KAN INNGAIZAWNG EM?

Chapter XXVII

Lal Isua leh Vantirhkoh inni em?

Zirtawp Zan 7:25PM

Thlasik a ni tawh avangin khua a vawt vin reuh hle a. Rinawma chu Dawrpui Vengthar atangin Mali te in pan a chhuk mek a. Arsenal Jacket, Cotton Jeans uk leh Converse rawngsang, a dum leh vara tial ang kha a ha a. Mali te in ah chuan a lut a. Rei lo te ah Vaiivakawn Field bula Krismas Present pek an tum te in lam pan chuan an chhuak ta a.

Field an thlen chuan Mali chuan an kalna tur in chu Rinawma a'n kawhhmuh a. Chu in chu a mala ding, a bang leh a chung chu rangva a ni a. An inkawngka  chungah chuan Lalhmachhuana tih a lo intar a. Chu in ah chuan electric connection a la awmlo a ni mai thei- hmanlai chhuak Laltin chu a lo inkhai va va tih tukverh darthlang atang chuan a lo lang a. Rinawma chuan kawngka chu a'n kik kauh kauh a.

"Lo lut rawh...." 

Patling aw hian a lo ti a. Dimte a kawngka hawng chuan Rinawma te chu an lut a. Chhungkaw pa ber ni ngei tur chuan ketli hian mei thuk ah tui a lo chhuang mek a. Mali te lo lut chu a ngaihna hriatloh hmel tak leh mak ti hmel lek lek hian a lo en a. 

"Pu Hmachhuana i ni ang chu maw?"

Nui chungin Rinawma chuan a'n ti a. 

"Aw...ni e....engthil nge ni ta le?"

Mali chuan a lo chhang vat a-

"Hei ka pa Hma, in kawmchhak lawk ah khian ka awm a...in fapa Muantea te Sunday Sikul zirtirtu ka nia...ka thianpa hi Pathian thu zir mek a nia...Muantea Nu a dam tha em tih ngaihven pahin kan lo leng mai mai a nih hi.."

"Aw...a ni maw? In va fel in in va zawhawm ve le...Muantea chu dar 7 vel khan a muhil tawh a....hei Muantea nu pawh a tha zel e..a lo Malaria PF ve hlauh a lo nia...damdawi te a ei a..a la muhil lo ang...Muantea nu...Muante Nu..."

An in luah chu a zaulo a. Khum 2 a awm a. Pindan bang atan chuan puan an hman avangin inkoh thawm chu a hriat vek a. Tin, pindan lama an Bati chhit eng atang chuan khum 2 thla pawh chu a lang chiang hle a.

"A...Pu Hma...koh thawh kher pawh a ngilo...muhil rawh se...rei tak awm kan tum lo a...nangpawh i hnathawk te i chau awm sia...i muhil hma duh ang a..." 

Rinawma chuan a la sawi lai mek chuan Muantea Nu chu a lo tho a...a cherin a dawldang hle a...mahse nu hmeltak erawh a ni  tih Rinawma chuan a hre thei nghal a. A lerh vang a ni kher lo aw!

"E khai...nangmah hi mi Muantea'n kan zirtirtu nu fel deuh U Mali a tih thin kha? In va fel ve...lo inchibai ila..." 

Muantea nu leh pa te chuan Mali leh Rinawma chu an chibai a. Thuthlengsei, a nghenchhan plywood an bel tla bal nuai tawh ah chuan an thu a. Muantea Pa chuan tapchhakah a tui chhuan chu a vil mek a.

"Hei kan lo awm pheina chu rei ve deuh tawh mahse hna kan thawh reng avng hian hmelhriat kan neilo lutuk a. Muante U Mali pawh hi i hming chu kan hre zing hle nachungin i hmel kan hmuh vawi khatna a nia. Muantea Nu damloh atang phei hi chuan ka hathawh haw hian ka tei chhuak hman lo lutuk a..in beng varin in zahawm hle mai..."

"Ni e...U Mali chu Muantea sawi ang chiah in i fel a nih hi..i thianpa pawh hi a fel hmel hle mai...hei ka dam tawh lutuk a nia..min tawngatupui thin thu hi Muantea hian min hrilh fo a, kan lawm hle a ni"

 

Muantea nu leh pa te chuan an thiam ang angin Rinawma leh Mali chu an lo chhawn a. Muantea Pa chuan YMA No Var lian ah hian Ketli ung tha tawh tak atangin Thinpuisen hang a lo thli a. 

"Kha...hei hi in ve ta che u...a sen hang mai mai a nia...in in ve ngai emaw chu..." 

A sawi lai mek chuan Mali leh Rinawma chuan-

"Kan heh lutuk!"

Nui pah chuan an lo sawi rual thawt a....an zavai chuan an nui ham ham a.

 Muantea Pa chu a hnathawk a la inbual lo tih Rinawma chuan a hriat chua Mali chu a 'signal' zauh a. Thingpui chu an in zo vat a, Rinawma chuan a ipte atang in 'Envelope' sen a'n phawrh a. Inthlahrung aw deuh tak hian-

"Hei...Muantea U Mali hian Muantea hi Sunday Sikul kai a peih si a, chuvangin Krismas present ah kawrmawi leina tur pe ila a tia, kan inthawh tawm a. Hemi pe tur che u a lo kal kan ni ber a..."

Muantea nu leh pa te chu an lawm a, an tawng theilo. An zak a, mahse an thinlung chhung chu a va lawm si em! Chu boruak reilo te - 5 second emaw lek chu a reh in a va hlu em! Rinawma chuan -

"Muantea Nu hian lo dawng se la...Muantea U Mali hian Muantea Nu hi ha'n pe teh se..."

Mali chuan 'envelope' chu Muantea nu hnenah chuan a'n pe a..Muantea nu chuan kut khur dar dar in a la a. A lawm avang chuan a biangah mittui a luang a. Muantea pa pawh chu a hmelah lawmna leh beiseina thar a awm tih Rinawma chuan a hmuh hmaih lo. 

"Awi...sawi tur kan hre lo...kan lawm a ni...kan zak a...kan beiseiloh lutuk thil lawmawm a ni a...kan lawm bawk a.."

Muantea Nu chuan a sawi zawm theilo. Muantea pa chuan thil sawi tuma a ka an zuau lai chuan Pindan puanzar chu a lo in keu a, Mauntea chu a thophang hmel deuhin a lo kal a. Mali leh Rinawma te hma ah chuan a ding a.

"U Mal...in 2 hian Lal Isua leh Vantirhkoh inni em?"

"Ni lo e Muante...Sunday apiangin Sunday Sikul ah kan inhmuh kha..."

"Nih...U Mal...i thianpa hi Vantirhkoh a ni em?"

"Aih nilo e Muante...ngati nge a?"

Rinawma chuan Muantea chu a mal chunga pawm pah chuan a lo chhang a. Muantea chuan-

"Sunday Sikul ah U Mali te hian Isua leh Vantirhkoh te'n zan ah te min veng reng thin tih an sawi a. Nizanah pawh mut dawn ah ka tawngtai a. Vantirhkoh leh Isua hnenah Krismas thawmhnaw leina tur ka dil tawp a...a nu leh a pa tan te, ka nau Mimi leh Zualtei leh Zawmtea atan te...hei tunah in lo kal sia...."

Mali chu a hnuk a ulh a...engmah a sawi theilo. Rinawma chuan-

"Muante...Vantirhkoh leh Lal Isua chuan nangmahni pe turin min lo tir a..."

Chu inchhung tlawm takah chuan Krismas a intan ta der mai. 

(End of Chapter XXVII)