Ngaihdamna Famkim

Leitan South Presbyterian Kohhran Zaipawl chuan kum 2018 Good Friday zan inkhawm ah Pathian fakna hla ‘Ngaihdamna Famkim’ tih PB. Lalbiakzuala phuah an rem a. Zaipawl zaithiam tak chu an ni hauhlo a, mahse an hla sak chu a nung em em mai a. Chu hla chu kei tak phei chuan ka vawi 1 hriatna a ni a, a phuahtu PB. Lalbiakzuala pawh hi ka hre lem lo. Chu hla chu inkhawm ban ah nalh ka tih thu kan thiannu Mapuii, zaipawl member 1 hnenah ka sawi nghe nghe a, a hla thu te min pe a, ka lawm hle.

He hla a thu innghahna bul ber chu Chanchin Tha Johana ziak 8:1-11 a Hmeichhe Uire an man Lal Isua hnena an hruai behchhana lo piang chhuak a ni ti ila kan sawi sual awm lo e. Lal Isua khan kha uire nu kha a lo ngaihdam a ni tih Bible ah kan hmu a, chuvangin he hla pawh hi 'Ngaihdamna Famkim' tiin a phuahtu hian a dah a ni.

Deuteronomy 22:22 a kan hmuh angin Juda mi, uire chu lunga den hlum tur a ni. Chuvang chuan Lal Isua fiah nan khan Dan zirtirtu te leh Farisai te chuan hmeichhe uire lai tak an man chu Lal Isua hnenah an lo hruai a ni tih Johana ziak ah hian kan hmu a. Lal Isua fiah nana lo hruai an nih thu pawh kan hmu tel bawk.

He hmeichhia an lo hruai hi a chan a chauvin Mosia Dan atanga lung a denhlum tur a nih zia hi sawi buai ngailo va chiang a ni. Tun lai hun ang phei chu nise Isua bula lo hruaitu te hian a thlalak nen lam Isua hi hmuh turin an inpeih ang a, WhatsApp leh Facebook ah te nen lam an post darh chuai chuai lo ang tih tunge sawi thei?

He hla chang 1-na a kan hmuh ang hian he hmeichhe uire hi thi turin mipuite’n an dan awmsa hmangin Lal Isua bul ah an lo hruai a. Vaivut ah thu in a hnung an khirh a, he hmeichhe uire hian engmah thiamthu sawi tur a neilo a, chhantu mamawh mahse an Dan ah chiang taka tihhlum tur a ni. A hlauvin a khur zawih zawih ang a, chhantu pawh a mawmawh em em ang tih a hriat.

Mahse Bible a kan hmuh ang leh he hla phuahtu in a thunawn a sawi ang hian Thiamchantirtu Lal Isua chuan ngaihdamna famkim nen a ngaidam a, kal a tisual nawn tawhlo turin a hrilh a ni tih kan hria. Chu chhantu ngai hmeichhia, khawtlang leh Kohhran pawikhawih, thi ngei ngei tur chu Lal Isua ngaihdamna famkim a chang a ni,  a va ropui em!

He hla chang 2-na a kan hmuh ang hian Lal Isua’n mipuite, dan zirtirtute leh Farisaite hnenah khan sualna neilo chuan chu hmiechhe uire chu lunga deng hmasa ber turin a hrilh tih kan hria a, mahse tumah reng mifel famkim an awm lo. Chuvangin Thiamchantirtu Lal Isua chuan thihna khawp sual khawitu chu thiam min chan tir a, kan tan Lal Isua chu kan thiamchanna turin a lo ding a ni.

Uire nu dinhmun anga ding- chanchhia leh khawtlang en dawng, AIDS/HIV natna vei, nu leh pa leh chhungkhat laina hnai pawhin min hmangaih zawh tawhloh khawpa sual avanga tluchhia kan ni thei e. Kan nun hian awmzia reng reng nei tawhloin mahni intihhlum duhna rilru pu a awm mai mai, nung mai mai leh beisei tur  reng reng nei tawhlo kan ni mek ang. Mahse, sawibuai tur awm tawhlo khawpa lunga denhlum tur Uire nu pawh ngaidam duhtu Lal Isua chuan Amah au tur in min sawm a, min ngaidam turin Kraws ah a thi a ni tih hi theihnghilh lul suh. Khawtlang, ram leh hnam, nu leh pa, khawvel hian min hnawlin min hmusitin thiamloh min chantir mah se ngaihdamna famkim neitu Lal Isua’n Amah chu au turin min ko lawm lawm a ni!

Chuti ang sualna leh mualphona vanga mi te dem, sex video kan neih tawh avanga mite nuihzat, AIDS/HIV kan vei tawh avanga mi te hlauh rawn leh ten rawn, mualphohna tinreng hmanga mualpho tawh kan ni mek in kan ni thei e. Kan photo leh kan video te, kan chanchin te chuan WhatsApp, Instagram, Facebook, Twitter adt a luah  in a awm reng a ni thei. Mahse chu aia Chatuana awm tur ngaihdamna famkim leh thiamchhanna famkim chu Lal Isua’n Krawsa thi in  A thisen hlu tak chuan min tlen fai sak tawh zawk a sin!

Chuvangin, eng dinhmunah pawh chuan lo ding ila, khawvel boral tur in min demin min ngaidam theilo mahse, Chatuana awm tur zawk Lal Isua chuan ngaihdamna famkim hmangin min ngaidam a, Chatuan Nunna min pe zawk a ni! Chu chu keini misual nung tlakloh khawpa mualpho te tan a ni, a va ropui em!

  

Ngaihdamna Famkim

Phuahtu: PB. Lalbiakzuala

An sawi an sel  mite’n an dem

Tlangin an rel e fam turin

Vaivut hmunah a ban an khirh e

Hlauvin a khur chhantu a ngai

Hlauvin I khur a

Chhantu I au maw

Thiamchantirtu Lal Isua’n

Ngaihdamna famkimin

Kal la tisual tawhlo turin

Thiamloh reng a chantir lo che

Tunge thiamloh chantirtu che

An rel tak che a fam turin

Hlau suh I tan Van Lal fa Pathian

Thiam chantirtu ka lo ding e

Lungngai thlabar mittui a luang

An hawisan che an hre lo che

I nunin awmzia reng neilovin

Chau thin mahla min au ta che

Sual vanga mite’n an dem

Sual vanga mualpho thinte

Thiamchanna tur ngaihdamna famkim

Kraws thisenin min rawn pe ta