Missionary te tan leh nitina Lal Isua hnungzuitu te tana fuihna hla tha ber pawl chu ‘Min Hruai La Ka Zui Ang Che’ tih hla BCM Pastor Rev. R. Lalthanmawia phuah hi a ni ngei ang! He hla hi engtik kuma phuah nge a nih chu ka hre hauhlo a, a phuahtu Rev. R. Lalthanmawia pawh hi ka hre lem lo. Mahse a hla phuah erawh hi chuan Mizo Kristiante hi nasa takin min fuih a, min tichak thar a, Pathian in a hmang em em a, a hmang zel bawk ang.
He hla tha tak mai, Lal Isua hnung zui tlat tura fuihna hla hi ka hriat hmasakna ber chu Dintluanga Tochhawng in a sak hi a ni. A music video a fiah faiin en a nuam a, a satu hian nung tak maiin a sa a nih kha. Ringtu hnungtawlh tawh leh hmasawn ngai tak te tan chuan he hla hmang hian Pathian Thlarau Thianghlim pawl tharna, tihchak tharna leh fuihna thar dawn theihna khawpa hla tha a ni tih kan hre theuh awm e. Chuti ang tak chuan he hla pawh hi Pathian hian a hmang a ni tih kan hriat kha.
Lal Isua hnungzui tur hian a mai mai in a theihloh a, kan duhtlanna leh kan nuam tih zawng te hnawla min tirhna leh min kohna hmun apianga kal mai tur a kan inpek hi a ngai a ni. Kan nunna hi kan ta a ni tawhlo a, min petu leh min kotu Lal Isua ta a nih zia hi kan hriatchian nawna Lal Isua tan chauh kan hlan mai hi kan tih tur a ni a. Chuvangin ‘Min hruai la ka zui ang che’ ti mai thei tu nun neih hi a va ropui em!
Lal Isua kan zuina kawng hi a mam in a tluang purh dawn reng renglo a, chu harsatna chu ringtu te hian kan tawk vek a nih hi. Harsatna chi hrang hrang – sawichhiatna, mualphona, duhloh leh hnawl, thihna hial te pawh Lal Isua kan zuina kawng ah hian kan tawk ang – kan tawk mek zel bawk a nih hi! Mahse chung harsatna zawng zawng te chu tawk mahila kan zui hi Lal Isua a nih tlat avangin engmah kan hlau lo ang a, kan zui Lal Isua rintlak zia, rinawmzia leh ropui zia te chu Amah kan rin a kan zui thuk poh leh kan hmu chiang ting mai dawn a lo ni. A va ropui em!
Chuti anga Lal Isua hnungzui tur chuan kan duhna te, kan chak zawng te leh kan nuam tih zawng tak te leh kan thiam thil zawng zawng te pawh hi hnawl erawh a ngai a ni tih kan hriat kha. Kan duhthlanna te, kan nuam tih zawng te leh kan chak zawngte chu Lal Isua avangin hnawl zawk zel ila, A tan chauh kan inpek hmasak phawt chuan chung kan mihring lama kan thil chan zawng zawngte chu pek belhchhah kan nih zawk dawn zia Bible ah kan hmuh kha. (Mat 6:33) Chuti ang tur chuan ti hram hram ila, Lal Isua tan chauh hian inpe ang u.
Chuti anga Lal Isua chu nghet tak leh chak taka kan zui theihnan Thlarau Thianghlim chu min tanpui turin kan sawm reng thei a, kan bulah min pui tur in a awm reng a ni. Thlarau Thianghlim chuan min thuam thar ang a, chakna leh thiltihtheihna min pe ang a, keini chaklo leh tanpui ngai reng mirhing te hi min tanpuiin min thuam thar reng dawn a ni. Chuti ang chuan keimahni ah Thlarau Thianghlim chuan hmun a chan phawt chuan Lal Isua hi kan damchhungin rinawm takin kan zui thei dawn a ni.
Chuti ang taka zuia Lal Isua min hruaina leh duhna hmun a pianga kal zel thei tur chuan kan nunna leh kan thlarau chu Lal Isua hnenah pe tlat ila, Chatuana rohlu ber Chatuan Nunna chu kan nei ngei ang.
Min Hruai La Ka Zui Ang Che
Phuahtu: Rev. R. Lalthanmawia
Satu: Dintluanga Tochhawng, adt
Min hruai la ka zui ang che
Min tirhna ah ka kal ang,
Ka nunna hi nangma tan chauh ka hlan tawh che
Aw Lal Isu
Ka zinkawng te chhukchho mahse
Harsat buaina kar pawh nise
Isua nen kan nih vangin
Engmah reng ka hlau tawh lawng.
Lal Isua hnungzui zel turin
Nitin mahni inphat zelin
Ka duhthlanna zawng zawng nen
Ka inpe aw Lal Isu
Aw Thlarau Thianghlim lo leng la
I chakna in min thuam ang che
Chaklo leh tanpui ngai hi
Chakna thar min pe ang che
Comments
Post a Comment