Politician te hi i ngaisanglo emaw, Politics hrim hrim hi i ngaihvenlo pawh a ni thei a. Mahse mihring kan nih chhung chuan ram rorelna – politics hi kan pumpelh theilo. Ram inrelbawlna chuan nghawng tam tak a nei a. Nang leh kei pawh hi min nghawng a, kan ram politics hian kan rinna - sakhua thlengin a nghawng a ni tih hi thudik a ni.
Ram hruaitu kan thlanchhuahte a zirin kan ram hmasawnna chu a innghat a ni tih hi chu kan hre vek a. Kan rama Sorkarna lo siam tawh thin te leh a siam mek te’n kan ramah hmasawnna an thlen dan pawh Politics ngaihven a piangte hian kan hre chiang awm e. Kan ram hruaitute an duhkhawp lohna te, an that tawklohna leh kan beidawnna te pawh vawi tamtak kan au chhuahpuiin kan ti lang thin.
Hriatthiam harsa ta ber chu mitha leh rintlak nia kan hriat kan thlang duh leh silo hi a ni. Kan ram hruaitu tur te hi Kohhran Upa inthlan anga mi fel leh tha kan thlang chhuak duh leh tlat lo hi enge chhan nita ang? Candidate zingah hian mi tha leh fel tak tak te awm mahse an tlin zawh kan rinloh tlat avangin party liansa candidate – a thatna sawi belh tur kan hriat tawh chuanloh te hi kan vote tling leh zel a. Hmasawnna hi kan duh tak tak em?
Tunah tak hi chuan thalaite leh mipui tamtak hi kan ram rorelna ah hian kan beidawng in kan tuihal tawh a. Thil thar, thil danglam leh tha hi kan duh tawh tih a lang – PRISM leh ZPM party lo din chhuah atang chu chu chiang takin kan hre thei awm e. Social Media velah pawh heng party thar pahihnih te chuanga beiseina leh rinna nghat hi chu thalai tam zawk an ni tih a hriat a. A sawiseltute hi pawh Party lian sa bechhan leh an tlin zawh ringlo te an ni.
Mi tamtak hian heng party thar pahnihte candidate tur te tha tiin fak hle mahse an tlinzawh tak tak an rinloh avang hian an thlang leh lo fo a. An nin leh an sel te bawk thuneihna an pe leh zel thin.
Kum 2018 Inthlanpui kan hmachhawn leh ang a, chutah chuan kan ram kum 5 lo la awm tura rorelna hi tute kut ah nge kan pek ang? An tlinzawh kan rinloh mi thar leh thate hi hnawl in mi thalo tih kan hriatchian te bawk hi emni hruaitu atan kan thlan leh dawn? Heti anga kan inthlakdanglam duhlo a kan kal zel a nih chuan atawp ah hian beidawnna thuk takah kan ram hi a la lut ngei dawn a ni – a lut mek bawk a.
Kan rama Sorkarna lo chelh tawhte kan sawiselin kan diram ta ngawr ngawr a ni lo a. Mahse an theih chin leh an thiltih tawh te kan hmu in kan hria a, kan beidawng tlang chu a ni tiraw? Tun hun chiah hi beiseina thar nei leh tura hma kan lakna tur hun chu a ni. Thil thalo leh diklo hrethiamlo khawpa hnam chut chu kan nilo. A bikin Mizo thalaite hi thil thar hria – phone changkang leh version thar leh tha ber ber hriaa hmnag pha, Computer/Laptop pawh a chhuak thar ber ber hria a hmang thei khawp a changkang kan ni a. Chuvangin kan ram tlu chhe mek hi chhanchhuak leh tur hian kan ram han hmanraw thar leh tha a mamawh a ni tih hi kan hriat a tul a ni.
Vawiina kan Mizo thalai te hi MNF /Congress beia PRISM/ZPM thang turin kan insawm lo a. Kan ram hian hmelthar a neih a, ram inrelbawlna tha zawk a neih ve tawhna turin kan rilru ngaihtuahna hmangin inthlan hmachhawn ang u tiin kan insawm a ni. Politics va tuichilh a va atchilh bur a ngailo. Zalenna kan neih angin kan ram tana tah ber tur hruaitu kan duh thlanchhuah hi kan tihtur a ni tawh zawk.
Kan ngaihzawng/nupui pasal kan thlanna tur ah kan fimkhurin kan tan a thaber tur kan thlang thin ang hian kan ram hi kan hmangaih a nih chuan a lantirna awlsam ber leh pawimawh ber si kan vote thlak kha a nih kha. Tun hi nang leh keiin Mizoram tha zawk kan neihna tura kan hun rangkachak a ni tih hria in ‘change’ thlen tir ang aw?
Comments
Post a Comment