TUNGE HLAUH TUR?

Matthaia 10: 26-31

Mizo Kristiante hi hlauh ngah pawl tak Kristian kan ni – han ti ila, kan rilru lo na lo se. Kan thil hlauh tamtak hi, a chhan bul ber chu Bible kan zir ngun tawk loh vang leh kan hrilh fiah dan dik hlel thin hi a ni awm e.

Tun hma atang tawhin Khawchhak Lungpui te kan hlau a. Khawvel tawp a hnai tih hrilhlawkna ang chi te kan tuipui em em a. Mi tamtak kan chi aiin kan thla a ngam lo a, Kohhran chhuah san mai tawk te hi kana wm leh thin. Chuti ang chu tun hma atanga kan Kristianna avanga kan kal sual thin dan kawngkhat a ni.

Kohhran Upa nenmngeh, kum tam fe rawngbawl tu mi tawh te pawh heti ang zirtirna siper leh hlauhawm lam hlauh vanga Kohhran a nihna hlip a Kohhran atanga kal peng ta hi kan awm fo a. Tun hnai lawkah pawh Aadhar Card hlauh vanga Upa nihna leh rawngbawlna chawlhsan huama Kohhran chhuah san kan awm kha. Tin, Thupuan Bu a Sakawlh hi Mizo te anga buaipui Kristian dang hi an awm ve a nih pawhin an tam lo mai thei.

Heng thil tamtak a thlen chhan hi kan hlauh vang a ni a. Bible ah a inziak si a, chu chu zir chianglo leh hrechiang lova kan rindan leh khawvel boruak inlumleh dan kan thlir a kan hrilh fiah thin avangin kan buai zo ta thin. Chutih rual erawh chuan khawvel lo danglam zel tur thu Bible in a sawi hi kan hnawl vek thei e tihna erawh ani lo.

Kan zui ber, kan rin leh kan innghahna Lal Isua hian eng nge hlauh tur min zir tir tih hi kan ngaihtuah ngun ngai em? A chunga Bible kan tarlan Matthaia 10:26-31 ah hian Lal Isua’n amah ringtu te leh zuitu te hnenah kan hlauh tur leh kan hlauh loh tur chiang takin min hrilh a. Kan hlauh loh tur zawk hi hlaua kan hlauh tur zawk hlau lo tlat lawi si a nung Kristian hi kan ni em?   

Lal Isua’n kan hlauh loh tur min hrilh te hi lo en ila-

Chanchin Tha dodaltute

Lal Isua’n Amah zuitu te leh ringtute’n ti tura min duh ber chu Chanchin Tha hril hi a ni. Hmun hla tak thlir lo in India ram chauh pawh hi en ila Kristian tlem zia leh kan hmabak tam zia chu kan hre nghal vek awm e. India ram hi Hindu ram ah siam an tum tih te chu kan hre bel hneh hle ang. Tin, Chanchin Tha do dal vanga Missionary boral ta te pawh kan hre nasa tawh hle ang.

Chung zawng zawng karah chuan Lal Isua hian Chanchin Tha hril hi hlau tur kan nilo a, doadalna leh tihduhdahna karah pawh huaisen taka Chanchin Tha hi puang darh zel tur kan nih thu chiang takin min hrilh.

Taksa chauh tihlum theitu chu hlauh loh tur

He laia Lal Isua thusawi pawh hi Chanchin Tha huang chhung a mi bawk kha a ni. Chanchin Tha dodaltute’n an tih theih vawrtawp chu Missionary te nunna laksak a ni. Mahse ringtute chu thlarau thi theilo nei kan nih avangin kan taksa chauh tihlum theitute chu hlau tur kan nilo tih Lal Isua’n min hrilh. Thlarau tam tak boral mai turte hnena chautuan nunna hrilh tur hian Lal Isua’n min duhin thih thak thleng pawha thawk tur kan nih thu helai ah hian min hrilh chiang hle a. Taksa thihna ringaw hi chua kan hlau tur a nilo tih min hrilh.

