PEN SEN

Zodin Bus stand atangin Ramhlun lam panin City bus ah ka chuang a. Chu chu ni 9 September 2017, Inrinni chawhma dar 10:24AM vel a ni. Bus hnunglam kawngka bulah chuan ka ding a, Bus seat hnung ber ah nula pahnih hi an thu a, an ti ti phei mawlh mawlh a. An thil sawi chu ngaihthlak ka tumlo chungin an thusawi thenkhat erawh chu ka hria a - nula senior an ni ve tan tak mai thu te leh Naupang Sunday Sikul Inkhawmpui tur chung chang vel te a ni. 

Ruah a tla deuh seng seng a. City Bus ah chuan chuang phei zel in Chanmari kan thlen chuan passenger an chhuk thawl a, keipawh a hnung ber seat ah - nula pahnih te bul ah chuan ka thu ve ta a. Chutih lai tak chuan Chanmari Bus stand atang chuan mipa naupang kum 7 mi vel tur hi a lo chuang ve bawk a. Bus conductor chuan khawiah nge a chhungte an awm leh khawia kal tur nge anih naupang kum 7 mi vel chu a zawt nghe nghe a, mahse an inchhana tak erawh chu ka hre ta lo.

Ramhnlun South Bus stand kan thlenin ka bula nula thu pahnih te chu an chhuk a, keipawh Indoor Stadium zawna chhuk tur chuan ka inring tan a. Chutih lai tak chuan mipa naupang kum 7 mi vel tur chuan ka thutna bul - nula pahnih chhuk ta te thutna ah chuan a lo in thawlh thawt thawt reuh a, ka tet lai te min ti hrechhuak ve khanglang a! Tukverh bul anih avangin thil thlir pah te kha a nuam thei em a ni. Chu mipa naupang pawh chuan chu chu a chak ve tih ka hre mai!

Chu mipa naupang lo thu chuan, " Hei hi I pen a ni em?" tiin Pen sen (red) ka thutna bula lo tla chu a lo lek chhuak a. Ka ta a nilo tih ka hria a. Ka rindan chuan nula pahnih chhuk zo chiah te ta kha a nih ka ring a. Pen Sen (Pentek Pen) chu ka'n en thuak a, Pen chhunga pentui 'refill' chu lehkha inchi 1 vela hlai hian a lo intuam a. Chu lehkha ah chuan hawrrawppuiin a neitu hming ningei tur hi pentui sen hian a lo inziak a, ka'n chhiar chu mak ka ti kher mai!

Chu Pen a a neitu hming ni ngei tur leh thil inziak chu - MABIAKI IS BAE.  

MABIAKI IS BAE

Mak ka ti reuh lutuk a! Pen pawh chu a neitu zawn ngaihna a awm takloh avangin naupang kut atang chuan ngawi renga la in ka ak ta a, hei tun ah pawh hian ka bulah a awm - pen sen chu.

Chu Pen mak ka tih reuhna chhan ber chu a neitu hming ni awm tak leh thil inziak chu ni. He hmeichhe hming pu hmeichhe pakhat hi ka hmangaih em em thin a. Kan inkawm ve lai chuan 'Bae' ti hlirin kan in ko bawk! Mizoram a 'Bae' tih tawngkam Social Media a lar hma khan kan pahniha vawitam kan inkohna tawngkam a ni a. Chu Pen ah kher chuan a hming leh 'is Bae' tih a lo inziak leh kher a, ka tan chuan a mak ve tlat a ni!

A ni nen chuan kan inhmu tawh ngailo a, kan chanchin pawh kan inhrilh tawh ngailo. Mi dang bulah hlim takin a hun a hmang tawh ang nga, keipawh in thla tam theihnghilh tuma rilru siama ka beih hnu ah ka theihnghilh tan tawh a. Tuna ka kalna tur Ramhlun Venglai ah hian ka theihnghilh ve tak tak tawh a ni tih nemngheh tuma kal ka ni a. Mahse...loh theihlohin he Pen Sen hian Amah chu min lo 'remind' leh hram nia!

He Pen hi a ta a nih pawh ka ring chuanglo a. Amah ang hming dang, 'Bae' tia koh ve thin tu emaw ta a nih ka ring. Amah hmangaih em em a theihnghilh hleitheilo tu kei, vawiina theihnghilh hlen tuma thutlukna siama kal mek bul ah kher - a hming ang chiah leh kan inkoh thin dan chiaha koh ve in Pen a'n theihnghilh ve kher hi mak ka ti mai mai a, ka lo sawi chhuak ve mai a ni.