LALRIMENTHANG

'Lalrimenthang' ka ngaihthlak a piang a ka rilru a zawhna lo awm nghal chu tunge Lalrimenthangi-i hi ni ang? tih hi a ni. Amah hi hmu in hre ngat ila chuan ka hau nasa in ka titi pui nasa ngawt ang! A chhan chu heti taka hmangaihtu hi sir ah a'n hnawl ngawt hi ka thinrim in, enge a chhan, eng vang nge, enge a phen ah awm??...zawhna chhan senloh zawh tur ka nei. 

Amah hmangaih em em tu hian Shillong-ah lehkha a zir san niin ka hria a. Hetih hun lai hian Facebook, WhatsApp etc chu sawiloh, Black & White TV hi a awm pawhin a vang hle ang-Mizoram ah chuan. Chuti khawp a inbiakpawhna-communication la chhiat lai, Love Letter hlut em em lai hun a ni ang a. Ngaihzawng neite tan chuan an lam pana Dak Pu lo kal hlut tur zia kha aw!

Shillong lama lehkha zirtur a kal hma hian Lalrimenthangi te in ah hian he hla phuahtu hi a leng ngeiin ka ring a. Inleng dang te haw tawh hnu ah Lalrimenthangi te bathlarah, thla eng thlir paha inkuah vawng vawngin, loh theihloha awm hran a ngaih dawn si avangin chu zan hun tawite ah chuan an inhmangaih tlat dawn a ni tih an intiam a. A tu ve ve mah chu midang ta nilo a an pahnih te chauha innei tawn tlat tur in-'Ka hmangaih che ka ta I ni' ti a thu thlungin an thlahliam a nih kha!

Mahse...ngatinge Lalrimenthang? Enge thleng? Eng vang nge?!! Nang hmangaihtu che hi thinglung kehchhe vek a i siam? Enteh...nangmahlo chuan a damzawh a inringlo a sin! I lainat ve lo mi? A țhiante leh mi dang te chuan an bialnu te nen Krismas ruaițheh tlai vel ah te tlai ni tla thlir in kut a inkai rialin an kal dun hlawm a. I hmangaih thin saw en teh...a rilru  nat zia saw i hmulo em ni? Kalpui tur, a nun tihlim tur, a zawng zawng a hmangaih ve leh mai tur haihchham in, a rilru a nangmah awm awm vawng vawng in, rilru na em em leh la hmangaih cheu chung che in a awm saw!!

Zan ah han mu se nangmah hlir a ngaihtuah a, chhun ah lah chuti bawk. In nun hlui te a ngaihtuah kir a, in ințhen hi a la ring phallo cheu a sin! Mahse i kalsan miau sia tiraw Lalrimenthang? Zan khawthiang taka Arsi lo eng un mai te chu i lo thlir ve ngai a nih chuan han hrechhuak ve hram hram rawh aw? En teh Lalrimenthang, i hmangaih țhin saw...a lainatawm takzet a sin! Hre reng lo mahla, khawngaihtakin hrechhuak ve țhin ang che aw?

Inchhir tumlo in a ni aia țha hi tawn leh ngei i inbeisei ang. Mahse ani tluka hmangaihtu che hi i tawng tawh ngailo ang-Lal Isua chauh lo chu! I kalsan tak, i hnawl tak Valrianga sawn in thutiam dun kha a der mai mai, i tihpuitlin leh loh tur a ni tih saw tun thleng hian a la pawm ve theilo cheu a sin! Nang erawh chuan ani nen a in nun kha kalsan in midang nen nun thar, bul thar i țan tawh si a tiraw? Mahse maw Lalrimenthang...ani tluka hmangaihtu che an awm kan ringlo a sin.

I bulah hian awm ila chuan maw Lalrimenthang, ka sawi nawk nawk che nga, ka thinrim lutuk hian i kalsan na chhan hre hauh lo hian ka hau hrep che nga; i ngeiawm in i sual lutuk tiin ka hau hrep ang che. Mahse Lalrimenthang, kan demlo che a, kan hmangaih reng ang che.  

    

LALRIMENTHANG

Phuahtu: F.Rokima

Satu: F.Zothanpuii, H.Lalthakima, Lalropuii Pachuau, Grace Lalchhanhimi (Mizo Idol artist)

Tlangtin leh mualtin ka thlir vel vawiin chu,
Ka awmkhaw har a zual nang tawn ah;
Hawilopar em i thliah lung her leh turin,
Lunghlui tawnah tlaikhua ka lo var leh thin.

Tawnmang mai a chan ka phal silo,
Hallo ten chhawrthlapui eng hnuai ah;
"Ka hmangaih che, ka ta i ni" min tih kha,
Lalrimenthang hmangaihna vanduai maw ni.

Nang lo chuan e, ka dam zo chuang hlei lawng e,
Mite zawng vangkhaw dai lam rawn ah;
Tuanpui di nen tlaitla par ang an lawm a,
Lalrimenthang khawiah nge maw i awm le?

Chhun ni a rei tiin zankhua a sei si,
Chin lem a nei love nang ngaih hian;
Chung siar mai khi maw lungrualna lo ni,
I thlir zan chuan rairah mi han dawn ve rawh.

Hmanah hmangaih biahthu kan sawi lai khan,
Samang then mi lo tum reng zu nia;
Duhtin lawrin tleidang va der zel mahla,
Kei ang reng a hmangaihtu i tawng lawng e.