KAN INNGAIZAWNG EM?

CHAPTER - XIV

Aizawl ah

November 18, 9:32AM Inrinni

Mali leh Rinawma chu Ramhlun Indoor Stadium thlang bus stand atang chuan City bus ah Bazar lam panin an chuang dun a. Passenger an tam deuh avangin Mali nen chuan an thu dun theilo a, Bazar thlen hma chuan Rinawma chu a ding a. 

"Mal....enge nge ka leisak ang che?"

"Pawisa i neihloh kha..."

"Ka nei lawm Sangkhat....Miss nih manah thil leisak hrim hrim i ngai..."

"A ngailo tak tak a nia...Phaia inzin hunah i duh duh min lo leisak zawk dawn nia..."

"Hm...chuti nisi...eng nge tunah Bazar kan kalna chhan?

"Ka hre bik nang...Bazarah kal i ti miau sia..."

"Um....pawilo...tihtur tha deuh ka hria...."

"Eng nge?"

" I dam tha tawh tho tiraw? Ke a kal i peih ang tiraw?"

"Um...engtik thleng?

"Darkar khat vel ni mai..."

"Naa....ka peihlo sin......khawnge kan kal dawn reng reng a?"

"Min lo zui tawp rawh. Treasury ah Bus in i phei vat ang"

"Eng nge kan tih dawn...mawh??"

" Min zui phawt mai teh"

Israel Bus point bul atang chuan atang chuan treasury Bus stand pan chuan Bus ah chuan an  chuang dun a. Mali chu a phun niah niah a, Rinawma chuan a ngai pawimawh chuang lo a. Inhnial nuah nuah chung chuan Treasury bus stand ah chuan an chhuk ta nge nge a.

"Rinawm, eng nge kan tih dawn he tah hian? Motor a tam bawk si!"

"Chutak chu lawm duhthusam...ka kut hi vuan rawh le..."

Rinawma chuan a kut veilam chu a'n phar chhuak a.

"Ka duhlo...khawlai ah kut in vawn..."

"Nih...kawngpui hi ka 'cross' san dawn che nia.."

Rinawma chu kawngpui kan na tur an 'mark' ah chuan a kal phei a. Motor chu a tam ang reng fu a, an lo inzui  diah diah a.

"Hei Rinawm...min lo nghak rawh...keimah in motor tamna deuhah kawng ka kan thiam teuhlo a nia" 

Rinawma chuan a nghak tha duhlo der a, kawngkan tur chuan a kal zel a. Mali chuan hmanhmawh deuhin Rinawma kut leh dar vuan titih chuan kawngpui kan tur chuan a lo kal a. Inchelh chung chuan kawngpui chu an kan dun ta a.  

"Khawnge kan la kal leh dawn?" 

"Vana Pa Hall hnuai ah chhuk ila..."

"Chuan?"

Mali chuan a melh kiau a. Rinawma chuan hmeltha a ti hle a, mahse a sawichhuak duhlo.

"Min zui zel mai rawh..."

Mali chuan chulai velah chuan hmelhriat a neihloh bakah han kalbona mai tur chu a hre bik bawk silo a, a ngaihna hrelo fe leh phun nuah nuah chung chuan Rinawma chu a zui hnek hnek a, a titau deuh bur tawh mai. 

"Mal, Temple chhuk thlakna bul Traffic saw kan kan leh nga...Damdawiin kawt thleng bus ah kan chuang phei dawn nia.."

"Kawngpui 'cross' ziah hi ka ning a sin! Keimah a kan turin ka 'confi' bawk silo"

Rinawma chu a ngawi reng a. Kawngpui kan tur chuan a'n insiam rem a. Mali chuan lo hnaihchilh vatin Rinmawia rual chuan kawngpui chu a kan leh ta nge nge a. Insi riala kal dunin kawngpui chu a vawihnihna atan an 'cross' dun leh ta a. 

Bus nghah pah chuan Ice Cream 2 Rinawma chuan a lei a. Mali tuihal tawh chuan tui ti takin a ei dauh dauh a, a hmui velah chuan Ice Cream them chu a kai liai reuh a, Rinawma chuan hmeltha a ti kher mai. Mahse engmah a hrilh lo. 

Bus a lo thlen mek lai chuan Mali chuan a hmuia Ice Cream kai chu a 'hanky' chuan a'n hru fai a...tlemin a thlan lo tla deuh chuan a vun chu a ti nung sar mai bawk.

Bus hnung ber seat a thuthna 1 lo la awl ah chuan Mali chu a thu a, damdawiin kawt ah chuan an chhuk leh a. 

"Mal....kan haw tep tawh aw...

"Khawnge kan la kal dawn a?"

"E...MC khawt ah...."

"Kawng kan leh ngai dawn ni maw?"

"Um...vawiin atan chuan a tawp ber a ni tawh ang?"

"Kawngpui min kan pui hrim hrim hi maw i tum lo ni a?"

"Ni biklo e...thil leisak che ka tum a, i duh hrih silo a....tihian kawng kan kun dun ta mai"

"Hm...a va'n ho...."

"Aw...lo kal phawt teh...MC kawta thu pahin kan inhnial dawn nia....kawng chu 'cross' leh phawt ang"

Millennium Center kawt ah chuan kawngpui chu dar insi rialin an kan dun leh a. 

Tui vawt an in khawlh khawlh hnu ah chawl hahdam pahin MC kawt ah chuan an thu dun a, mi vei vak te chu an thlir dun a. Mali chuan a hrechhuak thut a-

"Eng nge vawi thum ngawt kawngpui kha min kan pui a? Eng nge a awmzia?"

"Awmzia a awm em em lo..."

"Hm...a van ho leh si ve!"

"Ho lo e...kawngpui kan i hlauh leh i hreh em em thin hi kan 2 in hlim tak leh him takin kan kan dun thei tihna nia..."

"Chuan...?"

"Nakin ah pawh kawngpui i kan leh dawn apiangin i bula awm angin min ngai zel tawh ang nga..."

"Hm...."

"Chuan ka kut leh ka dar hi vuan tlat chunga kawngpui kan ang ah i inngai zel tawh nga..."

"Kawngpui kan mai mai pawh i ngai 'romantic' hle mai! I chimawm hle mai a!"

Dar insi riala kawngpui vawithum kan dun chu - chumi an hman zawh dun dan chu a ni.

(End of Chapter XIV)