Silfaina

 

Aizawl West II Presbytery vawi - 4 hmanga Tanhril Vengthar Kohhrana kan kal tumin Luangmual Vengthlang Kohhran Zaipawl te chuan Rev. Remlalfaka, MTC a ziritirtu ni mek Pathian hla phuah ‘Silfaina’ tih kha an lo sa a. He hla hi Mizoram Synod Choir te pawhin nalh takin an sa a ni tih kan hriat kha. Luangmal Vengthlang Kohhran Zaipawlte sak chuan ka rilru a hneh thar em avaangin he thu hi ka ziak a ni.

 

Rev. Remlafaka Pathian hla phuah leh siam thiam zia te, Pathianin a hman zia te chu sawi ngailo kan hriatsa vek a ni a. He hla ‘Silfiana’ tih pawh hi chang 2 chauh a ni na in Mizoram pumah a lar chhuak a, mi tamtak thlarau nun chawmtu hla tha leh ropui tak a nih kha.

 

Ngun taka kan ngaihtuah chuan Lal Isua thisen hlut zia hi a mak in a ropui tawlh tawlh a. He thisen hlu tak mai hi ram tina puangchhuak a, a hlut zia hi la hre velo te hnenah sawi mawlh mawlh tur kan nih zia he hla phuahtu hian a hmu chiang hle a. Thisen satliah nilo in thiltihtheihna, chatuana nunna kengtel Lal Isua thisen a nih zia hi uar tawk awmlo a puangchhuak tur kan lo ni.

 

Misual tawmkailo leh chatuana boral mai tur chu Lal Isua thisen hlu tak chuan a thlawn liau liauin min silfai a. Chu thisen hlu tak Kalvari a luangchhuak chu hriatloh atan leh hnawl atan chuan pamhai lutuk a.  Chuvangin Lal Isua thisen – thiltihtheihna leh chatuan nunna – hi lawm chunga puangchhuakin ram tinah i hril dar ang u.

 

 

SILFAINA

Phuahu: Rev. Remlalfaka
Satu: Mizoram Synod Choir

Thisen hlu, Kraws thisen,
Chu thisen chu sang tam tak tan damna a ni;
Aw ava han lawmawm em,
Mitin tana chhandamna,
Min silfaitu Beramno thisen.

Silfaina tuinung thisen hlu ah chuan,
Thiltihtheihna hlu tak chu a awm;
Chu chanchin lawmawm chu kan puang zel dawn ram tin ah,
Thiltihtheihna a awm thisen ah.

Thisen hlu (Silfaina), Kraws thisen (Thiltihthei),
Chu thisen chu sang tam tak tan damna a ni;
Aw ava han lawmawm em,
Mitin tana chhandamna,
Min silfaitu Beramno thisen.

Misual bawlhhlawh ber te min silfaitu chu,
Aw Beramno thisen hlu a ni;
Hringfa sual a bo hnu min tlanchhuak leh ta,
Thiltihtheihna a awm thisen ah.