KRISTAA NUN THAR

Text: Rom 12: 1 & 2

Thuthlung Thar a lehkhabu/thuziah sawmpathum zet mai nei Tirhkoh Paula chuan Rom mite hnena lehkha a thawn bung 12 na ah hian Kristaa nun thar neiturin keini ringute hi min ngen a. Kan rilru leh taksa chu Pathian duhzawng leh lawm tlak, tha famkim a nih theih nan min ngen a, danglam turin min fuih a ni tih kan hre awm e. 

Engtin nge kan danglam ang?

Rom bung 12: 1-2 kan chhiar ruala kan rilru a zawhna lo awm nghal thei chu enge nge danglamna chu? Eng nge danglamna in a tum (goal) chu ni ang?adt. Chuti ang chuan kan rilru ah zawhna hrang hrang a lo lut thei awm e. 

He laia danglam (Be transformed) hi a tawngbul Greek ah chuan ‘metamorphoo’ a ni a, ‘tidanglam, inlet, thlak adt.’ tiin kan sawifiah thei awm e. Entrina pakhat han sawi ta ila – Buhchium atanga Phengphehlep a lo chhuak ang hi a ni. Kan nihna mek chu thlak danglama nun thar leh rilru thar nena awm tur kan ni. Heta Paula sawi tum tak chu kan taksa leh rilru, tuna kan awm dan ni mek hi Pathian duhzawnga thlak danglam tur in, Pathian hman theiha danglam turin min chah a ni. 

Kan danglamna chuan eng nge a tum?

Kan danglamna chu danglamna satliah ringawt tur a nilo tih Paula hian min hrilh chiang hle a. Tuna kan taksa put lai mek hi Pathian lawmtlak leh pawm tlak a ni tur a ni a, a thianghlim tur a ni tiin min hrilh. Pathian chu a thianghlimin a ropui em em a, amah anga awm ve tur leh a duh zawng anga awm ve tur in kan taksa leh rilru chu kan thlak danglam a ngai a ni. 

Engvanga danglam tura nge kan nih?

Tirhkoh Paula hian kan danglamna tur a min fuihna chhan bul ber chu Pathian khawngaihna vang a ni. (Rom 12:1) Kan taksa bawlhhlawh leh sual, chatuana boral mai tur chu Pathian khawngaihna chuan Lal Isua kal tlangin min chhandam a. Chu a chhandamna changa neitu nitur chuan keini pawh kan inthlakdanglam ve ang a, Pathian duhzawng anga awm ve kha kan mawhphurhna a ni. 

Sual laka Pathian chuan zalenna min pe a, Chatuan Nunna chu a thlawnin min pe bawk a. Chung avang ringawt pawh chuan kan taksa hi A duhzawng leh lawmtlak kan tihdanglam leh kan pek let ve hi kan mawhphurhna a ni. 

Kan danglam theih dan tur chu engtin nge?

Keimahni chakna leh theihna ringawt hmang chuan kan danglam hlen theih hauhlo ang. Mahse kan taksa leh rilru chu Pathian hman tura kan pek phawt erawh chuan Pathian in kan chungah hna a thawk ang a, kan danglam ngei ang. Kan rilru ngaihtuahna pawh keimahni duhthu ngawt chuan kan thlak danglam hlen thei dawn lo. Mahse Pathian hnena kan rilru kan pek a, kan tawngtai tama a thu Bible te kan chhiar tam erawh chuan Pathianin min thlak danglam sak dawn a ni. 

Keimahni chauhin kan awmlo a, Pathian chu kan hnenah a awm reng a. Chu min awmpuina leh a thiltihtheihna rin chhan zawk chuan kan taksa leh rilru chu a hnenah hlan in kan lo danglam thei dawn a ni. Keimahni theihna leh chakna ringawt chuan kan thlak danglam zo dawn lo a, kan thei lo bawk. Pathian kan auin kan be tam ang a, chu chuan min thlak danglam dawn a lo ni.

Kristian kan nih avangin Lal Isua hungzuia amah ang tura koh leh danglam tur kan ni tih hi kan hre theuh awm e.  Kan thil chin thalo tam tak leh Pathian kan hnaih theihlohna thil tam tak – Zu, Drug, Sex, Corruption adt. te chu kalsana hnawlin Pathian khawngaihna avanga chhandam kan nihna chu chang ngei turin A lawm tlak leh a pawm theih niturin kan taksa, rilru leh thlarau hi i buatsaih ang u. 

Chu kan danglamna chuan kan Kohhran, Kawtlang, Ram leh Hnam te a nghawng ang a, tisa leh tharau ah hmuh theih khawpin hma kan sawn ang a, mi te awh leh entawn tlak in kan mimal, ram leh hnam hi kan siam thei ngei ang. Chumi a thlen ngei theih natur chuan tun atangin Pathian lawmtlak leh pawmtlak kan nih ngei theih nan kan nunhlui te kalsan in nun thar in bul i tan ang u.