Krismas a lo thlen hian Mizote chuan Rokunga(1914-1969) hlutzia hi kan hre chhuak nawn fo thin a nih hi! Krismas vuakvet ah hla kan sak tam ber chu Rokunga hla te hi an ni tih kan hre theuh ang a. A hla phuah thiam zia leh Zofate tana a hlutzia hi chu kan sawi seng lo ang a; Krismas hla a phuah zinga thalaite sak hlawh ber pakhat chu Kristian Hla Bu no-117 a ‘Hmanah Kaisar lal lian rengpui’ tih hi a ni ngei ang. He hla hi ziathiam hrang hrangte pawhin an sa in tunlaiah chuan Zoramchhani sak hi ngaihtlak zin hlawh pawl tak a nih a rinawm. He hla hi Chanchin Tha Luka ziak bung hnihna tir lam behchhan hian a phuah a ni tih kan hre thei awm e.

He hla changkhatna a kan hmuh ang hian Kaisara chuan Lal Isua pian dawn lai vel hian chhiarpui a neiin Josepha te chhungkua pawh Bethlehem hming ziakturin a nupui Mari nen chuan an kal a ni tih kan hriat kha. Mahse vanduaithlak takin kualbuk an chan ve takloh vangin Mari chuan ran in tlawm tak mai chu rai teuh chungin a bel a ni tih kan hmu a.

Chang hnihna ah hian he hla phuahtu hian khualbuk vengtu chu zawhna zawtin – Lei leh van lal, khawvel chhandamna lo thlen tu tur i hnawl mai hi i ui lo em ni ti a zawtin Lal Isua a hnawl ta mai chu pawi a tih thu a tarlang a nih kha.

 Chang thumna ah hian Rokunga hla phuah thiam zia lo lang in – Lal Isua chu kan thinlung ah lo thlen a duh zia leh min nghah reng thu a tarlang a. I thinlungah lo lutin i hnenah hian ka lo cham in ka lo awm thei ang em tiin Isua’n min dil lawm lawm thu a tarlang a ni.

He hla chang tawp berah hian Khualbuk vengtu chu mi chi hrang hrang – khual khua atanga lo kal te’n an bawhbuai reng angin sual hian kan thinlung hi a tibuai reng thin a ni tih kan hmu a. 

Chuti ang taka mihring thinglung – khawvel lal Kaisara’n ro a relna ah chuan Lal Isua chu Bethlehem a a lo piang ang khan ranthleng nen chuan kan thinlungah chuan lo piang a lo cheng reng turin a sawm lawm lawm a nih hi!

Hmanah Kaisar lal lian rengpui

Phuahtu: Rokunga

Hmanah Kaisar lallian rengpui lallai nieng hnuaiah,

An hril vanhnuai khuavel chhiarpui hmingthang;
Chhingkhual mipui pungkhawm zingah Marin riahrun a chang ve lo,

Bawng in runpui a bel.

Khualbuk vengtu i ui lawm ni tlantu mualliam tur chu,

Amah vanga khuavel dam theih na kha;

Khualbuk vengtu suihlung mawl in vanlalrengpui ka lungdamna,

Puan ang a hnawl ta e.

A liam silo khardan hliap an chhingkhual a ding reng e,
Ngaiteh kawngkhar bulah ka lo ding e;
I chhungah ka lo lut ange i thinlung kawng min lo hawn rawh,
Tiin min dil fo thin.

Khualbuk vengtu ang mai ka ni sualin min bawm reng e,
Ka thinlung ram Kaisar lal na ah hian;
Bethlehem tlangpui rawn din la i tan ranthleng rawn hung leh la,
Tahchuang lo cheng ang che.