CHUCK

'CHUCK' chu American action comedy/spy drama television series a ni a.  Josh Schwartz leh Chris Fedak te siam a ni. Mizo țawngin Zonet Senhri te'n an letling a. Kum 2011 leh 2012 khan Zonet ah an pe chhuak țhîn a, keini'n Lunglei ah JB Cable Network kaltlangin Thawhțan zan ah kan lo en ve țhîn.

He film hi hmuhnawm ka ti êm êm a, Season 5 thleng an siam a, Episode 91 zet a awm a, vawiin thleng hian hmuhnawm ka la tiin ka phone ah hian MP 4 in ka nei a, ka ennawn fo țhîn.

He film a a changtupa 'Chuck' nungchang (character) hian min hneh êm êm a, chu chu he film ka duhna chhan ber pawh a ni.

Mi mâwl tak, nuihzatthlâk tak tak a che țhîn a ni a, a țhiante pawh amah aia la mâwl leh chhawng an ni. Mahse Chuck-a thluak ah chuan American Sorkar thurûk pawimawh tâwpkhawk a awm avangin a duhtlan nilo in America Sorkar tân Spy hna a thawk a, mâwl eng ang mahse mi pawimawh tawpkhawk a nih avangin American Spy țha ber ber pahnih Sarah Walker leh John Casey te'n an vêng tawp a. Civilian ang a awm in Mission ropui tak tak an thawk țhîn a nih kha.

Mi mawl tak, nuihzatthlâk tak ni mah se Sorkar thurûk chu a zêp tlat a. A hna ah chuan rinawm takin a thawk a, a țhianțha ber ber te leh a hmangaih-a chhung te hnen ah pawh chu a thurûk chu zêp tlat in rinawm takin a hna chu a thawk țhîn tih a film en țhîn te chuan kan hria ang.

Hmangaihna lam la ni mi tak a ni a, amah vêngtu nula hmelchhe lo tak, Spy țha leh thiam thil ngah tak Sarah Walker-i chu a hmangaih tlat a nih kha. A bialnu lem ah Sarah-i chu a chang țhîn a, Mission nei a hna an thawhna ah, rem leh remlo ah pawh a bêm mawlh mawlh a, ã tak leh rilru thianghlim tak pu chung khân Sarah-i chu a hmangaih zia kha a hrilh mawlh mawlh mai zêl a nih kha. Chuti ang taka hmangaihtu chu Sarah-i pawh in a nêp zo ngang lo a, a tâwp ah phei chuan an innei ta nghe nghe a nih kha. 

Sarah-i neih tum a 'proposal' a siam dâwn lai takin Under-Cover Spy ni turin Sarah-i chu an hotu te'n an ko kîr ta si a, Chuck-a chan tûr kha ka ngaihtuah lutuk a, zan ah ka muhil thei țhak lo! A film enzawm leh turin karleh lam ah daih an lo thawn dawn si nên, ka ngaihtuah lutuk khân SMS in Zonet Senhri neitu te zân dar 11:30pm ah ka inbox a-

"Zonet Senhri a ni em le?"

Delivery report a lo lang a...minute 5 hnu ah chuan

"Aw ni e...eng nge ni ta?"

Zan dar 11:30pm vel ah SMS an han dawng nawlh chu Zonet Senhri lam pawh in an ngaipawimawh a, seroius takin an lo reply a niang tih kha ka ngaihtuah chhûak leh hnuhnawh a, ka inthlahrung ang reng hle a. Mahse Sarah-i leh Chuck kha ka rilru ah awm miau sia, ka va inbox leh ta a-SMS chuan-

"Ho pawh inti viau mai thei a, mahse hei Chuck kan enzo chiah a, Sarah-i kha Under Cover Spy ni tur khan a kal daih sia, Chuck nen hian an intawng leh em? An innei dawn em?" 

