ZONUNCHÂMI

Hmeichhe Innocent lem lo tak Zonunchami @ Chami Bawikhar hi ka hmuh hmasak ber chuan Jeans kekawr khup ṭet a ha a, amah pui roh hi a ria sang ṭhauh reuh a, ka zah ru ang reng hle. Ka hmuh hmasak berna hmun chu a U te in ah a ni. Unau pali niin amah hi upa ber dawttu chiah a ni a, amah chiah hian an uanau ah Sap hming a nei ve lo.

Vawiin 8th January hi a pianchampha a ni a, kei pawh January thla ah tho ka pian ve vang hi a ni mahna – kan innel zui tak erh ni! Ka sawi tawh ang khan hmeichhe nu hnip hnep a nilo a. Sakawr piantha mi ang maiin a fit tang mai a, Jeans kekawr khup tet a hak phei chuan a street ru ang hle! Ka hmuh lai – kum 2013 ah khan Chennai ah MA Psychology a zir mek a, Krismas hmang tura lo chawl haw a ni. 

Ka sawi tak ang khan an unau ah amah chiah hian Sap hming nei velo in a pa khan Mizo takin ‘Zonunchami’ tih hi a lo phuah a, he a hming hi a pu zo hle tih ka hre nawn awn awn thin. A unau dangte’n an hming ah Sap hming an put vek laia Mizo hming chauh a nei bik tih ka hriat tirh atang khan a rukin ka bel chiang a, a pum rua a ria ang bawkin a rilru pawh a lang tlang!

Mi ti zawt zawt a ni lo a, mi ti phawng phawng erawh a ni! Pathian thu ka zirna lama ka saptawng hriatthiamloh tamtak ka zawh te hi laklawh sawilo in min lo hrilh fiah sak zung zung a, ka va’n lawm thei tak! Kei mi hmanhmawh leh ti thawt thawt ka nih avangin ka zuk tur sek sek a, a ni hian buai leh laklawh pawh sawilo in min lo tih sak zel a…ka lawm tak zet a…ka hnuk a ulh!

Kum 2014-2016 chhunga Odisha a Missionary ka thawh ve lai te khan kan sikul naupang hmaah Bible thawnthu hi sap tawngin sawi a ngai thin si a, A4 paper khat vel tur Mizo tawngin ka sawi tur kha phone in ka type vek a, chu chu Facebook/WhatsApp ah ka zuk thawn a. A ni chuan phun lo leh sawisel nei hauhloin English in min lo lehlin sak vek a, chung a lehlin sa te chu kan Sikul naupang hmaah ka chhiar chhuak thin a, Pathian leh ani zarah ka mualpho lo in ka ‘mission’ kha ka pui tlin theih phah thin! Ka va lawm em!

He tih lai hian Chennai ah lehkha zirin buai em em in a awm a, zan te an meng reiin zing lamah an tho hma ngai lo a. Chuti chung chuan ka mamawh hun hun ah ka zuk phone harh a, phun lo leh sawi nawi miahlo in ka sermon tur kha ṭum thum vel chu min lehlin sak vek zel a. A laka ka inthlahrung lo lutuk kha ka inthlahrung leh hnuhnawh thin!

Mizorama a awm hnu ah keiin Pathian thu ka zir ve leh a, ka zirlaite a har in saptawng ka thiamlohna chuan min tibuai leh ta a. Ka saptawng hriatthiamloh chu ka zuk thawn tawp tawp a –Facebook leh WhatsApp kal tlang te in....buai chung chungin min lo hrilh fiah leh a, ka va han lawm thin tak! Tawngtai dan tur chenin ka zuk ziah tir thul! Arsenal Transfer News chungchang ka zuk thawn erawh chu ‘I zirlai nilo chu ka letling peihlo’ a lo ti daih! Kei lah hi ka mawl ve thin si a – ka translator emaw ka ti nghet em a ni! A ni deuh roh bawk sia!

Chuti ang teh nuaih chu kan inkar a ni a. Pathian zarah kan dam chuan ka la tibuai zui fo dawn niin a lang a. Vawiin a pianchampha a lo thleng hi ka thinlung zawng zawngin ka lawm pui a. A pa in a hming a lo phuah chhan hi a pu zo ka ti a. A thiama leh a finna te hi chapo pui lo in,  inla changkang leh inla ‘high’ miahlo in keini mimawl ber ber te min tan pui a peih reng a, a nun ah hian kan Zo nun ze mawi kha a cham chiang hle tih hi a tak ngei a hmu tu leh chhawr tu ka ni –vawi tamtak!  

Vawi li ka bem tawh a, min la chhang lo! A bialpa min thik tur ngeiin Facebook velah te ka bem der in a photo ka ‘comment’ mei nei thin a, a sawt chuang lo!

Châmi, Pathian in malsawm zel che se la, kei leh mi dangte tan malsawmna lo ni zel ang che.

Happy Birth Day!