A hminga Aizawl khawpui lama lehkha zira awmbo ta nafam chuan mahni khawlama kum tawp Krismas chawlh nghahhlelh a na duh ang reng phian a. Chuvang chuan chawlh a nih ve leh hmahmawh takin mahni khawlam pan in kan haw ta chuk chuk kha a ni a. Mahni khawlama lenna tur leh thiante tlawha Lunglei kal te kan ‘dream’ nasat teh lul nen chhungte’n Vanglaini chanchinbu chu ka sem turin ka kut ah an dah nghal hmaka a, anmahni chu an han zin bo ta daih a nih kha!
Vanglaini hi kan sem ve hma chuan keini chuan kan lak ve phakloh a vangin mi in ah kan chhiar thin a. Kan khuaah tlai lam ah lo thlengin kan u te Vanglaini lak kha kan va chhiar ziah a. Internet kan khawih ve theih hma phei kha chuan Infiamna chanchin thar phei kha chu Vanglaini hi kan ‘BBC’ bur a nih kha!
Lunglei a pawl 11 leh 12 kan zir ve lai te khan kan chhungte in ah tlai lam Bus chan pah hian Vanglaini kha kan chhiar tluk tluk zel a. Tin, kan khuaa Vanglaini Agent ni thin te in a kan len tum te chuan kar khat chhung chhuak Vanglaini kha kan chhiar vek zel a, kan nula rim pawh kha kan ngaihsak chang meuh lo!
Hei tunah pawh December ni 20 hma chuan khawiahmah kal hman lo in zing lam dar 8 vel tangin kan khuaah Vanglaini chu ka’n sem ta zak zak a! Mahni khuaah kan lo awm mumallo ve nen – kan hmelhriatte tlawh chhuah pahna hun rem chang tak a ni a. Tin kan tleirawl ve deuh laia kan lo ‘star’ em em; an in a kan len ngam siloh te kha Vanglaini sem pah in kan han tlawh pah thei a, a zia phian mai!
Vanglaini hi sem ta lo ila a hran in ka thlawchhuak hmanin ka peih pawh ka ring lo a. Sikul kan kalpui thin te, kan chhungkhat te, kan ‘ex’ te, kan Pastor te, kan zirtirtu hlui te leh mi dangte chu tihian nitin in ka tlawh kual ta zar zar a; Krismas chawlh ka hman tawh ah chuan kumin hi ka la hman that ber leh ka hlawkpui ber tum a ni dawn a, ka lawm hle.
Hetia Vanglaini agent te kan lo nih ve hnu ah hi chuan mi in ah inthlahrung takin chhiar a ngai tawh lo a. Mahni in ah thlamuang tak leh rilru pe takin kan chhiar thei tawh a. Ngaihnawm kan tih lai leh tha kan tih lai te chu kan chhiar nawnin kan dah tha ta zel thei a, a lawmawm hle. Kum 2011 chho velah te chuan Vanglaini a thuziak rotling leh dahthat tlak tak te kha a neitute a copy kan dil thin a, tunah erawh chuan mahni ta ngei a lo ni ve ta a, kan lawm hle.
Keima mimal tak phei hi chuan mihring ka teh ve na ah an chhungkua in chanchinbu eng emaw tal an la em tih hi a ni thin a. Vanglaini chanchinbu an lak ngat phei hi chuan chhungkaw zahawmna ang hial ah ka ngai ve thin! Khawtlanga pa rawn kai leh dinhmun tha ve tak ni a kan ngaihin chanchinbu an chhiar ngailo emaw an la ngailo emaw a nih chuan a kimlo deuh huih hian ka hre thin. Chhungkaw dinhmun in a zirloh avanga chanchinbu la theilo te erawh chu thuhran daih an ni.
Hetia Vanglaini kan sem avanga sum leh paia hlawkna kan hmuh te hi kan chhungkaw tan chuan a hlu em em a. Kum tluan a kan lehkha zirna tur pawisa te kan lo neih ve phah a, kan chhungkaw tan chuan a hlu hle. Keima mimal tak phei chuan sum leh paia hlawkna ngawr ngawr aiin heti ang a chanchinbu a thlawna kan chhiar thei hi ka lawmna ber chu a ni zawk mah!
Krismas chawlh chu Vanglaini semin kumin bikah chuan ka hmang tluan dawn a ni hmel ta a. Chanchinbu ngaihlu tak mi ka nih ve avangin kan khuuaah Vanglaini sem tur a lo thlen ve leh ah hian hmahmawh takin ka sem chhuak char char thin a. Chanchinbu la tute hian lo hmu hma se la, lo chhiar ve vat vat zel se tih hi ka duhthusam ber a ni thin. Amaherawh chu ke a kal chunga sem kan nih avang erawh chuan a kan duthusam ang tak erawh hi chuan kan sem chhuak rang lo thin zawk.
Vanglaini chanchinbu la zawng zawngte Krismas chibai ka buk che u a. Hlim leh lawm taka he hun lawmawm hi hmang theuh turin Vanglaini chhiartu te zawng zawng duhsakna sang ber ka hlan a che u.
Comments
Post a Comment