An innei lo ang tih kha ka hlau êm êm a, ka muhil thei tlat lo! Zonet Senhri lam pawh in chuti taka ka vei chu an lo hrethiam hle a ni ang, an lo reply ve leh a-

"E...an intawng leh dâwn e. An 'insawngkawlâi' lo ang tih pawh sawi theih loh"

Ka hlim kher mai! An intawng leh ngei dawn a nih chu. Hman ah khan, kum 1997 ah tawh khân 'TITANIC' ah Jack khân Rose a thihsan tawh a, zan thum vêl ka mutthilh theih loh phah tawh a-Rose-i chan tur ngaihtuah khan. Mahse Chuck chu ngaihtuah a ngaihloh chu tiin ka muhil ta siai siai a nih kha. 

Chuck khân Sarah hi a hmangaih takzet a, a tân khân a inpumpêk tawp a. Thu mai nilo in a tak in, a nun khân Sarah-i a hmangaih zia kha a lan tîr a. Volkoff-a fanu Vivian-i'n Sarah-i tûr hmanga a kah a, damdawiin a a awm lâi te khân thi turin Vivian-i hnên ah Sarah-i damdawi dîlin a han kal a nih kha.

A hmalam hun atan a a intunnunna tûr a American Sorkar in an pêk khân Sarah-i damdawi chu a han thleng chhuak a nih ber kha. A hmangaih Sarah-i tân khan a va inpumpêkin mahni inphat vêk in a va hmangaih chiang teh lul êm!

Sarah-i khân a hria emaw hrelo emaw, a tân khan a rinawm tlat a, a phatsan ngailo a, Sarah-i phatsan ai chuan amah zâwk kha a inphatsan zêl mai. Kha kha ropui ka tiin ka nun hi a hneh takzet țhîn!

Lal Isua hmangaih tûr a ka inpêkna kawng ah hian ka hmangaih tâwkloh zia leh ka rinawm tâwk loh zia hi ka hmuchiang nawn awn awn țhîn-Chuck-a nun a țang hian. 

Malsâwm tlâk, hmangaih lêt tlâk, khawngaih tlâk hian Lal Isua hi ka hmangaih lo tih hi ka inhriatchian phah hle! A tân ka rinawm lo a, ka va han phatsan zing tak êm! Hnawk ka ti zing a, ka duhna leh ka châk zawng ah chuan Lal Isua hi ka kalsan vang vang a, Amah hre mi, a rawngbawl tûr a inbuatsaih ka nihna hi pakhatmah, pakhattemah ka nun ah hian a lang chhuak ngailo. 

A rilru natna ber ber tûrin ka che a, ka uire san a, ka va tina zing tak êm! Chuck-a'n Sarah-i a zawng zawng leh a chuang liama a hmangaih ang hian Lal Isua hi hmangaih ka duh a, mahse chumi letling hlauh chuan ka nung tlat si!

Heti khawp a min hmangaihtu Lal Isua hi ka hmangaih che ti reng chung siin ka uire san a. A rilru nat berna tur ngat in ka khawsa a, mite hmuh ah pawh ka timualpho in Amah neitu ka nihna hi a lang chhuak ngailo.

Engthil dang mah thlanglo a Lal Isua hi hmangaih tawp mai ka duh țhîn a, mahse ka theilo. Thil dang dang hi ka hmangaihin ka ngaina zâwk fo a. Amah ti rilru na tûr in thil tamtak ka ti țhîn. Ani nen a nun pumkhat, inhmangaih tawn tlat tur a ka intiam lai hian ka va rinawmloh san nasa êm!

Ka tlinlohna leh mâwlna ang ang hian min pawm in min hmangaih a. Ka tân englaipawhin a rinawm a, min phatsan ve ngailo. Keimah zâwk hian ka hmangaih reng theilo a, hreawm ka tiin ka inthiamlo takzet țhîn. Chuck hi chu Sarah tan khan a rinawm reng thei a sin maw le.

Chuck film hmangin Lal Isua nen kan inkar hi ka teh ta vak a, min lo hrethiam mai teh u'n. American film tih takah a sexy ve zeuh zeuh te a awm a, chungchu hmuh kân in Chuck-a'n Sarah-i tâna a inpumpêkna nun kha Lal Isua tân a inpumpêk ka duhna nun atân ka awt in ka duh êm a, ka lo sawichhuak ta mai a ni.

CHUCK hmuhnawm ti velo leh en ve ngailo tân chuan a ho âwm mang e!