Matehawngi

Kan tet laia Sailothangi Lengzem hla sak pakhat ka hriat reng thin chu ‘Hmm...hmmm…hmm…hmm..’ tih kha a ni a, a hla thu dang pawh ka hre zui chuang lo a, mahse a ‘hmm…hmm…’ lai khi chu vawn a awl em avang khan ka hre reng thin.

Hun a lo kal zel a, he hla hi Fam Lalzova phuah a nih thu te kan han hre chho a. Tun hnuah Lalropuii, Theiriat nula zaithiam takin a’n sa thar leh a, nalh ka tiin ka ngaithla fo a. ka thiannu pakhat nen phei chuan he hla kan  ngaihthlak apiang hian kan inhrechhuak ziah –hei tun ah pawh ka ngaihthlak mek hi!

R. Lalrawna & RK. Lalhluna ‘Fam Lalzova’ lehkhabu a a inziah dan chuan he hla ‘Matehawngi’ hi Lunglei Sapte Kailuia fanu tleirawl Sailothangi chu phuah chhan a nih thu an sawi. Hetih hun lai hian Sailothangi te hi Lunglei ah chuan mi lian ber pawl an ni a, an in ah tlangval an chuangkai ngam manglo a. Lalzova pawh hian Sailovi hi rim fo duh mahse a ngam bik lo a. Tumkhat a leng erawh chu Sailovi nu chuan Lalzova kawm that hman lekloh turin Sailovi chu a tir kat ta sek mai a. Lalzova chuan Sailovi nu rilru chu hria in a haw ta vat a, he hla hi a lo phuah ta niin an sawi.

Nie, kan dinhmun hi a inthlau lutuk hret a ni tiraw? Chuvang ringawt chuan kan inhmangaihna, kan induhna leh kan inthlakhlehna te hi keimah lamah chuan a reh phah der silo! Mahse awm dun tak tak turin a rem thei bawk silo a, I nu leh pa te duh ang takin mangtha phawt!

Hei ka haw kawngah hian ka inngaihtuah reuh reuh a, kan retheih avangin min iai tlat si a, rilru a na duh khawp mai. Chhungte atanga ropui velo kan nih avang hian kan hmel an hmuh ringawt pawhin min duhlo tih mitmei leh chetzia ah a lang nghal a.

Mahse kan dinhmun chhe tak hian ka duhna che leh ka hmnagihna che hi a tinep in a tireh thei der silo a, chuvangin ka kalsan ringawt thei lo che. Kan Mizo pipu danah pawh nula chuan an inlengte chu engmi pawh nise biakchhiat kha an phal biklo a, chuvangin inthlahrung chung chung pawhin ka lo la rim fan ang che!

Kan chhungte vang ringawt hi chuan kan inkar hi tichhe miahlo ang aw? Kan inhmangaih tawn tlat chuan engkim hi ka hum a, khawii hmunah pawh nangnena awm hi chu ka zuamin ka huam vek-kawlkil ah pawh nise. I bulah chuan khawi hmun pawh nise hlim takin ka nui zel thei ang…I thei ve ang tiraw?

Kan inkar hi Chhawihfa chauh lo chuan min thenlo se tiraw? Kan chungah Khuanu’n zahngai se, min dipdal tu tur te lakah pawh min veng tawn tlat se, thihna chauh lo chuan min then suh se aw…

Matehawngi

Phuahtu: Lalzova

Hmm.hmm..hmm..hmm.. 
Kan inthen thei silo nangnen,
Suihlung rual a rem bawk silo;
Mangtha, i chun leh zua lawm an.

Hmm..hmm..rairah vangin
Min hnawl sirah nem puan angin;
Hmm..hmm.. Tap in siang lam rawn ah

Kir leh nang e

Matehawngi.......

Hmm.hmm..hmm..hmm..
A ngur naufa a pian loh chu,
Sakhmel par ang lawm a kim lo;
Thai an chang leh lunglai an her.

Hmm..hmm.. rairah vangin,
Ka hellai ka di ka bang lo'ng e;
Hmm..hmm..
An sang billo 

Hman lai pi leh pu dan.

Matehawngi...

*Hmm..hmm..hmm..hmm..
Chun leh zua hal vangin parte,
I bang lo'ng aw nuih zai rel in;
Rawnkawl leh kil i fang dun ang.

Hmm..hmm...nang nen bawihte,
Min then lo se chhawihfa lo chuan;
Hmm..hmm..
Min hualhim se Khuanu'n 

Kan doral nen.

Matehawngi...