Aizawl tlâk lam a ni a, ruah a sur deuh cherh cherh reng a. Lei tawlh fo chuan in leh lo a ti chhe mêk a, eng chen nge lei hi a chêt in a tawlh ang a, in leh lo hi a tihchhiat belh zêl ang tih chu chulai hmun a awmte ngaihtuahna luah tu lian ber a ni.
In țha pui pui leh man to tak tak te chu lei tawlh chuan a hnûk liam tawh a. Mi tam tak in an in leh lo luah ngamlo in chulai hmun chu an chhuahsan tawh bawk. Khawtlâng, Kohhran leh ram pawh an buai ru a, theihtawp chhuah in chu lei tawlh zêl chu tihtâwp dan tur an ngaihtuah a ni.
Chu leimin na ațang a hla vaklo ah chuan hmeithâi pakhat a awm a, a vah te pahnih nen. Hmeichhe awmnêm, pasal sûn tawh, chumai nilo in fa sûn tawh a ni bawk. A pasal boral ta in chu rochun in a vah te pahnih chu a awmpui a. A vah te tan chuan a ni chu engkima engkim a ni.
Zan a ruah a sûr châng te, an țhenawm te in leh lo lei tawlhin a tihchhiat lâi te chuan rilru mangang ru tak leh țhenawm te lainat êm êm in hun a hmang țhîn a. Mahse tihtheih engmah a nei lo. A vah te pahnih tan chuan thlamuanna tham nimah se a ni ngei pawh chuan thlamuantu a mamawh.
An in leh lo te chu a min ve ang em? Engtin zêl nge an awm ang? Enge an hmabâk a thil lo thleng zêl tur hi? Chûng zawhna chi hrang hrang, a chhânna dik hriat theih siloh chuan a rilru a luah reng a, mahse engmah tihtheih a awm lo.
Tun ah chuan Aizawl ah in leh lo țha, hmun nghet neih chu thil harsa tak a ni tawh a. Sum leh pai tamtak nei tân lo chuan in leh lo nghet neih a har tawh zia chu a hrechiang ber tu te an ni. Chung harsatna zawng zawng te chu hriatpui velo ang maiin lei chu a tawlh leh țhîn a, in leh lo țha tak tak te chu a chim rem rum ta fo mai!
Biak In sak zawh țêp tawh te pawh chu a innghahna lei a khîk tawh avang in loh theihloh in an chhu chhe leh mêk a, an va lainatawm tak! Sum tam tak sêngin, ngaihtuahna leh tha tam tak sêngin an sa zo titih tawh kha a ni a. Mahse țhiah a hmun dang a sak țhat leh vek ngaiin an awm ta si.
Leimin in a tihchhiat in leh lo neilo te chu an țhenawm khawveng te in ah an riak a. Chhuat ah mu in mikhual an va nih phah a, an lainatawm hle! Mahse chutih rual a an vêng a Zonunmawi lo lang chhuak chu hmuh hmai rual a nilo. Engkim a thlum a al eiza in mutmu an tuah za a, an lunngai tlângin an thlaphâng tlâng a, hlim tak in an nuiza bawk.
Chûng zawng zawng te chu chu lai hmun ah chuan a thleng tawh a, a thleng mek a, engtikah nge a tawp ang le? An in leh lo la chhe velo te pawh chuan chung chhiatna chu an chung ah a lo thleng thei a ni tih chu ngaihtuahna mai nilo in an mit ngeiin an hmu a, engkim chân vek thei an ni tih an inhrechiang hle!
Chu hmeithai, țawngkam dang a nuthlawi, nep ve tak pawh chuan chung thil chu a ngaihtuah thleng vek a, mutmu pawh nghar mut bak in a tuah meuh tawh lo.
"A Nî, engtik thleng nge lei hi a tawlh zêl ang le?"
"Bawihi, ka hre bîk hauhlo mai!"
"Kan in te hi min ve ta vek se khawi ah nge kan awm tâk ang le?"
"Bawihi, ka hre bîk hauhlo mai! Thil pakhat chiah ka hria"
"Chu chu enge ni ã Ni?"
"LAL ISUA KAN NEI"
Comments
Post a Comment