MIZO KRISTIAN TE POLITICS

Mizo Kristiante hi inkhawm tam leh Sunday Sikul kaikim ah chuan khawvela Kristian tha ber pawl kan ni tiila kan sawi sual lo mai thei. Kohhrana inhmang tak tan chuan chawlhkar khat chhung hian Kohhran inkhawm, committee adt. awmloh zan chu tlem tak a ni ang. Zantin deuhthaw kan chhuak a, kan theih tawp kan chhuah thin a, a lawmawm hle. 

Kan inkhawm zin leh Kohhran 'actitvities' a kan chet dan ngaihtuah hi chuan kan ram 'Politics' hi zaa za a dik theilo a nih pawhin zaa sawmsarih tal hi chu dik tur a beisei a nih lai hian, a lehlinga vuttui thlawr bel an sawi ang hi kan ni hlauh thung a. Politics khelhmual ah hian khawnge kan Kristianna hi a awm thin le? Khawnge Lal Isua hi awm?

Mizo Zirlai Pawl (MZP) in Zirtirtu semrual tura Sorkar a nawr lai khan Kohhrana Thalai hruaitu nimek pakhat chuan a nihna chelh chhuanlamah hmangin 'transfer order' sut tur in a ti a. Khawi hmunah pawh a eizawnna tura a thlan hna kha tha taka thawh hi Kristian awmdan tur a ni zawklo em ni le?

Kan ram roreltu te dikna (justice) kengkawh theilo a siamtu hi keimahni kan ni em? Dik tak leh tha taka thiltih hi tum mahse, a thlang tlingtu mipui te hian kan rilru ah kan hamthatna tur chauha thawk tura kan beisei vanga thlang tling kan ni em? Lal reng duh rilru pu tan chuan dik taka thiltih aiin tlin leh zelna tura rorel hi tun lai kan politics 'era' atan chuan tihdan fuh ber a ni mai lo maw?

A diklo, a chhia, a thalo tih hre reng chunga thil thalo tih duhtlatna rilru kan ram hruaitu te'n an nei tlat hi engvang ber nge? Opposition an nih laia thil tha hria, an Sorkar ve leh a thil tha an tih theih tak tlatlohna chhan te hi eng nge ni ang? Mipui te thiamloh nge kan ram hruaitu te? Mipuite pawh hian dik taka thil tih hi kan zolo em? Kan lungawina leh kan hamthatna tura ro an rel chuan midangte'n tuar deuh mahse pawi kan tilo em?

Biak in a lam nasa leh tawnghriatloh te pawh hre em em, Kohhran Upa leh Kohhrana rawngbawltu pawimawh tak tak te hi Mizoram Politics ah pawh thui taka inrawlh leh 'voice' nei, kan ram hruaitu te ngei thlang tlingtu te kan ni thin. Kan hruaitu thlanchhuah te ngei pawh Kohhran Upa te an awm nawk bawk. Mahse kan rorel dan leh kan ram kaihhruai dan hi Kristian ram hruaitute rorel dan tur a ni em?

Thalaite'n Politician te hi Vanram kailo tura kan ngaihruk deuh tlatna rilru hi eng vang nge? Eiru tura kan ring tlat mai te hi eng nge chhan? Party thar dinin kan ram siamthat hi mi tute'n emaw duh mah se ngatinge kan rin zawhloh? Ngatinge kan ram siamtha tu tur a kan rin zawhloh? Thahnem ngaihna vanga party thar din te thlan tlin aia party lian sa, nghet leh upa zawk te hi kan ram hruai tur a kan thlan tlin leh tlat zawk? A chhan tamtak zinga pakhat chu Sorkar tura kan beisei zawh loh thlan tlin ai chuan Sorkar an chang ngei tur a kan rin thlan leh mai tunlai atan chuan a finthlak a, kan hamthatna tur a awm zawk dawn bawk a kan rin vang a ni tiraw? A lo ni chiah bawk si a! 

Kan ram politics siamtha tur hian tunge a kaikuang ber nita ang? Mipuite leh Ram hruai mektu te hi inpuhtawn tur awmlo in kan mawhphurhna a in ang chiah. Kan ram politics hi hausakna atan nilo, ram leh hnam damna tur a kan kalpui a ngai a ni. Mipuite pawhin MLA te hi kan hamthatna tur atana ringawt thlang tlinglo in kan ram siamtha tura hnathawhkawr ha turin i thlang tling ang u. Kan duhna hmun taka min 'post' thei, sum leh pai min pe thei, hna min pe thei tur atan chuah kan ram hruaitu te thlang tling tawh lo in, chuti ang ti tur pawh chuan i beisei tawh lo ang u.

MLA te leh in candidate te pawhin hausakna atan te, Pucca building sak nan te kan MLA na hi i hmang tawhlo ang u. Duhsak zawng leh hmelhriat, kan party mi leh sa te han pek na kan ramah ro i rel tawhlo ang u. Kan chhehvel politician, Kristian pawh nilo kan tluk loh zia te hi hre chiang nawn ila. Kan MLA na te hi Mission Field a ni tih hriain ringlo mite te leh ram dang mite'n Kristian ram hruaitu entawn tlakah min hmuh theih nan kan rilru puthmang i thlak ang u. 

Missionary leh Pastor tam tak tir chhuak a chherchhuak thei ram leh hnam nimah ila kan ram roreltu Kristian te ve tho te leh a thlang tlingtu mipui Kristian ve tho te'n kan ram hi Kristian ram rolrelna anga an rel loh chuan Chanchin Tha hril pawh hi nakin ah chuan a la zahthlak mai ang! Mahni inchhungkhur enkawl fel thei mang silo a mi chhungkaw chunga rorel dik va tum ang lekah min hmuh hma hian harh ang u.   

Minister hmelhriat neih vanga hna hmuh, duhna hmun apianga transfer theih ni te hi Mizo Kristian te hian i zak tawh ang u. Kristian Kohhran Upa Minister, eiru tur a mipui te leh kan kohhran te'n min ngai tlat te hi thil zahthlak tawpkhawk a ni tih hi i hre nawn ang u. Kan nu leh pa te politics vanga hausa te hi keini an fa te hi chuan i zahpui tawh ang u. An thawhchhuah nilo, tute emaw chan ai laksak vanga Bike leh Car nalh tak tak leia khal leh 'ride' te hi keini an fate hi chuan zahna chang i hre tawh ang u. 

Mizo Kristiante politics hi Vanram kai pui theih, van ram kaina tlaka thangtharte'n kan ngaiha kan hmuh a kan hman theihna tur chuan tuna mi te hi kan pawimawh vek. Kan siamthat vat loh chuan ram dang mite'n Mizoram hi Kristian ram ni tawhlo ah an ngai mai ang a.

Politics tih leh corruption tih inzawm tlat te hi Kristiante rilru ah a bet nghet mah mah tawh. Kan tu leh fate'n Politics hi Hremhmun a tla tura kan ngaih chiang sa te khelh tawk tura kan ngaih tlat tawhna rilru hi paih bo turin tan i la thar ang u. Kan theih tawp kan chhuah ang a, a bak chu Pathian in a ti ang.