Min Hruai Rawh

Mizoram Synod Choir (2008-2010) in Rev. Remlalfaka Pathian hla lehlin ‘Min Hruai Rawh’ (Lord, Lead Me On) tih hla hi kum 2019 kum bul tanna hla ah i’n hmang teh ang. He hla hi kan sawi tak ang khan Mizoram Synod Choir te’n kum 2010 a ‘Pathian Hmel’ Music Video ah khan an telh a. He hla chungchang hi a lettu Rev. Remlafaka leh hetih hun laia Synod Choir Conductor K. Lalbiakthanga te chu phone in ka va zawt a, anni’n min lo hrilh chiang a, an chungah ka lawm hle.

He hla hi kan sawi tak ang khan ‘Lord, Lead Me On’ tih hla lehlin a ni a, a phuahtu chu Marion W. Easterling a ni a. Kum 1910, March 12 ah Alabama ah lo piangin December 10, 1989 ah a boral a. Hla 300 chuang zet a phuah a. Guiness Book of World Records a chuang pha khawp a hla phuah thiam niin ‘America’s Favorites’ tih WLKF Radio Station ah kum 39 zet rawngbawlna a kalpui a ni.

  

Mihring kan nih chhungin harsatna leh buaina, lungngaihna leh thihna kan tawk thin a.Chuti ang hunah pawh chuan Pathian hi min hruaitu ni tur a ko fan fan a ring tlat turin he hla phuahtu hian min duh a. Chung harsatna leh lunngaihna karah pawh chuan Pathian chu fak tlat tur leh Ama lawmtlak nun nei tur a zui tlat turin kan inbuatsaih a ngai a ni. 

Nitina nun kan hmanna ah Pathian duh zawng leh lawmtlak chu zawng fan fan turin kan nih zia he hla hian a tarlang chiang a. Khawvela kan thiante leh midangte’n min phatsan chang te, an tih dan zuia nung ve mai lo tur leh sual kawng zawh lo tur a min tanpui turin Pathian chu kan au tlat tur a ni tih he hla ah hian kan hmu chiang hle awm e.

Lungngaihna leh manganna vawrtawp a lo thlen chang te, kan duhberte leh kan hmangaih ber te’n khawvel an chhuahsan lai te leh engkim mai hi chuai ta vek a kan hriat lai – rinhlelhna in nasa taka min bawhbuai lai pawhin Pathian chu rinchhan tlat tur leh min hruaitu ni tlat tur a koh fan fan a rinchhan tlat hi kan tih tur a ni. Chu chu Vanram kan thlen thlenga kan tih tur a ni.

Kan kum te lo tam in kan chakna leh vanglai te pawh a lo chuai chho zel a. Chuti ang a khawvel a kan hun tawp lam kan hman chhoh mek lai pawh chuan Pathian chuan min kalsan ve ngailo a. Van hmun kan tana a buatsaih chu kan hnaih telh telh zawk a, chu hmun thleng ngei tur chuan Ani chuan min kaiin min hruai tlat dawn a, a va lawmawm em!

Engkima Pathian hruaina leh awmpuina chang tlat turin keimahni inbuatsaih chungin he kum thar hi i hmang ang u.

Min hruai rawh 

Lettu: Rev.Remlalfaka

Satu: Mizoram Synod Choir

Lamtluang thui leh thim hnuaiah mangang a ka thut laiin,

Min kai ang che, Lalpa duh tak;

Nun thianghlim mi neih tirin fak thinlung mi neih tir la,

Min hruai zel rawh, englai pawh in.

Aw, min hruai rawh, englai pawh in,

Kawng thianghlim chu zawh ka duh e;

Khawvel thian ten min phat mahse,

Kan ngen a che min hruai zel rawh.

Rinhlelh, buaina ramah parmawi vul te an chuai thin,

Min kai ang che, Lalpa duhtak;

Nang i ni ka rin chhan ber van in nuam ka thlen thleng in,

Min hruai zel rawh, englai pawh in.

Vanglaini te lo chuai in ka chakna te lo kiam se,

Min kai ang che, Lalpa duhtak;

Kal san in ka awm ngai lo'ng van hmun nuam ka thleng ngei dawn,

Min hruai zel rawh, englai pawh in.