Maphasy

Kum 2008 ah nita in ka hria Lalpanliani’n Lengzem hla lunglenthlak zet mai ‘Maphase' tih a sak kan ngaihthlak kha! Khang lai khan You Tube velah a video kha en mai tur kan hmu ve pha lo a, Mp3 khan phone ah kan ngaithla thin a ni. Kum 2008 a he hla ka ngaithlak thin lai hian kan thiannu, pawl 12 kan zirpui thin hian bialpa, tuipui ral kan ngaia mi hi a nei nghe nghe a, chun vangin an pahnih chan kha ka ngaihtuah sak a,  ka lung kha a ti leng reuh em em a, tun ah phei chuan an innei zui ta nghe nghe!

He hla hi kan pian hma kum 1980 chho bawr a Mizo Band lar em em mai Vulmawi hla a nih thu tun hnu ah ka hre ve hnuhnawh a. He hla phuahtu pawh hi Vulmawi Band Vocalist Siama phuah leh sak a nih thu kan hre ve hnuhnawh a. He hla hi Mara nula, Chhimtuipui (Kolodyne river) piah a cheng tana an phuah a ni a,  Mapha sy tih pawh hi Mara tawng niin  'Mangtha le'  tihna a ni. Vulmawi pawh hian a hunlai in nalh takin an sa a, tun hnuah Lalpanliani’n mawi tak in a sa leh bawk a, a video hi You Tube ah en theih in a awm a ni.

He hla Vulmawi in an phuah hun lai vel hi kum 1970-80 inkar a nih ngei a rinawm a. He tih hun laia nula leh tlangval te in biakpawhna hmanrua ber chu Dak Pu kaltlang a lehkha in thawn kha a ni ngei ang. Chuvangin inhmuh leh inbiak pawh a har em em a, thlalak an inpe a nih pawh in black & white bak a la awm kher lo ang.  Chuvangin he hla hi keini thangthar, zan tina WhatsApp video call hmanga inhmu thei tawh te tan chuan kan mizo nula leh tlangval te inngaihzawn dan nun hlui tarlang tu hla thatak a ni tih kan hre thei awm e.

He hla phuahtu hi Mizoram chhimtawp ah Mara nula nen an va intawng a nih ngei a rinawm a. Chutah chuan hlim takin an nui dun in zan thla eng te pawh an thlir dun a ni ngei ang.  Inthlahlel takin Mizoram chhimtawp nula chu Mizoram hmar lam Aizawl tlangval chuan a kuah vawng vawng a ni ngei ang. Chu Chhim nula, hmeltha tak mai leh ‘cute’ tak mai chuan Aizawl tlangval chu a hmangaih thu chu zawi te te in a sawi sep sep te pawh a ni ngei ang! Mahse nupa la nilo ta nafam chu inkalsan a ngai hrih miau si a, chuvangin Aizawl tlangval chuan Chhimtuipui ral nula chuan an pianpui tawng ngei in Mapha se, mapha se (Mangtha lawm lawm aw) tiin ui chung leh ngai chung zelin a thlah a nih hi!

An taksa chu awm dunlo mahse chu tlangval thinlung ah chuan chu nula chu a cham reng mai a. A aw ngaihnobei tak mai te chu a thinlung ah chuan a cham reng mai a. Intawnni her chhuak leh vat vat se tih kha a duhthusam leh a rilru luah ber tu chu a ni a. Haw kawng thui tak pawh an la zawh hma, Chhimtuipui ral an kai tan chauh atang chuan chu nula chu a ngai nghal vawng vawng mai a, a rilru ah Chhimtuipui ral leh lam nula aw ngaihnobei tak chu a cham reng mai a, loh theihloh in Hmar lam pan chung zel in Mapha sy, Mapha sy a ti lawm lawm mai a nih hi!

Inhmuh leh hun tur a han ngaihtuah a. Aizawl leh Chhimtuipui ral Siaha inkar hlat zia chu a ngaihtuah a. Tun lai ang in inkalpawhna a la thatloh bakah inbiakpawhna a a la tha lo em em a. Tv tak ngial pawh hetih hun lai hi chuan a awm a nih pawhin balck & white kha  ala ni ang a, chu pawh chu a vang pharh ang!

Chuvangin an inkar hla lutuk chu tawrh har a ti em em a, a lunglen mittui tla fo chu hreawm a tiin, inngaihhruina'n a chhimtuipui ral nula in a thlalak a pek – black & white ringawt chuan a lunglen a hnem zo meuhlo a ni! An awm dun maiu loh avang chuan ngai tak chungin, a thlalak balck & white keng chung chuan Chhimtuipui Nula chu tawn leh ngei beisei a, a hlimthla mai chauh chan chu a ngathiam meuhlo a,  a tak ngeia awm dun leh vat beiseiin  ‘Mapha se, Mapha se’ tiin a ngaih thu a au chhuahpui a ni.

Mapahsay

Satu: Vulmawi, Lalpanliani

Phuahtu: Siama (Vulmawi)

Nghilh a har dawn mange

Hlimte’n kan nuih dun lai kha

Hmangaih biahzai nem te

Damte’n mi hlan maw

Maphasy Maphasy

Suihlung lung ti leng zual mai maw I an ka

Dar ang tawnni hi her leh se,

 Chhimtuipui ral ka kai thlengin

A cham reng thin ka thinlai ah

Nghilh rualloh I anka nem te

Maphasy...

 Maphasy Maphasy

2. Dar ang tawn lehni tur,

Ka dawn vel mittui nen

I hlimthla mai maw ka chan

Ka ngaithiam nem maw

Maphasy Maphasy