Mizo te hi chhungkua a ‘sex’ lam sawi hreh leh inzirtir hreh tak, mahse inchhungkhur pawn lamah erawh ‘sex’ lam sawi nasa leh kan fiamthu thawhna ah pawh hmun pawimawh tak chang pha khawpa ‘sex’ lawm kan ni ti ila kan sawi sual lo ang. Mizo te chauh kan nilo a, mihring, mi pangngai tawh phawt chuan sex hi a ngaihtuah a, a nunpui a, a hmang bawk thin.
‘Sex’ hi Pathian in mihring te tan a siam a ni a, mipa leh hmeichhia hi sex hmang dun tura Pathian siam kan ni. Chuvangin sex sawi hi sual a nilo a, Pathian thu nen a uluk taka kan inzirtir hi kan tihtur leh kan mawhphurhna a ni.
Jeremia 31:21 ah khan Pathian in Israel chu Nula thianghlim (virgin) ang in a ko a. Tirkoh Paula chuan ‘virginity’ chu tharau lama kan thianghlimna chhinchhiahna ang a hmangin II Korinth 11:2 ah khan Lal Isua tana neih tlak nupui ‘virgin’ ni turin min hual thu kan hmuh kha. Tin Kohhran in kan inzirtirna angin Hebrai 13:4 ah khan inneih hma a ‘sex’ hmang te leh uire te chu Pathian in an chungthu a ngaihtuah dawn tih kan hmu a nih kha.
Chuti ang chuan Bible ah hian ‘virginity’ hlutna te, inneih hmaa sex hman hi kan tih loh tur a nih thu te kan hmu a, tin Kohhran in min zirtir bawk a. Pathian pawhin ‘virginity’ chu a ngai hlu in a fapa Lal Isua pianna tur pawhin nula ‘virgin’ Mari a thlang chhuak tih kan hre awm e.
Kan thupui ‘virgin hloh’ chung chang hi han sawi ta ila. Virgin loh rau rau ah mipa aiin hmeichhe tan a hreawm zawk ang a, chuvangin hmeichhe thlavang hauh chungin kan sawi ang. Chutih rual erawh chuan hmeichhe virgin loh tirtu hi mipa kan nih avangin kan indah awl thei chuang lo.
Zep nak emaw, Mizo sex video leak out te hi mi nawlpui chuan kan en deuh fur zel in a rinawm a. Chuta ka rilrua lo awm chu mipa te hian kan mutpui hmeichhia te hi kan timualpho takzet tih hi a ni. Hmeichhia chuan innghahna tlak ah ngaiin mipa lakah chuan a inpumpek zo a, mahse a tawpah dem leh mualpho chiah an hlawh leh thin.
Zir chianna chu ka neih hauhlo na in hmeichhia hi kum 14-22 inkar ah hian hian an ‘virgin’ an hloh tam ber hun lai a nih ka ring a. Hetih hun lai hi an duh tawh mipa chu an duh em em hun lai leh enge emaw tawn ve chakna hun a ni a. Hetih hun laia an bialpa te a zirin sex an hman leh hmanloh hi thui tak a innghat ang a. Chutih rual chuan hmeichhia pawh sex lam harhvang tak a nih chuan mipa chauh kan dem thei lo ang.
Pawi ta em em chu a tam zawk hmeichhia te hian kan thianghlimna kan hloh tawh chuan a leh peka ‘sex’ hman fo hi hrehlohna kan nei tawh tlat zel. Facebook, Instagram etc vela thlalak sexy tak tak upload a post thin te hi kawm chian tak tak chuan sex lo hmang tawh, virgin tawhlo hi an lo nih duh khawp mai! Chutih rual in Social Media a thlalak sexy neilo mahse virginlo tam tak an la awm teuh bawk!
Hmeichhia te hian kan virgin kan hloh tawh chuan mipa hi rin leh harsa kan tih tawh thin-innei silo a min kalsan leh si a nih chuan! Chubak ah kan sawi tak ang khan kan insiam tha fe a nihloh chuan kan hmalam hun zel a kan ngaihzawngte nen pawh sex hman loh hi thil har tak a ni tawh a, sim hlen ta kan awm teuh rualin sex hman pawi ti tawhlo mi engemawzat kan awm pha bawk.
Tun laiah mi kan ‘frank’ tawh a, kan inngaihzawn dawn ah kan ‘virgin’ leh virgin loh kan inzawt hreh lem lo. Chung ah chuan a bikin hmeichhe tan dawt sawi hi a theihloh tluk a ni-physical tak in virgin leh virgin loh hi a hriat theih tlat avangin! Kan virgin tawhlo a nih chuan kan hmalam hun hi thui tak a hril tlat tawh zel a ni.
Ka sawi duh chu, mipa te pawh in kan neih duh loh tur hi chu an thianghlimna-virginity hi I tihchhiatsak tawh lo ang u. Tuna tan mai an nun kan ti chhe lo a, an hmalam hun thlengin an nun hi kan tichhia a ni. Mipa dang an neih lehna tur ah harsatna tamtak kan siam sak a, inneih hmaa sex hman zel pawi tihlohna an neih phah tawh a, kan sawi ang aia thui hian an nun kan tihchhiatsak tak meuh meuh a ni.
Hmeichhiate mawlh hian I hre thar ang u- sex min hmapui tum tu zaa sawmriat aia tam mipa hi chuan min hmangaihlo tih hi pawm tawp mai ula, in lo tihdikloh pawh in virgin hloh ai chuan a la tha hrim hrim! Mipa in kan hmangaiha kan neih duh tak tak te hi chu an virgin hawn sak kan tum ngailo. Chuti anga hawng duh tlat, inneih hma a sex hmang duh tlat bialpa I tawng a nih chuan fimkhur hle ang che!
Kan virgin kan hloh rual hian kan taksa mai nilo kan rilru, kan zahawmna thlengin kan hloh tel a, chuvangin kan virginity kan hlan hma hian vawikhat tal inngaihtuahnawn hram ang u. Virgin hloh hian ken tel tam tak a nei a, Pathian thu kan awihloh piah lamah kan hmalam hun zel hi kan tichhe tel a. Kan sim loh phei chuan AIDS natna thleng a kai thei leh thehdarhtu kan ni thei tih te hi kan ngaihtuah tel hram dawn nia.
I virgin emaw virgin lo emaw, Lal Isua’n a hmangaih che. A ta ni turin nung la, nangmah hmangaihtu, I nihna ang anga pawmtu leh hmangaihtu che a pe ang che.
Comments
Post a Comment