Hlauh tur dik - Pathian

He lai tak hi sawi uar tul leh pawimawh zawk chu a ni ang – tuna kan Kristian nunin a mamawh chu.  Thil dang leh eng eng emaw siper vel hlaulo a Pathian chauh hi hlau tur kan nih zia hi kan sawi uar a ngai hle. Hmangaihna Pathian, lainatnaa khat, khawngaihtu adt a nihan phena hremhmang, phuba la thin leh a thuawihlote chantuan hremhnuna paih tu tur Pathian a nih hi kan hriat chian a pawimawh hle awm e.

Lal Isua khan Pathian hi hlau turin a hnungzuitute min chah ngun hle a. “ Gehena-a thlarau leh taksa tiboral theitu chu hlau zawk rawh u” (Mt. 10:28) tiin min chah mawlh mawlh a ni. He laia Lal Isua tawngkam hman ‘boral’ tih hi tiriral vek, mi sualte’n chatuana hremna an tuar tur rapthlakzia uar taka a sawina a ni.

Pathian hi kan hlau em?

Tunlai khawvel changkang tawh lutukah hian Pathian hi kan hlau em tih zawhna hi chhan dik a har ber awm e. Mizoram bik pawh hi lo en tai la, kan Kristianna rei tawh ngaihtuah chuan kan Kristianna hi hma kan sawn phahlo viau hian a hriat thin.

Kristian Thalai te hi Biak in hawnga innei aiin inruk a innei kan tam zawk ziah a. Chu chuan inneih hmaa sex hmang kan tam tih a entir a, a awmzia chu Pathian kan tih tawklo tihna a ni thei bawk. Chumai nilo in tunlaia natna buaipuiawm ber HIV/AIDS vei hi India ram state zingah Mizoram hi kan tam ber tawh a ni tih Mizoram State Aids Control Society (MSACS) te chuan an sawi a. Chung zinga HIV hrik kan kai tamna ber chu ‘sex’ a nih thu an sawi bawk.

Ram inrelbawlna ah pawh Mizoram hi Kristian ram si ah chuan eiruk tamna ber pawl a rinhleh kan ni a. Kan kawngpui chhiat zia te chu mi zawng zawng hriat a ni. Kan ram hruaitute hi Kristian, kohhran Upa leh rawngbawltu te an ni. Kristian nive lo Chief Minister leh MLA te kaihhruai state aiin kan state hian hma a sawn lo in ‘power’ ah pawh tun thlengin kan la intodelh thei lo.

A chunga kan dinhmun tarlan pahnih atang ringawt pawh khian inenfiah kan ngai hle tih chu mi a ber tan pawh a hriat. Kan diklona leh kan sualna te hi thuplo a Pathian hmaa huaisen taka puangchhuak a sim hi kan ram damna tur pawimawh ber a ni.

Pathian hi tihtakzetin i tih nawn ang u. Chuti chuan kan rawngbawlna pawh a nungin kan natna leh kan harsatna tamtak hi kiangain a dam ngei ang. Pathian kan tih tawkloh chhung chuan kan rawngbawlna te hian rah tha a chhuah thei tak tak dawn lo a, a nget zel ang a, ringlo mite nuihzat leh hmuhsitin kan awm reng ang tih hi a hlauhawm hle.

Pathian tiha hlauh tlat hi Kristiante zawng zawng mawhphurhna leh kan tihtur a ni. Chuvangin Kohhran Upa, Thalai, Nu leh Pa leh Naupang te chen hian Pathian hi i hlauin i tih thar ang u. Chuchuan kan rawngbawlna pawh a chawinung ang nga, kan ram leh hnam, Kohhran hi Pathian ropui zia puang chhuak tu a lo  ni ang a, kan damna famkim pawh a lo ni ang.