Zantin Mangtha.....

Hard Ray, Sailothangi leh zaithiam hrang hrang te’n an sak thin ‘Zantin Mangtha’ tih Lalnunzama phuah hi kum 30 chin chunglam chuan kan hre vekin a rinawm a. He Lengzem hla hi, hmangaihna thuk zia leh hman laia kan mizo nunhlui tarchhuak thei hla tha tak hi tute emaw an hmangaih em em, khuanu’n a ruat siloh te tana inhnemna leh lunglen mittui tlakna a ni ngei ang.

Keini ang rual chuan Sailothangi’n thiam taka a sak lai hun khan chuti ang in ngaihzawng leh hmangaih em em kha kan neilo a, chu vangin he hla thu that zia leh nalh zia kha kan hrethiam phak ve tak tak lo a. Mahse, Hard Ray in thiam tak maia an lo sak leh kha chuan ngaihzawng, hmangaih, phuloh tih te kha kan neiin kan hre thiam ve tawh a. Hard Ray sak kha Tape ah vawi 7 aia tam mah ka’n ‘play’ nawn tir pek kha- tuemaw mitthla chung in!

He hla hi ka rilru a a lo lan thar lehna chhan phakhat chu 19 August 2018 zanah ka thiannu hian WhatsApp ah video in ‘Zantin Mangtha’ tih hla hi a thiannu Ramsangi, Kolasib a mi sak sa tliah mai mai chu min lo thawn a, amah hi thawk khat lai pawh khan One In Christ in an band member tura an lo sawm tawh khawp a zaithiam a ni a. A hla sak chu thiam ka ti in nalh ka ti takzet a, ka lunglenna thi tawh hnu a kai tho chiang hle! Hard Ray sak ka ngaihthlak tawh hnu ah sa nalh ka la tih ber a ni a.

He hla phuah a nih hun lai hian tun lai angin Facebook, WhatsApp adt, a la awm ve lo a. Tlangval tan nula an duh leh ‘star’ ruk em em pawh kha tun lai anga awlsam taka Internet kaltlanga an duh thu kha hrilh mai theih a ni lo a. An in ah va len emaw, lehkha thawn emaw thiante kaltlang emaw a va hrilh kha a ngai a. Chutah min lo chhan let loh phei chuan zah leh rilru nat chiah kha kan chan tur chu a ni mai! Mahse chumi vang ngawt chuan kan duhna kha a reh silo a, kan hmu zing tawlh tawlh a, an zun ah kan uai thuk tawlh tawlh a, nun kha a va tikhawlhkham tak!

Chum hmeichhia chu a hmletha in a ‘luck’ em em a, phuloh leh cho rual a nihloh zia chu kan hriat chian tawlh tawlh vangin min theihnghilh biklo tur a ngne chungin zan tin atan kan mangtha ta ringawt mai a nih hi! Kan duh ber ah chuan damchhung hun hman zawh kha a nih laiin a rem thei si lo a- rilru a na!

Hun te a lo kal a, Krismas leh kum thar kan hman liam tak fo hnu ah pawh hian a ruk a kan hmangaihna leh kan duhna kha a reh mai lo leh nghal a. He hmeichhe zun zam hian kan dam chhungin min phuar bet tlat tawh dawn a ni tih hi kan inpawm thiam tan tawh a. Kan rilru chu na ru veng vengin, kimlo tak zet in leh hrilhai ru takin awm a nih hi!  Kan hmagaihna leh kan rilru natan chu a inbuan a, engtikahmah kan theihnghilh dawnlo a nih hi!

Chti ang taka ka hmangaihna che chu a tak awmlo leh hmuh tur awmlo a a thamral ringawt tur hi chu ka ui takzet a sin! I tan ka inhuamna te, ka duhna che leh ka hamangaih zia che hi I tan leh khawvel mit hmuh ah hian lan tir hi ka huam in ka duh takzet a sin! Mahse…a rem thei silo...sawi theih ka nei lo...a rem lo a ni tiraw? Engtin nge ka  tawrh zel dawn ka hre lo a…min lo ngaihtuah suh aw…khuanu ruat kan ni ve lo hi a pawi a ni…nang pawhin pawi min tihpui ve ka ring...pawi I ti ve tiraw?...

Eng pawh nise…zantin atan..Mangtha aw?

Zantin Mangtha

Phuahtu: Lalnunzama

Ka hmangaihna biahthu han hlan ta ila,

Engtin min chhang ang maw tleitir lenmawii;

Min hmangaih hian kei zawng ka ring si lo,

Len thiam a har ka di mawi hmeltha.

      Mahse e, ka hmangaih min nghilh bik suh,

      Nangmah ngaia dam chhung hun hmang tur hian;

      Mal ka sawm che khiangawi i chan thlengin,

      Damte’n leng la zantin mangtha.

Hun leh nite lo inher danglam zelin,

Kumpuisul engzat pawh lo liam mahse la;

Ka hmangaihna a chuai dawn chuang si lo,

Ai ang I cham reng thin thinlai rukah.

Ka hmangaihna tham ral an ka phal nem aw,

Mahse i rem thei silo maw lal nunnem;

Engtin tuar zel ang maw i zun leng ngaih hi,

Khuanu ruat loh di tawn a har ngei mai.