LAL ISUA TA I NI

Johana 15:16a-" Nangnin mi thlang lo, keiman ka thlang zâwk che u a "

Internet 4G Speed hmanga kan nun leh hun kan hman mêkna khawvêl hi a changkângin a nuam hle a. Khawvel hi kan khualzinna mai a nih theihnghilh a châmhlen mai châkawm rum rum khawpin thiamna hi a sâng tawh hle. Khawvêl a thilthleng hi kan mut hmun ah kan Facebook, Instagram, WhatsApp adt hmangin a 'live' in kan hmu zung zung tawh mai.

Chu changkânna leh hmasawnna chuan thilțha leh changkâng a ken tel rual chiah hian 'sual changkâng' hi a lo kengtel ve zel a. Chu sual changkanga inhnamhnawih te tân chuan kan sual chu thup theih rual a nilo a, a thu leh lem-video chen in kan sualna hi reilote chhung in a darh nghal țhin a nih hi.

Țhalai, a bikin kum 18-30 inkar te hi kan nun tibuai tu ber chu ruihhlo leh inngaihzawnna in a nghawng hi a ni țhin. Kan duhdan leh nuam kan tih dan in khawvel kan hmachhawn ve țan a. A nuam ringawt leh hlimawm, kan tisa duhzawng ringawt a kan hun hmanna chuan a tâwp a min hruaithlenna chu nun beidawnna tâwp ah a nih hi.

Kan bialnu/pa, țhiante ta emaw kan nih kan inti a. Chuti ang chuan kan hun leh rilru chu an bulah kan hlân zo a. Kan hriatloh hlan in kan nun a chhe vek a, a tâwp ah Lal Isua pan kan hreh a. Nun tuilairap, beidawng leh thih mai duhna in kan khat a, chulam kawng chu zawhin kan nunna hlu tak chu kan la ta hial țhin.

Chung kan harsatna hrang hrang te chu-Nau tihtlak, Drug Addict, Sex Video/Photo, HIV/AIDS adt te an ni a, camera fiah fai țha tak tak hmaah a la ni zui-kan video/photo te phei chu! Heti ang harsatna tuar tu tana a nat zia hi Vantirhkoh țawng te pawhin kan sawi fiah zo lo ang! Kan inngaihtuah a, kan inngaihtuah ngun poh leh thihna chiah hi kan tawpna tur niin kan hre țhin-kan thlang fo bawk!

Mahse hei hi kan tawpna tur a ni rêng rêng lo-Lal Isua ta kan ni a sin! Kan hringnuna thil thleng zawng zawng hi-a palh a awmlo. Lal Isua ropuizia puangchhuak zâwk tur a kan chana Pathianin a dah a ni tih hi hrethiam ila chuan-Missionary ropui ber kan ni thei zâwk a sin.

HIV/AIDS vei, kalna tur leh pan lam tur hre tawhlo te hnen ah Lal Isua ta kan nih thu puangchhuak tur a koh i ni sin. A tidarh zêl tur veng a theihtawp a țan la tur a chunglam ruat i nihna hi i hmuh hmaih a ni. I dinhmun ang hi mi zawng zawng nih theih a nilo a. He hna harsa leh tun lai em em-khawvel in a buaipui mek hi Pathianin i ko ah nghatin he mawhphurhna hlu tak hi a pe che a sin. Midangte chuan a thu maiin an zir a, an tawrhna leh an harsatna tak tak hrethiam tu chu nangmah-a tak ngei a tawngtu hi i ni. Pastor te leh Counsellor te hi chuan an zirlai ah a thu chauhin an zir a, nang erawh chuan a taka nunpuiin he natna tuar a vei mek te hnena Lal Isua ta innih thu puangchhuak tur hian Pathianin a ko che a, i kalloh chuan tunge kal ang a, i hril loh chuan tunge hril ang le?

Nau tihtlak duh, ngam chiah silo te harsatna sukiang a Lal Isua hnen hruaithleng tura koh leh vohbîk i ni. Nunna hlu tak petu chu Pathian chauh a ni a. Kan nunna hi ata, a siam leh a duh ang a hmantur a nih zia hi nangmah ngeiin zirtir a-an entawn nitur a Lal Isua koh i ni.  Drug addict, mahni nun hlut zolo leh engmahlo mai ni a inngai tawh te hnenah Chanchin Țha hril tura i pian hma ațanga thlan leh koh i nih hi i inhre lo zawk a ni.

Nangmah anga Sex Video/photo nei te hnena Lal Isua ta in nih thu puang chhuak a hril turin Lal Isua'n a thlan leh koh i ni. Chuchu hreloin nangmah leh nangmah anga harsatna tâwk mêk te chu Hremhmunah in liam zêl mai dâwn em ni? Nilo e..nangmah kal tlang hian khawvel hi a hneh theih a, chuti ang a harsatna lo tawk ve mek te hnena Lal Isua hnen thlenna tur a leihlawn nitur a Lal Isua ta i nih thu puangchhuak tura koh i ni.   

Lal Isua ta i ni a, tun a i nun a harsatna i tawh mêk pawh hi a hre vek. Chu i harsatna ațang chuan nangmah leh nangmah anga nun beidawng, mualpho leh thihna kawng zawh mêk te hi Chatuan Nunna nei tur a thlan in ni. Chu thu puangchhuak a nun tam zawk nei tur koh i ni.  Tun lai khawvela kan harsatna lian ber leh khawvelin a buaipui ber-he sual hi hnehna hlado chham khum tur a ruat i ni. 

Nangmah ang an tihsual ve tawhlohna tur leh Hremhmun lama an kal lohna tur a koh leh thlan i nihna-i mawhphurhna ropui tak hi hlen chhuak a rawngbawl turin Lal Isua'n ata ni turin a thlang che.

Pum chhûnga ka siam hma che in ka hria che a,
Chhûl ata i chhuah hma pawhin ka serh hrang che a, hnamte hnêna zâwlneiah ka ruat tawh che-Jeremia 1:05.