JJH AH NGEI!

'Love Story' ve deuh reuh nen a inzawm he Kolasib to Aizawl Sumo Service ah ngei hian ka chuang ta a - a neitute'n min la 'free'  zui a, ka lâwm hle!

A hmain he JJH Sumo in ka nuna thil a sawi tam zia ka ziah khan, he Sumo neitu Pu John Lalrem-a te chhungkua hi an lâwm der êm êm a. Phone ah min lo bia in Kolasib ka kal hun hun ah min 'free' tur thu min hrilh a. 

Sabereka Khuangkaih Chanchinbu ah JJH tih ka ziah an chhuah phei kha chuan an lawm der ve em em a, lawmthu min hrilh hial a ni. Hei tunah hun remchang tak neiin hei a thlawn in min phur ta hlauh mai!

He JJH Sumo chungchang ka ziah avanga ka zawhna dawn țhenkhat te-

"A hmeichhia nen chuan in inhmu em?"

"JJH Sumo kha ka hmu a, ka lo hrechhuak che!"

"Vawi engzah nge he JJH Sumo ah hian in chuan dun tawh?"

"I țhiannu nen chuan hlim deuhin awm rawh u"

Ka tarlang vek sêng lo. Sumo Counter ah Counter nghaktu, Driver, Sumo neitu nupui te'n min chibai liam liam a. Ka țawng theih teh lul nen ka lawm lutuk a, sawi tur ka hre lo!

Ni e....he JJH Sumo hmuh apianga 'inhrechhuak ang aw?' tia kan intiamna nen kha chuan kan nun chu a hlui ve tawh a, engmah han sawi dun leh tur a awm tawh lo. 

Mahse...he JJH Sumo erawh hi chuan kan damchhungin kan nunah thu a sawiin, thil hlui kha a lo 'refresh' leh fo dawn a nih hi!

JJH hian Sumo 2 an nei tawh a. Mahse kan lung tileng fo tur JJH Sumo hlui zawkah ngei hian Sumo neitu hian 'ticket' min laksak in ka duhber seat no-1 ah ka chuang a, ka lawm hle. 

Literature hlut zia hi ka hriat chian phah a, he tiang hun tawngthei tura min siamtu Pathian ropui ber rawh se!

Hei kan story chu-

JJH

A lampum ka hre lo. Sumo neitu hming lam tawi emaw a ni ang. Aizawl to Kolasib Sumo service hming a ni.

He sumo hi ka hmuh hmasak ber chuan Bawngkawn Durtlang road ah a lo ding a, kum 2015 January thla tir ah a ni. Kolasib sumo service hming ka hriat hmasak ber a ni a, sumo dang hi tun hnu ah an hming nen lam chuan ka la hre ta chuang lo!

He sumo ah hian ka la chuang lo a, mahse he sumo JJH hi ka hmuh a piang hian ka lung hi a leng ve ringawt zel! Kum 2014 kum tawp lam ah khan Kolasib Hmar Veng ah thiantha tak pakhat ka chhar a, kan inbia a, kan inngaina a, kan inhmangaih ta hial in ka hria. Chuti teh nuai a nih tak avang chuan an khaw Sumo service hming ka hriat hmasak ber chu JJH kha a ni a, chuvang te pawh chu a niang-he sumo hi sumo dang ang maia ka en theihloh hlen tak.

Kum 2015 kumtir a Odisha-a ka chhuk leh hnu pawh khan he sumo hming hi ka thiannu nen chuan kan sawi chhuak fo a, kan nuih pui a, kan hlimpui em em thin a, kan lunglen kha kan hnem dun thin. Mahse he sumo ah hian kan chuang dun pawh a nilo a, kan hmelhriat pawh an ni chuang lo. Mahse kan sawi chhuak dun ve ziah-JJH!

Kan inkar a hlat em avang khan kan awm dun tam lo a, Mizoram ka lo haw ve lai pawh in district hran daih kan nih avang in kan awm dun thei chuang lo. Kei atan Kolasib zu kal mai kha thil awlsam a nilo a, WhatsApp hmangin mahni in atang khan inngai deuh chung khan kan in ‘chat’ a, chu chu kan inhnaih dan ber chu ni mai.

Kum 2015 May thla vel ah chuan kan inbe zui ta lo a, kan inkar a hlat em avang khan ka tan chauh a awm kha a ngai ngamlo ni in ka hria a, ka rilru chu na hle mahse kei pawhin ka dem hran lo a. Khaw hmun lo, chu mai nilo a Mizoram ah pawh awm dun lo kan la nih leh zel avang khan kan inkar boruak a thil ropui tak kan din kha thla nga hnu vel ah chuan a zam ral tan a…a zam ral hlen ta.

JJH Sumo kan hmuh a piangin inhrechhuak ang aw-kha kan ti a. Kan inkar ah engmah a awm tawhloh hnu ah pawh he JJH Sumo hi chu a la awm reng-JJH Sumo kan hmuh a piang in inbox lam ah JJH Sumo kan hmuh thu kan la inhrilh ziah-vawiin ah pawh JJH Sumo chu a ‘photo’ ka zuk thawn kha!

Durtlang a ka awm hnu hian Bawngkawn hi kan paltlang fo a, mahse JJH Sumo hi ka hmu zing  em em chuang miah lo a. Inrinni ah Aizawlah kan chhuk thin a, Counter ah JJH hi a din leh din loh te ka melh ru ziah a-mahse kan chhuk leh chhoh lai hian ka hmu ngailo. A chang erawh chuan Aizawl veng khawi emaw lai ah a lo tlan ka hmu leh nawlh thung a, ka lung a leng leh zeuh zel-JJH!

Kolasib hi ka dam chuan ka la kal leh ngei ang nga, chutih hun ah chuan he sumo ah ngei hian chuan ka tum tawh ang.