Kraws ah chuan thisen hlu a awm

Kristian Hla Bu number 202 na kan keu chuan Martha Matthila Stcockton-i (1821-1885) Pathian hla phuah 'Kraws ah chuan thisen hlu a awm' tih kan hmu ang a. He hla hian chatuana nunna kan neih theihna tur a Lal Isua tuarna, kraws ah a thisen hlu tak chhuaka min tlanna ropui zia a puanchhuahna hla ropui ber pawl a ni a. Khawvel Kristiante zingah hian he hla hre lo hi kan awmlo ang ti ila kan sawi sual awm lo e. 

He hla phuahtu Stcokton-i hi June ni 11, 1821 ah lo piangin Rev. W.C. Stockton nen an innei a. He hla ropui tak mai hi kum 1871 ah a phuah niin an sawi. He hla thluk hi ama siam a ni a, a hla phuah dang pakhat chu Kristian Hla Bu No-41 na ‘Pathianin mi sual a hmangaih tih hi a ni a. Pi Stockton-I hi kum 1895, October ni 18 ah khan a boral. 

‘Kraws ah chuan thisen hlu a awm’ tiin Mizotawngin Suakkunga (1893-1978) hian a dah a. He hla hi a lehlin ni chiahlo in sap tawnga a thu leh thluk awmsa hmang hian a siam niin a lang. Sap tawng lamah chuan he hla hi chang 4 leh chang 5 te a ni a, a in anglo ve nual mai. 

Lal Isua te hun lai khawvela thih dan rapthlak leh mualphothlak ber maiin Lal Isua chu Kraws ah kenbeh a awm in a thi a. Chu kraws Lal Isua thisen luanna chu nang leh kei a tan luang a nih kha! Chu thisen hlu tak luangchhuak avang chuan nang leh kei hian chatuan nunna kan neih phah anih hi. 

Lal Isua’n kan tana Kraws a put hi a namai lo hle a. Amah pawh hian a huphurh ve em em a, mahse min hmangaih em avang hian kan tan a pu a. Rit a tiin pumpelh theih nise a duh hial ang-mahse min hmangaih em avangin Kalvari ah pu thlengin kan tan a thi a nih kha! A va ropui em!

Chu Kraws, kan tana Lal isua’n a put chu put pui ve turin min duh a. Nitin mahni kraws pua zui turin min hrilh a nih kha.  Chuti ang a rinawm taka Lal Isua hnungzui tur leh kan tana a tawrhna te hre rengin zui tlat ila. Nakin ah, Lal Isua bul ah chuan nunna lallukhum chu khumin a hmangaihna ang chhungah chuan chatuan in kan chawl tawh dawn a ni. 

Lal isua kraws leh thisen hi a hlu em em a, chuvangin a thlawn mai mai a luanral tir a tan chuan a uiawm takzet a. Nang leh kei hian kan dam chuung a kan lei zawhloh tur chatuan nunna chu Lal isu kraws leh thisen hi a ni tih hre chiang ila, Lal Isua tuarna tawmpuiin Lal Isua’n kan tan a tawrhna hi i ti thlawn lo hram ang aw?