Kei Thingtlâng Naupang hian Facebook awm hma khân 'Nute Nî' (Mothers' Day) hi a awm tih ka hre ngailo a, ka nu phei chuan vawiin thlengin a awm tih a la hrelo ang. Chuti khawp a ropui lo fapa chuan Nu ropui tak ka nei lo bawk. Mahse vawiin thleng a hlim tak leh lâwm taka ka la awm theihna chhan hi Pathian leh ka nu vâng a ni tih erawh ka hrechiang hle.
Min hrechiang êm êm tu ka nu hian naupang harh tak, lên cheh êm êm ka nih lai khân ka lenna ah min zawng a, lehkha zir turin Km 2 a hlâ a ka lenna ah min lo kal chilh in min hruai haw țhîn a, lehkha min zirtîr țhin.
Lunglei a nitin Sikul ka kal avang in Tûkțhuan chawhmeh leina aiin ka bus fare tûr a ngaipawimawh a, chuvang in 'Rum Pum' leh Purûn Sen kha kan hmeh mai mai fo.
Krismas ah 'Krismas Thawmhnaw ' kan neih ve ngei theih nan Anganwadi Helper thlatin hlawh ₹250/- kha a khâwl țâng țâng a, Krismas ah kan unau 4 kawr min leisak ziah țhîn.
'Garden' tih thumal a chhiar thiamloh avang leh a awmzia a hriat loh avangin a rilru a na êm êm a, a fate 4 chu Matric Pass vek turin min enkawl a, Pathian in ka nu tumruhna chu mal a sawm a, tûn ah chuan engmah nilo mahila Pathian leh ka nu zâr ah liau liau Pawl Sawm kan unau za in kan pass kim ve tawh.
Kan level pui nive a kan hriat te'n Inrinni tin Vawksa an hmeh ziah theih laiin ka nu chuan chûng chawhmeh tuihnâi chu keimahni vâng a lei ve phallo in kan Sikul kalna sênso ah a hmang zo a. Chawhmeh țha min hmeh pui lo a, 'Ajino-Motto' mai mai min hmehpui țhin te kha kan thinrim țhîn a, mahse vawiin ah hian a lo hlutzia kan hrechhuak ta! Nu.....kan lâwm e.
Min hmangaihna hi kan rûl zo ngai dâwnlo che. Mahse he khawvel ah hian kan unau za hian châwimawi tûr kan zawng a nih chuan nang, nu te takte, mâwl ve tak, rethei ve tâk bâk hi châwimawi tûr dang kan neilo tih hrechhuak tûr a min enkawlna hi kan va lâwm êm!
"Lalpa, keini tân a Nu țha tak mîn pek avangin I hnên ah lâwmthu kan sawi e"
Comments
Post a Comment