Rawngbawltu tlawm

Text: Philippi 2: 6-7.

Thuthlung Thar Theologian ropui ber Tirhkoh Paula chuan Philippi khua a mite hnena lehkha a thawn bung 2:6-7 ah khan Lal Isua hi rawng kan bawlna kawngah kan entawn tur a nih thu uar taka sawiin min fuih a nih kha. Tun lai khawvela Lal Isua rawngbawltute hi  kan tlawm tawk em tih hi zawhna pawimawh tak leh kan inzawh nawn fo tur a ni ngei ang.

Paula hian Philippi mite hnena lehkha a thawn lai hian Lung In –ah a tang mek a, rorlenaah thiamloh a chan chuan tihhlum mai theih a ni a, thiam a chan erawh chuan chhuah zalen theih a ni thung a. Lung in atanga a chhuah theih hlauh chuan Phillipi kohhran hi tlawh a tum tih kan hmu a, Europe rama Paula Kohhran din hmasak ber khua an nih avngin a ngaipawimawh hle a ni.

He lai Bible chang kan tarlan a  ‘amah leh amah a intitlawm ta zawk a’ tih a ‘tlawm’ hi a tawng bul lamah chuan ‘kenosis (κένωσις) tih a ni a, ‘intiruak/inbunruak’ ti pawhin a sawi theih a. Lal Isua chu kan tana chhandamna hna thawk turin Pathian fapa a nihna te, mihringte aia pawh ropui zawk leh Pathian a nihna te chu kalsan a mahni inbunruak a intitlawmin kan tan chhandamna hna thawktu ni turin khawvelah a pa Pathian thu awih a lo kal a nih zia Paula hian min hrilh a tum a, chu a thiltih chu keini ringtute pawh hian entawn ve turin min chah nghal a ni.

Pastor, Upa leh rawngbawltute zingah inngaitlawm lo leh inbunruak lo, an enkawl mek te tan pawh a biak ngamloh khawpa in ngaihlu leh in dah sang kan awm a nih chuan a pawi hle ang. Kan thiamna leh kan finna te hmachhuana rawngbawl kan tum chuan reilote ah keimahni leh kan rawngbawlsakte tan buaina leh harsatna thlentu kan ni ang a, kan rawngbawlna hian malsawmna a keng tel thei ngailo ang.  

Tunlai khawvel changkang tawh takah hian kan in leh lo, kan incheina leh kan hmanrua te chu a changkangin khawvel ramchangkang ber ber te hman ang thil (technology) chu kan kutah a awm a, kan hmang ve zel tawh a nih hi. Heng te hi kan doldal tur a nilo a, thiam tak leh tangkai taka kan hman hi kan tihtur zawk a ni. Chuti ang khawvelah kan awm mek tawh avang chuan keini Kristiante pawhin kan rawngbawlna atan heng hmawnraw changkang ber ber leh tha ber ber te hi kan hmang mek a, a lawmawm hle.

Chutih rual erawh chuan heng kan thil neihte hmachhuana heti lam ringawt a rilru kan pek a, inngaihtlawmna leh mahni inphat chunga Lal Isua rawng kan bawllo a nih erawh chuan kan hah thlawn ang tih a hlauhawm hle. Biak In tha leh ropui, Zaipawl changkang leh hla sa thiam, Kohhran Upa leh rawngbawltu lehkhathiam, Kohhran Thalai hruaitu fing leh fel, Kohhran nu leh pa ah pawh hruaitu lehkhathiam leh fing,  Pastor thiamna sang ber ber nei kan nih tawh nuk lai hian kan rawngbawl chhan ber Lal Isua inngaihtlawmna leh a inbunruahna nun hi kan tawm pui em tih hi inzawt nawn fo ang u.   

Kan entawn ber Lal Isua khan engtin nge rawng a bawl thin tih hi kan zirchian nawn a kan rawngbawlna ah a hnungzuitu kan nih hi a ngai. Lal Isua hun lai khawvela khawtlang leh mipuiin engahmah an ngaih lem loh hmeichhia, phar, ramhuaizawl, naupangte leh kraws a an khenbeh te ngei pawh khan Lal Isua hi tunge a nih an hrechiangin a lakah damna famkim an beisei ngam a. Chu an beiseina chu Lal Isua pawh khan a ti thlawnlo tih kan hriat kha.

Keini vawiina Lal Isua hnungzuia a rawngbawltu ni mekte hi – khawtlang, ram leh hnam pawhin misual nia an hriat te hian kan nunah Lal Isua an hmu em? Kan rawngbawlsak Lal Isua hriatchian duhna leh belhchian duhna an nei em? Mite biak phakloh khawpa rawngbawltu ropui, lar leh lang sar, Lal Isua aia keimahni zawk langsar kan nih chuan kan in enfiah a ‘kenosis-mahni inbunruak’ a rawngbawltu nitur a bul kan tan that hi kan tihtur a ni.

Mission field a thawk mekte pawhin kan chenna ram lei lung leh a mi chengte zira kan inphahniama Lal Isua ang a mahni inphat chung leh tlawm chunga rawng bawl hi kan tih tur a ni. Lal Isua nun tawmpuitu leh Chanchin Tha kengtu kan nih ang ngeiin an mahni nun dan mila Lal Isua nihna leh Lal Isua rawngbawlna chu kan nun a kan lanchhuah tir hi kan ‘mission’ diktak a nih zia hre nawn ang u.

A chanchin kan puan darh mek leh rawng kan bawlsak mek Lal Isua hi ropuina te, chawimawina leh Pathian a nihna ropui lutuk te thlahlel zolo a kan tana inngaihtlawmna leh inbunruak veka keimahni ang maia awma kan tana chhandamna hna thawk a nih zia hi hre thar ila, chuti ang chuan Lal Isua hnungzuiin tlawmna leh mahni inphata inbunruak chungin rawng i bawl zel ang u.