Lunglenna hi mihring tungchho a piang, mi pangngai chuan kan nei vek awm e. Kan lunglen hun leh kan lunglen chhan chu a in anglo a nih pawhin vawikhat na reng reng chu lunglen tuar vek kan ni tawh ngei ang.
Kristiante'n kan hunpui neih zinga hlu ber Krismas pawh hian lunglenna thlarau (spiritual) hi a keng tel tlat a. He hun ah hian hla phuah thiam te, thuziak thiam te chuan thu leh hla mawi tak tak an phuah chhuak a, Krismas hian thu leh hla - literature a tih hausak phah nasa em em thin.
Krismas lo awm chhan leh a hlut zia chu kan hre vek a, chulam chu ka sawi tum ber pawh a nilo. He hun hi keimahni tawk te te ah a hlu thei ang ber leh a tha thei ang ber in hman kan duh a. Chhungkaw kima hman tumin kar hla taka awm te pawh kan in lam ah kan haw khawm thin a nih hi.
Nula leh tlangvalte pawhin an kawppui te nen he hun hi hlim tak leh hriat reng tlaka hman an duh thin a. He hun lawmawm tak hi am leh duhthawh taka hman hi an thla hlel a, an ur lawk a, chuti ang chuan an hmang thin. Amaherawhchu, a chhe zawng leh kan hmalam hun tichhe zawnga kan hmang a nih erawh chuan a tuartu tur chu keimahni kan nih avangin fimkhur tak leh kan hriatreng zui tlaka hman hi kan mawhphurhna a ni.
Lusun te leh chhungkaw kima hmang theilo te pawhin he hun ah hian an hmangaih kal ta te an ngaiin an lungleng thar em em thin a. He hun lawmawm tak hi chhungkaw kima an hman ho lai te an ngaihtuah a, an lungleng thar leh em em thin a nih hi.Chung an lunglenna te chu thu leh hla hmangin an puangchhuak a, hla nalh tak tak te, thuziak tha tak tak te a lo piang chhuak thin.
Kohhran pawhin he hun hlut zia hi a hria a, ropui tak leh a hlu thei ang berin a hmang a,ruai nen he hun hi kan lawm mup mup thin a nih hi. Pathian fakin hlim takin kan zaikhawm a, Kohhran hruaitu te'n Pathian thuchah ropui tak tak an puang chhuak a. He hun ah hian Pathian fakna hla ropui tak tak leh Sermon tha tak tak a lo piang chhuak tawh a, a lo piang chhuak leh zel bawk ang.
Naupangte pawhin he hun hlut zia hi la hrethiam kim phak lo mahila kan thawmhnaw neih nalh ber ber kan ha a. He hun atan bik liau liau thawmhnaw thar kan lei chu ha in kan theihtawp in he hun lawmawm hi kan hmang thin a nih kha. Thingtlang lamah phei chuan Masi ruai thehna tur Changel hnah kan pu a, a va hlimawm thei tak em!
Heng zawng zawng lo paltlang tawh kum upa lam kan pi leh pute pawhin he hun lawmawm a lo thlen a piang hian an vanglai nunhlui te an dawn kir a. He hun lawmawm tak mai hi hlim tak leh lawm tak a tu dang mah ngailo a an lawm thin laite kha an ngaihtuah kir a. Khang hun laia an thiante, an hmangaih kal ta te an ngaihtuah kir a, an lung a leng vawng vawng thin a ni.
Khawvel awm chhung chuan Krismas hi a la awm zel dawn a, kan dam reia kan hman rei poh leh kan lung a leng tial tial mai dawn a. Chuvangin Krismas kan hman apiang hi nakin zela kan lung tileng tu, kan hriat reng tlaka hmang turin inbuatsaih ila, tichuan nakin a kan inchhir zui vawng vawng natur thil kan chungah a lo thleng lo ang.
Nang leh kei hian Krismas thawnthu lunglenthlak leh ngaihnawm tak kan ziah dun a kan neih dun theih nan he hun lawmawm hi a tha thei ang berin hmang ang aw? He hun neitu Lal Isua duh zawng hre rengin mi dangte thilpek pe in em ni kan hman ang? Nge he hun neitu Pathian fakin kan zaikhawm tluk tluk zawk mai dawn? A nihloh leh hlim takin kan thiante nen ar te kan kang ho mai dawn em ni?
Ruihhlo leh a kaihnawih sual ti miahlo in he hun lawmawm tak hi nakina kan lung ti leng ber tu atan i hmang dun ang aw? Am takin chen ila, a neitu Lal Isua pawhin a chhinchhiah ve reng tlak, a lung ti leng tu ber ni turin he ni lawmawm hun tawite hi i hmang dun ang - kan pahnih in.
Comments
Post a Comment