INDONA

Mizoram Baptist Pastor Rev. H. Killuaia Pathian hla phuah 'Indona' tih hla hi ka ngaihthlak a piang hian ka nun ka hmu chiang țhin a.

He hla hian ka nun chhungril ber, mite hriat a ka puan chhuah ngamloh, mahse Pathian in chiang taka a hriat si ka nun dan diktak hi a pholang chiang êm êm a ni.

He hla chângkhatna thu ang hian ka nun chhungril hi a râpthlâk ka ti țhîn a. Thil țha tih duhna tam tak awm țhîn chu sual lam zâwk hian hneh tum in a nêk sawr a, a chak zâwk fo rêng a ni.

Sual leh Țha chu nasa takin ka chhungril nun ah a indo a. Van a Pathian leh Setana indona aiin a nasa zâwk a, min hmangaihtu Pathian rilru hi a na in ka va han timualpho zing tak êm!

A châng hnihna thu ang hian thil țha leh sual chawhpawlhin ka nung a, ka thil tihsual țhin te chu thupin mite'n hrelo mahse keima nun chhungril ber chu a tichhe telh telh a.

Ka nun a châu in ka chhiatna tûr thil zel chu ka thlang a. Nun beidawng ru ngawih ngawihin ka awm fo a. Pan lam tur zâwk hrelo a ka awm lâi chuan Setana'n min hneh telh telh a, dingchhuak a Lal Isua lam pan leh tûr a chakna leh phûrna nei tawh miahlo tûrin min bawi bet tlat tawh țhîn.

A châng thumna thu mawlh mai hi...ka nun rimchhia, chawhpawlh nun hi ka ning a, hreawm ka ti êm êm țhîn. Mi dangte'n chu ka nun tenawm tak chu hre velo mahse Pathian Thianghlim chuan a hre vek si a!

Lal Isua thisen chauhlo chuan he ka nun țawp tak hi a tifai zo tawhlo a. Amah chauhlo chu ka nun thlâk danglam thei an awm tawh lo. Chuvangin keimah chuan chakna ka nei tawh lo, Isu min pui rawh.

Chuti chung chung chuan Lalpa, min la khawngaihin hunțha min la pe cheu hi ka lâwm êm êm a. Ka tân hian i hlu ber a, thil dang ka ngaihsak zâwk te hi ka natna, ka zahna min thlentu a ni.

I fapa Isua Krista thisen chauh hi ka tân a damna kim awm chhun chu a ni a. Ka sual zawng zawmg silfai theitu chu I fapa thisen chauh chu a ni.

Khawngaihtakin ka nun hruaitu leh thuneitu ber lo nila. Nangmah chauh hi ka chskna leh sual ka hneh theihna a ni. Setana hma a zâm a ka tlûk nawn fo loh nân min hruai la, I zârah chauh he ka nun rimchhia hi ka hneh thei ang.

Indona

Phuahtu: Rev.H.Killuaia

Satu: Mizoram Synod Choir

Indona zawng a rapthlak ber ka nun hi,
Lehlam lehlam ah neksawr in a awm a;
Van indona aia nasa zawk a ni,
Hruaitu Krista nih suh se ka tlawm ngei ang.

Krista mi hruaitu hnehtu Lal ropui chu,
Ka chakna leh ka thiltihtheihna a ni;
Ka zam ngai lo'ng Setan ral hma ah,
Hnehna chu ka ta a ni tih ka hria.

Lehlam lehlam ah lungawi tum a nun hi,
Mahni himna tur a tih nimahsela;
Chhiatna za khua thlentu mai a lo ni si,
Tuilairapa awm an dingchhuak ngai love.

Aw, ka nun rimchhia hi ka va han ning tak em,
Mahni chu inpawh hram hram thei mah ila;
Thianghlimna Pathian chuan a thei ve silo,
Min ti thianghlimtu Lal thisen i tello chuan.

Ka lawm e Lalpa, i thisen avangin,
I angchhung ah ka muang (lungsi in);
Ka tan i hlu thildang zawng aiin,
Ka Lalpa thisen min ti thianghlim tu.