Lalpa ka chhuang che

Pathian tel lo hian mihringte hi engmah lo mai kan nih zia hi a hrechiang apiang te chuan Pathian hi an fak a. He khawvel harsatna leh lungngaihna zawng zawng laka min chhan chhuak thei tu chu Pathian chauh a nih zia hrechiang apiang te chuan

bang loin an fak mawlh mawlh mai a ni.

Mihring kan niha khawvela kan awm chhung hian eng ang mi pawh ni ila harsatna leh buaina te hi kan pumpelh thei dawn lo a. Lungngaihna leh thihna te hi kan tawh ngei ngei tur an ni.

Chung harsatna te chu mihring tana tawrhthiam rual loh, ṭahna leh lungngaihna vawrtawp min thlentu pawh nise Pathian nei tu te chuan Amah rin chhanin an tuar chhuak a, harsatna thuk ber karah pawh Pathian chu an fakin an chhuang zawk a ni.

Chumai ni loin misual boral tur hi van khua leh tui nihna min pe a ni tih hriain chu hmun chu an thlir tlat a. Pathian hmangaihna thuk zia chu an hmuh hmaih ngaivlo a ni. 

Chuti ang nun, harsatna leh lungngaihna karah pawh Pathian neih tlat hlut zia hmuchiang em em tu nu pakhat, Lalliani, Upper Khatla, Aizawla cheng mek chuan ' Lalpa ka chhuang che' tiin hla ropui tak mai a phuah chhuak a. Chu hla chu tun laia Pathianin a hman em em One In Christ te chuan an sa a nih kha. Tv leh You Tube lamah te pawh he hla hi chu kan lo en tawh ṭhin ang a, a thluk a nalhin a satu te hian nung takin an sa tih pawh kan hriat kha. 

Amah Lalliani chuan heti hian he hla ṭha tak mai leh ropui tak mai a phuah dan hi a sawi a-

"Ka khualzinna kawng hi a harin Lalpa tel lova nun hi kawng harsa tak a ni a. 'Lalpa Lalpa' ti chung zela ka kal hian ka nun hi a nuamin a lo thlamuanthlak a ni. He khawvel ka thlir hi chuan ka hah a, hahchawlhna tak tak hi a awm lo a ni. Amaherawhchu ka en tur dik tak Kraws ka thlir chuan ka hahdam a, ka thla hi a muang thin a ni.               

Ka hla thu hmasa bera ka sawi ang khian, khawvel sualna hrang hrang zingah hian ka kal thiam thin lova, ka thaw a pik mup mup thin a ni. Mihring kan nih chhung chuan sawiselna te, elrelna te kan tawk thin a; chu'ng kan tawn te chuan nun dan tur leh awm dan tur min thiamtir lo thin a. Chuvangin chutiang a lo thlen chang te chuan tihngaihna dang ka hre lo a, min venga min awmpui tlat tura Pathian sawm leh mai loh chu tih tur dang leh tih theih ka nei lo a ni.            

Chu mai ni lovin van khua leh tui nihna min petu hnena awm hi a nuamin a thlamuanthlak em em a. A tel lova awm thei lo, pen khat pawh pen thei lo, mit pawh khap thei lo kan nih zia hi ka hre chiang em em a. Min vengtu leh min thlamuantu Lalpa hi ka chhuang zel dawn a, ka fak zel dawn a ni."

Pathian hi belhtlak, innghahna tlak a nih zia he hla i ngaihthlak hian i hriat chian zual phah ngei ka ring a. Amah chu chhuanga fak zel thei turin inbuatsaih sauh sauh ila, van khua leh tui nihna min pek hi chang ngei thei turin Amah hi bel tlat ang aw?

Lalpa ka chhuang che

Phuahtu : Lalliani

Satu : One In Christ

Lalpa ka khualzinna kawngah hianin e

Kawng zawh dan ka thiam lo i tel lo chuan

Lalpa min kaiin min veng zel ang che aw

Kal dan min zirtirin i hnena awm ka duh

Lalpa, Aw Lalpa, min pui rawh

I kraws bulah min hruai zel ang che

Ka hahchawlhna i ni e Aw Lalpa

Kei misual min hmangaih tu ka fak ang che

He khawvel sual zingah hian ka kal thiam lo

Sawiselna khawvel ramah hian zawng e

Nun dan leh awm dan ka thiam thei mawlh lo e

Min kaiin min veng tlat ang che aw ka Lalpa

I van khua leh tui nihna min pe tu

Lalpa ka hmangaih che, ka chhuang zel che

Ka duh che i tel lova awm thei lo hian

Min hmangaihtu Lalpa ka chhuangin ka duh che