikna a lo thlen in;

Ka zam thin, ka buai thin, ka mittui a luang fo thin;

Thlen hmabak Vanram khi ka ngai zual thin.

Vanram ropuiah chhandamtu’n min lo hmuak ang,

A kiangah tlansa ten an fak ning lo’ng.

Hmangaih vanga ka Lal hmel hliam hnu kha;

Lawmna mittui far chungin ka kuangkuah ang.

2.Theihtawka rawngbawl a kawngdik zawh tum pawh in,

Sawichhiatna, mualphona a lo thleng a.

Ka chhungril a rum thin, i rawngbawl a har fo thin;

Chawlhna nuam Vanram khi ka ngai zual thin.

3.Vanah khian ringtute kan parvul ve anga;

Min hruai dawn kawngkhar mawi chu kan pan ang.

Ka chan tur ka dawn thin, thlarauvin ka temlawk thin;

Rinnain chu hmun chu ka thlir fo thin.

Link: https://youtu.be/wdrMq2t0lCI