WEEKEND

Chawlhkar tâwp a ni mai! Anganwadi ah kan zir țhin kha-Chawlhkar khatah ni sarih a awm; Pathianni, Thawhțanni...Inrinni. Weekend chu Inrinni tihna-according to Anganwadi!

Kum 2010, Sms Pack hman uar lai-duh duh zât Sms thawnchhuah theih lai khân kartâwp kan nghahhlelh chhan chu English Priemier League en kha a ni. Arsenal inkhêl kha nula rîm țhulh țhakin kan en țhîn a. Kan bialnu te pawh kan ngaihsak lo a, kan inhauh phah fo țhîn.

Higher kan kal lai kum 2007-2008 te kha chuan Weekend hi ka nghâkhlel lo țhîn khawp mai-lo lam ah feh ziah kha a ngai țhin a. Lunglei lama kan classmate te kha chuan class kal an peihloh avangin an nghakhlel hle thung.

Sorkar hnathawk te chuan kartawp an nghakhlel in, kartluana an tihtur tihhmanloh te tihna hun leh chawlhhahdamna hun ah an hmang țhîn a, chhungkua a hun hlim tak hmanna hun a hmang an awm bawk.

Durtlang a Hostel kan luh tirh a Weekend ka nghahhlelh theih zia kha! Insûk tur ka chhekkhawl a, inrinni zîng ah, Vai pathian thawhhma a tho in insûk tur zawng zawng bag ah ka thun a, bus chhuah hun nghak in zing dar 5 vel ah kan vei thuak thuak tawh țhin.

Bus ah kan chuang a, Chanmari ah ka chhuk ziah a. Ka kal țhinna ah tûkțhuan ei nghal in nilêng in chutah chuan hun ka hmang a. Ka insûk nghah ro pahin thlamuang takin hun ka hmang țhîn a nih kha. Khatih lai khan Hostel ah insûk a theih tih hi hre mahila ka insu ngai lo a, a ro hman hi ka ring ngailo.

Chuti ang reng chuan kum 2020 thleng ka awm thei dâwn emaw ka tih laiin July thla tâwp ațang chuan insu turin Hostel a ka awm a ngai a, ka nuihpui, ka hlimpui, ka nghahhlelh Weekend chu ka huphurh, ka rilru ti baihvaitu Weekend ah a chang ta daih mai! 

Tun ah phei chuah hei, Hostel ah kan mu ta mai mai a. Insûk pawh a lo theihin, a lo ro hman nameuh mai. Kartawp a chhuah chu pawisa a hek tih te kan hre ta zêl a, sum kan save duh vang êm êm nilo in chhuahna tur kan hriatloh vâng zawk a tawmim ta mai ka ni tih erawh ka inhrechiang hle. Chhuak ziah, chhuah nuam ti êm êm ka han chhuak peihlo ta thut hi ka inhmehlo. 

Weekend chhuah châkna thlarau, chhuah chhan tur thil in min luahkhah tâkloh ah chuan tihian kan awm ta vêl mai mai chu nia! Engtikah tak chhuah chhan tawng leh ang i maw?!

Kartâwp a kan inhmuh ziah lai, in in a tûkțhuan kan ei dun ziah lâi te kha a ngaihawm ve rum rum mai. Engtikah emaw chuan Weekend hlimawm tak, phurawm tak leh nghahhlelh awm tak hi kan la tawng leh ngei ang.