I TA KA NI

TV hi kum 4 vel kalta atang khan ka en mumal tawhlo a. Ka en ve chhunah pawh Football hi ka en deuh ber a. News leh thil engemaw deuh chauh ka en hman a, tunah phei chuan Hostel-a kan awm avangin TV ka en lo leh zual.

Kum 2016 Krismas dawna kan in a ka awm laiin LPS ah hian Lalngengpuii Tochhawng hi a lo zai a. Amah hi Mizo hmeichhe zaithiam ah chuan ka duh ber pawl a ni a, hemi tuma a hlasak 'I TA KA NI' tih phei hi chu ka vawikhat ngaihthlakna atangin ka duh nghal em em a. Tv-a a zai zawh veleh a hla sak chu You Tube-ah ka zawng nghal a. 

A satu hian a sak thiam bakah a thlûk hi nalh ka tiin a thu mawlh mai hian min hneh a. Khatih laia ka nun chau leh ro em em mai kha he hla hian a puangchhuak  chiang em em a. Chung ka nun harsatna leh buaina, ka beidawnna leh ka dinhmun zawng zawng te chu hreawm hle mah se Lal Isua ta ka nih zia leh Lal Isua rinchhana hneh theih a nih zia he hla hian min puanchhuahsak chiang hle.

He hla phuahtu Joy Zairemmawia chu a hla thu-Lyrics hi ka va dil a, a ni'n phal takin min lo pe a, a chungah ka lawm hle. 

Mihring kan nih chhungin hun harsa tak kan paltlang fo a. Kan nun a chauin a rûm fo a, pan lam tur leh kalna tur hrelo in kan awm fo țhîn. Chutih lai chuan Kristiante kan vanneihna êm êm chu Lal Isua kan nei tlat hi a ni. 

Kan mangan lai leh kan harsat lai takin Lal Isua'n kan dinhmun tawh mêk chu min hriatpui a, chu chuan kan nun chau leh hreawm tak chu a thlamuan a, thlamuanna leh hlimna kan nei țhin a ni. 

Engthil pawh lo thleng se kan nunah-thihna, mualphona vawrtâwp pawh-Lal Isua ta kan ni. Chung harsatna vawrtawp pawh chu Lal Isua kianga kan awm tlat chuan hnehin a lo awm leh nge nge țhîn a ni tiraw?

Kan rinna kawng ah te, kan rawngbawlna ah te Setana'n min tihchhiat tum in min bei a. Kan rawngbawlpui te, kan mi rin êm êm te'n kan chhiatna tur an ngaihtuah châng te lo awm mah se Lal Isua ta kan nih chhûng chuan kan hneh zêl dawn a ni. 

Kan nunah hian harsatna te hi lo thleng lo se chuan Pathian hi kan mamawhlo in kan hnaihloh phah fo ang. Hlimna leh lâwmna, hlawhtlinna te kan chan lai hian chung zawng zawng min petu Lal Isua hi theihnghilh in a awm fo a ni tiraw? 

Kan nuna harsatna hmangin Pathianin Amah hnaih turin min ko a, Amah kan kalbosan hlen lohna tura heti ang harsatna kan tawk țhin te hi kan va vannei êm tiraw? Chuvangin engkim kan chunga thleng hi min hmangaih vang a ni tih hi hre nawn fo ila. Amah kan neih tlat theihna turin engkim kan chungah a thleng a ni tih hi kan hriatthiam phawt chuan lawmthu sawi mawlh mawlh tur kan lo ni. 

He khawvelah piahah zawk kan nunna hi thuhruk a ni tih kan hriat chian phawt chuan he khawvel buaina, harsatna leh lungngaihna te hi tawk țhin mah ila kan nun a ti chhe zo tak tak lo a ni. 

Lal Isu, keimahni mai chuan kan kal thiamlo fo țhin a-i ta ni tur hian. He khawvel harsatna leh buaina te hmang hian Setana'n min ti buai fo a. I ta kan nihna lakah hian chhuhsak che tum in a hmanhlel nasa êm êm a. Chatuana i ta kan nih zel theih nan kan hnungah min chhawm la, kan hma min hruai sak la, min chelh tlat zel ang che. 

Keimahni maia kal dan tur leh i ta nih zel dan tur kan hriat tawhlo hun a lo thlen chang pawh hian min nei tlat la, i ta kan nih ang ngeiin chatuana i ta kan nih theih nan i hmangaihna kut in kan dam chhung leh kan thihhnu thlengin, chatuanin i ta ah min siam ang che. 

I TA KA NI

Phuahtu: Joy Zairemmawia

Satu: Lalngengpuii Tochhawng

Thlaler hmun khawharah, ka nun chau in a rum,

Tanpuitu ngaiin a au fo thin;

Thlamuantu khawngaihtu Lal Isua alo langa,

Ka nun riangvai rethei a thlamuang thin.

Engpawh thleng se ka lungawi ang,

Chhandamtu i kianga ka awm phawt chuan;

Khawvel hreawm Setan rallian lo hrang thin mahse,

Hnehtheihloh nun ka nei I ta ka ni.

Harsatna hringnunah alo thlen changte hian,

Hlimna ka chan lai aiin ka hnaih zawk che;

Harsatna ka dil lo che mahse aw ka Lal Isu,

Engkim hi i thu ang nizel rawh se.  

Thihna Lui piah lamah ka nunna thuhruk a ni,

Khawvel buaina te'n min chimbuai tawh lo'ng;

Mahse zanthim hnuaiah ka kal thiamlo keimah chuan,

Aw Isu min kai la ka hma hruai rawh.