Tawngtai Theihnghilh Suh

“Bible kan chhiarin Pathianin min bia a, kan tawngtaiin Pathian kan bia” an lo thin a, a dik hle. Pathian rawngbawltu hlawhtling tak tak, khawvel pum huap pawh a Pathianin a hman te hi tawngtai nasa leh Bible chhiar nasa te an ni.

Mary Ann Pepper Kidder-i chuan tawngtai pawimawhzia hi a hmuchiangin kum 1876 ah khan tawngtai theihnghilhlo tur a min fuihna hla tha tak mai  ‘Did You Think to Pray?’ chu a lo phuah tawh a. A thluk hi William Oscar Perkins chuan a siamsak a ni.

He hla hi khawvel pumah a lar a. Mizo tawngin Rev. Lal Rinmawia, Mizoram Synod Moderator te pawh lo ni tawh chuan min lehlinsakin Vohbik in nung leh nalh takin an sa a nih kha. Vohbik ziathiam zia leh an rawngbawlna te chu sawi ngailo in kan hre vek awm e.

He hla changkhatna hi Sam 5:3-a Davida tawngtaina behchhan in bul tan a ni a. Tawngtai hi vanram nen a kan inzawmna tur a thil pawimawh ber a ni a. Chuvangin zing kan thawh veleh tawngtaia Pathian hnena inkawltirin bul kan tur a ni tiin min fuih a ni.

Lal Isua chuan beidawng lova tawngtai fo turin min duh a, tehkhin thute pawh a sawi a nih kha. (Lk 18:1)Tin 1 Thessalonika 5:17 ah chuan bang lova tawngtai turin kan nih thu kan hmu bawk a. englai pawhin tawngtaina chu Pathian hnenah kan thlenin thahnemngai takin in kan dil ang a, kan ngaihven tur a ni (Ephesi 6:18).

Thlemna leh harsatna kan tawh lai te hian tawngtaina hi kan hmanraw pawimawh ber leh a awm chhun a ni a.  Thinrimna midang chungah kan neih lai te hian tawngtaina hi kan thinrim rehna tur leh mi dangte ngaidam thei tura min puitu a nih zia he hla phuahtu hian min hrilh chiang hle a ni.  

A hla chang tawp berah hian Gilead thinghnai damdawi  chu tawngtaina nen a lo tehkhin a. Gilead chu Jordan chhak lamah a awm leh thinghnai damdawi an neih avangin an lar hle a nih kha (Gen 37:25, Jer 46:11). Chuti ang chiah chuan kan nunah harsatna, hreawmna, tisa leh thlarauah damlohna kan nei a nih pawhin tawngtaina chu thlahthlam lo a ti tlat tur kan nih zia he hla phuahtu hian min hrilh a ni.

Tawngtai Theihnghilh Suh

(Ere you left your room this morning)

Lettu: Rev. Lal Rinmawia

Satu: Vohbik

I pindan I chhuahsan hmain

I tawngtai ngai em

Krista kan chhandamtu hmingin

A hmangaih enkawlna ngenin

I himna  turin

Tawngtaiin chaklo a pui thin

Zan chhunah a chantir ang

I nun thim leh harsa kar ah

Tawngtai theihngjilh suh

Thlemna harsa I tawh laiin

I tawngtai ngai em

Nun pek hmangaih ropui zarah

Thlarau Thianghlim I nei tawh em

I hruaitu atan

Thinrimna nasa I neihin

I tawngtai ngai em

A khawngaihna I dil thin em

Mi dangte I ngaihdam theih nan

I kawng dal tute

Fiahna nasa I tawh laiin

I tawngtai ngai em

Lungngaih mangan buaina karah

Gilead damdawi I hmang ngai em

Vawiin ni atan