Teh tawp a! A khaw neitu te pawi pawh kan sawi ang tih a hlauhawm khawp mai! Mahse...a ni miau a....engtin maw?!
Kawrthah khua ka hriat hmasak berna chu kum 2006-a Central Kristian Țhalai Pâwl General Conference, E. Lungdâr a an nghah țum khân a ni. Pâwl 10 result kan nghah lâi a ni a. Kan bial ațangin KȚP General Conference hmang tûrin E. Lungdâr ah kan kal a. Kan thlen in ah khân mikhual 80 chuang kan thleng a, chûng zîngah chuan Kawrthah Nula fel êm êm 2-Rinthangi leh Biakêngi te ka hmel hriat a, chu chu Kawrthah khua ka hriat țanna a ni.
Conference chhûng zawngin kan inkawm ho a. Kan inkhâwm tlâng a, kan Fellowship ho a, thlen in ah kan haw ho leh dial dial țhîn. An khua chu a hla hlê tih kha ka ngaihtuah thiam ve mai-a chhan chu Conference țiak zân, Sunday zânah khan an mu ve tawh lo a. Thawhțanni zîng dar 1 ah Kawrthah lam pan a an haw avang khan.
Aizawl ka la kallo a, Kawrthah awmna pawh chu Map en lo chuan ka hrelo. Aizawl ațangin Company pêngah an chhuk dawn tih te min hrilh a, Company pêng pawh chu ka hre chuang lo. An hawna tûr Bus a chhuah thleng in kan han thlah a, chu chu tûn thleng a kan inhmuh tâwpna a ni ta hrih.
Khatih lai khân Mobile phone a la tam lutuk lo a, BSNL kha mi tam ber hman a ni a. Tlâng ah lâwn in Mobile phone in min biak pawhna tur number kan pêk kan Kohhran Upa te PCO ah khân min lo be ve zauh zauh țhîn a. Keini'n a châng in Land Line ah kan zuk be ve leh zauh bawk a. Kawrthah a vêng hming ka hriat chhun chu Hospital Vêng leh Dâm Vêng a ni-Rinthangi leh Biakêngi te vêng a nih avangin. Tichuan Lehkha te thawn in thlalâk te kan inthawn ve hman a, chuti chuan kan ințhianțhatna chu a thâm ral zo.
Tichuan khawvêl a lo kal zêl a, kum 2016 a Khawthlang Presbytery vawi 94-na Zawlnuam a neih tur ah ATC a kan hotute'n Presbytery hmang turin ATC ațangin BD zirlai 2 min tîr a. Kawrthah chu a hming ka hriat ațanga kum 10 hnu ah ka zuk hmu ve ta a nih kha! Hospital kawt ah Thingpui in a kan chawlh lai te chuan kum 2006 kha ka ngaihtuah kîr vang vang mai!
Hei hi chu thawnthu hlui pakhat mai a ni! Thawnthu tharlam zawk chu Presbytery kan kal hma deuh lawk a min țhen tu kha Kawrthah khua a ni! Khawthlang Presbytery ka kal dâwn tih ka hriat tirh a ka phûr teh rêng nen, a hun a lo thlen chuan rilru kehsawm vekin ka kal mêk chu a ni ta si a!
Presbytery kan hmang zo a, MZP te'n Kawrthah ah Article of The Year lawmman min hlan dâwn avangin zan 3 riak a ka châm a la ngâi zui a, tuemaw nên a kan inkar țhat lâi kha nise a nawm dâwn teh rêng nên-thinglung kehsawm vekin Kawrthah ah chuan ka châm ta a. Tuemaw kha chu ka thlenna vêng piah lawk ah khân a awm reng si a!
Kha Kawrthah Nula khân min ti kehsawm vek a, mahse dem tûr chu kei ka ni. A chhan chu-ka ta ni tûrin ka chelhbet zo miau lo a! Ka tlachhe vek a, ngaihnêp hlawh khawp in ka zahpuiawm a. Kalsan tlâk khawpin ka kehchhia! Ka sawi thiam dan ber chuan-min that a ni!
Thla tam fe ka thî a, tûn ah chuan Pathian zarah ka lo nung ve leh ta. Kawrthah khua an sawi a piang hian ka thihna hmun a ni-tiin ka rilru hian a lo ngaihtuah ve ziah a, chuvangin heti hian ka ti ta mai-Kawrthah in min that!
Comments
Post a Comment